هێزەکا ئاسایشو دلینەو ژەنێ جە کەمپو ڕۆژی جە شارو دێرکینە کە بنەیانەو چەتەکا داعشیش چنە ئەرەنیشتێ بێنێ، جە دژو شانە شاراوەکا داعشی و هێرشەکاشا، ئارۆ (٥و نیسانو ٢٠٢٥) ئۆپراسیۆنێوە ئەمنی وەرفراوانشا دەس پنەکەرد.

فەرماندەی گرڏی هێزەکا ئاسایشو دلینەو (ژەنا) سەرنیشتوو وەرکەوتوو سووریای دەربارەو ئۆپەراسیۆنەکەیشا، دلێ کەمپەکەینە کۆنگرێوە ڕۆنامەوانیشا ڕێکوزت.

فەرماندەی هێزەکا ئاسایشا دلینەو (ژەنا) ئاواز وڵاتە بە زوانی عەرەبی و بێری عومەرە بە زوانی کوردی ئەرەیاوناکەشا واناوە.

ئەرەیاوناکەینە ئاماژە پانەیە کریان پێشئامایەکا سووریای و هرووژمە واوەیەکێ جە هەرێمەکەینە بە گرڏی و بە تایبەتی سەرنیشتوو وەرکەوتوو سووریاینە، ڕاش پەی زینە کەردەیۆ شانە تیرۆریستیەکا داعشی کەردێنۆ و وچیا: "شانەکێ داعشی ئیسفادە چی دۆخەیە هورگێرانە و هەوڵمڏانە سەرجەنۆ ڕیزەکا وێشا ڕێکوزاوە، پلانەی تیرۆریستیە بە مەبەسو تێکداو ئەمنیەت و ئارامی هەرێمەکەی ئەنجام مڏانە. هێزەکێما چەمدێری جوڵە مەترسیدارەکا ئا شاناشا کەرد، بەتایبەتی جا کەمپانە کە بنەیانەکێ چەتەکا داعشیشا دلێنە ئەرەنیشتێنێ، بەتایبەت کەمپو ڕۆژی. چی دماییا چنین هەوڵدای پەی لوای دلێ کەمپەکەی جە لایەنو شانەکا داعشیۆ دریان، هەڕەشێ سەرو ژیواو ئەرەنیشتا کەمپەکەی وەش مکەرۆ. ئی شانێ ژەنێ و زاڕۆڵێوەشا کوشت و دەستدرێژیشا کەردەن سەرو ژمارێوە ژەنێ و زاڕۆڵا. هەرپاسە هەڕەشێشا جا کەسا کەردەن کە هەوڵشادان  وێشا جە ئایدۆلۆژیاو توندڕەوی ڕزگار بکەرا."

جە بەردەوامی ئەرەیاوناکەینە ئاماژە پانەیە کریان جە وەراوەرو ئی هەڕەشانە هێزەکێما چنین ئۆپراسیۆنێ ئەمنیێ ڕاگری کەردەیشا ئەنجام دێنێ و چنین پلانێ تیرۆریستێشا پوچەڵ کەردێنێ و وچیا: "سەرو بنەماو وەرپرسیارێتییما پەی پارێزناو گەلەکەیما و پابەندبییەیما بە ئەوەکۆشای جە دژو تیرۆری، پێسەو هێزەکا ئاسایشو دلینەو (ژەنێ) بە پەشتگیری یەکینەکا پارێزناو ژەنێ (یەپەژە) دەس پنەکەردەو ئۆپەراسیۆنێوە ئەمنی جەلایەنو هێزەکا ژەنا دلێ هێزە ئەمنی و سەربازییەکاما دژو شانەکا داعشی ئەرەیاونمێ.

جە دماین و ئەرەیاوناکەینە ئاماژە پانەیش کریان ئی ئۆپەراسیۆنە درێژەپنەدەرو ئەوەکۆشایشانە جەدژو گرڏو هەوڵە تیرۆریستەکا داعشی و وچیا: "پێسەو هێزەکا ئاسایشو دلینەو (ژەنا) ئەرەیاونمێش ئۆپراسیۆنەکێما تاوەکو دمای ئاردەی بە هەڕەشێ شانە تیرۆریستییەکا جە دژو ئینسانی بێ تاوانی بەردەوامێ بانە. هەرپاسە پارێزناو گەلەکەیما و بەدی ئاردەو سەقامگیری هەرمانەو وێمانە و بەردەوامێ بیمێ."