ئیدارەو ۋېڕاوەبەری شەنگالی سەبارەڎ بە ئاژەو ٥ جەنگەوانەکەو یەبەشەی کە جە ١٨و ئادارو ئېساڵی جە لایەنو سوپاو عێراقیوە باڵبەسۍ کریێبێنۍ، بە ئەرەیاۋنێوە بانگەوازێوەش ئاڕاسەو سودانی کەرد. جە ئەرەیاۋناکەینە داوا جە سودانی کریان چی ڕووانە کە گلېرگەو ئێزدی ئاماڎەکاری مکەرۆ پەی جەژنەو چوارشەممەو سەرو ساڵۍ، ٥ جەنگەوانەکەو یەبەشەی ئازاڎ بکەرۆ.

ئەرەیاۋناکەی جە لایەنو هامسەرۆکو مەخەدەشەی، نایف شەمۆی بە زۋانی عەرەبی ونیاوە، ئاماژە پانەی کریان گلېرگەو ئێزدی کۊڵەکێوە ڕەسەنو عێراقین، دماو فەرمانەکۍ ساڵۊو ٢٠١٤، هەڵای کاریگەری کۆمکوژی سەرو ئی گلېرگەیۆ مەنەن، ماچۆ: "هەڵای چارەنوویسو هەزاران کەسا بێسەرو شۊنیما نەزانیان، ئی تراژیدیا، بەشێوێوە جدی بیەی و ئایندەو ئێمە مکەرۆ ئامانج".

"داوا مکەرمۍ ڕۆڵەکېما ئازاڎۍ بکریا"

جە ئەرەیاۋناکەینە داوا جە ۋەرپەرسا عێراقی مکەرا و ماچا: "پېسە گلېرگەو ئێزدی داوا مکەرمۍ جە عارەفەو جەژنەو چوارشەممەو سەرەتاو نیسانینە، ڕۆڵەکېما ئازاڎۍ بکریا. با ئی جەژنۍ بۆ بە پەیامو دۊڵەتێوە بەهێزی، کە چنەشەنە وەشگوزەرانی و یۊبیەی و دادپەروەری باڵادەسا".

"با دۊڵەت جوابو داواکارییەکاما بڎۆوە"

جە دمادماینە ئامان: "هیواڎارێنمۍ دۊڵەت جوابو ئی داواکاریەیما بڎۊوە، ئی هەنگامۍ پېسە سەرکۊتەیۍ بلۊ دلۍ پەڕەکا تاریخیوە کە یۊبیەی گرڎو پێکئامایەکا هێقم مکەرۆ".