جە هۊرچنیە دلێینەییەکاو ٣١و ئادارینە پارتوو دیموکراسی و یەکسانی گەلا (دەم پارتی) تاواش سەرکۊتەیۍ گۆرە بەدەست بارۆنە و کاندیدەکاو دەم پارتی پەی هامسەرۆکاو شارەوانی گەورە شاروو ئامەدی دۆغان هاتوون و سەرا بووچاکە سەڎەنە ٦٤،٩ دەنگەکاشا بەدەسئاردۍ و مۆرەو ۋێشا ۋنەو سەرکەوتەیەکا دا.

سەروو ئا مژاریە هامسەرۆکەو شارەوانی گەورە شاروو ئامەدی سەرا بووچاکە سەبارەڎ بە قۆناغەکاو هۊرچنیەی و باسوو پرۆژەکاشا جە شارەکەنە پەی ئاژانسوو هەواڵوو فوراتی (ANF) قسێش کەردۍ.

سەرا بووچاکە ئاماژەش پانەی کەرد کە گەلوو کوردی جە هۊرچنیەکانە ئیراڎەی بەقوەتوو ۋێش نیشانەدا و واتش: "سەرەڕاو فشاری و زۆردارییەکا گەلوو کوردی بی بە ڕەمزوو هۊرچنیەکا. مدرامانە شکۆمەنڎەکەو وانیما دی. پۊکەی مۆراڵ و وزێوە فرە هەن. پۊکەی ئێمەیچ جە ئاستوو خزمەتکەردەی گەلوو ۋێمانە بیمۍ. قەیوم زەرەرۍ فرەش دان. هۊرشێونایۆیۍ جدی ئابووری هەن جە وڵاتەنە. ئا قەیرانە ئابووریۍ کە بە مەڵامەتوو قەیومیوە وەشەبیێنە شارەکەمانە، کێشێوە فرە جدیین. زەروو چاندی و ئشناسنامەیش خوڵقنان. هەرمانەی یووەمەما ئانێنە بە یۊگێرتەیی چنی شارەوانییەکا تەری ئینایمۍ حۊڵوو پاککەردەیۆ ئا زەرەرانە. سەر جە نۆ ئەرەمەرزیاکا چاندی و زۋانی بنیاڎ بنیەیمۍ، کە ساڵانێوەن جە ڕاو قەیومیوە جە بەین بریێنۍ. وە وەڵینەو هەرمانەکاما ڕاسکەردەیۆ ئا زەرەرانە کە جە ژەنۍ دریان، پەی ئینەیچە سەرۆکایەتی ئەرەمەرزیاو سیاسەتوو ژەنا سەر جە نۆ ئەرەمەرزنمێوە و هەم جە دژوو تنووتیژی دژوو ژەنا کۊشیەیمۍ. بە مەڵامەتوو قەیومیوە ئامەد بیەن بەشاروو قەیرانی، بێکاریێوە فرەو گەنجا بیەیش هەن، پۊکاتی داواو گەنجا پەی ئێستەیۆ هەلوو کاری ئینا پرۆژەو کارەکامانە، پانەی ئابووری دلێینەی بەقوەت کەرمۍ. پەی گەنجا کۆرسی پیشەیی مکەرمێوە."

مشۆم سیستمو هامسەرۆکایەتی  گردو مەیدانەکانە وەڵا بکەرمێوە

سەرا بووچاک دەسنیشانش کەرد جە کۆشیای ژەنێنە سیستمو هامسەرۆکایەتی فرە گرنگا و واتش: "جە سایێ کۆشیای ژەنێوە، ئارۆنە دلێ ڕاوەبەرییەکانە و هەم دلێ پارتییچنە نوێنەرایەتیی یەکسان هەن. ئی دۆخە لاو کۆشیای ژنێوە فرە گرنگا. داواما سیستمو هامسەرۆکایەتین گردو مەیدانەکاو ڕاوەبەرینە وەرچەم بگێریۆ. داوامانە شاری ئازاد و دیموکراتیک بونیاد بنیەیمێ. ئی دۆخە تەنیا بە دیای ژەنێ و بە نیشانەدای یەکسانی بەینو ژەنێ و پیای بۆ. پێویسا سیستمو هامسەرۆکایەتی گرد مەیدانێونە وەڵا بۆوە."