دۆڵەتو تورکی گەرەکشا وېش جە مۆتەکەو زاپی نەجات بڎۊ. جە مېڎانو بەرێ سلێ جە ۋەرکۊتوو ئامێدینە کە شۊنەمایۍ ستراتیجییا، دۆڵەتو تورکی دەسش بە نیایرە و بنەوستەی مۆڵگەی کۊنکرێتی کەرڎەن.
هرووژمە ئەرەگیریەکۍ دەوڵەتو تورکی فاشیستی بە هامکارییەکا پەدەکەی و ڕاپنەدای دەوڵەتو عێراقی سەرو پانیشتوو کورڎەسانی بەردەواما. پێوەس بە دەورو هامکاریکەردەی پەدەکەی پەی سوپاو تورکی گرڎ ڕوۍ زانیاری تازە ئاشکرا مبۆ. ئیجارە زانیارییەکە جە هەرێموو بادینانیۆن.
جە مېڎانوو بەرێ سلێ جە ۋەرکۊتوو شارو ئامێدینە کە ناوچێوە گەشتیارییا، دەوڵەتو تورکی بارەگا بە دیواری کۆنکرێتی وەشمکەرۆ. جە ئەساسەنە ئێگە پارکا و بە نامۍ پارکو ئامێدیۆ ئشناسیان. سنورو ئی پارکەیچە ئینا چېرو دەسەڵاتو هێزەکاو زێرەڤانینە، کە پېسە هێزی تایبەتی پەدەکەی مشناسیۆ.
کەشو ئامێدی ئینا ۋەرنیشتوو زاپینە. چی چوارساڵەو دماینە کە هرووژم و ئەرەگیریەکۍ بە شێوێوە سەخت چنەشەنە بەردەوامێنۍ، کەشو ئامێدی شایەتحاڵو مڎرامانە داستانییەکا گەریلاکاو هەپەگەی و یەژا ستاریش کەرد. پېسە قەڵێوە سەختی ۋەردەم و ئەرەگیریەکانە مرداوە. سوپاو دەوڵەتو تورکی چی مەنتیقەنە زەرەری فرەش ۋەرکۆتەن و لایەزال زەرەرش ۋنە گنۆ. بە تایبەتی جە چالاکییە ئاسمانییەکاو یەکینەکا گەشمەرڎە ئاخین موشی و گەشمەرڎە دۆغان زنارینە چی هامنەنە گورزەی کەمەر ماڕە ۋەرو دژمنی کۊتە. سەرەڕاو سزادای چنین سەروازا سوپاو دەوڵەتو تورکی، فەرماندۍ بە پلەو لیوای و چڼینۍ تەرۍ پلە باڵۍ بە سزایاوێنۍ. چەقای سوپاو تورکی پی جۆرە ئانەی بەروزۆ کە ئا هرووژمۍ تەرسی و هەڕەشێوە فرێش سەرش وەشکەردێنۍ.
ئی مېڎانە کە تاوەکو ئیساتۍ جە لایەنو خەڵکو هەرێمەکەیۆ پېسە 'سەیرانگا'ی ئشناسیێوە و شۊنەماو سەیرانی و گەشتوو هاموڵاتییا بۍ، جە ئیساتێنە جە لایەنو دەوڵەتو تورکیوە فاڕیان پەی بارەگێوە سەروازی. ئینەیچ ڕوۍ تەری قیزەونوو جەنگی ئەرەگیری سوپاو تورکی سەرو خاکو پانیشتوو کورڎەسانیۆ بەروزۆ.
ئا نۆکەرەی تەندەرو وەشکەردەی بارەگاو پارکو ئامێدیش هۆرگێرتەن، نۆکەرێوە ئامەدییا بە نامۍ سولەیمان ئۆدەباشی. ئی کۆمپانیا نۆکەرییە کە پېسە کۆمپانیاو ئەنۆنیمی مشناسیۆوە، تەندەرو بارەگای سەروازیش جە هەرێمەکەنە هۆرگېرتەن و مۆڵگەی سەروازی پەی سوپاو تورکی وەشمکەرۆ. ڕۊشنبیەنۆ ئی کۆمپانیا جە لایەنو سوپایۆ بەکار بریۆ و پارێزگاریش ۋنە مکریۆ. وچیۆ بەرزی هەریۆ چا دیوارە کۆنکرێتیا ٢ مەترێن و کێششا ٩ تەنێن.
دەوڵەتو تورکی پەی ۋێ ڕزگارکەردەی جە مۆتەکەو زاپی و چەقای سوپاکێش ڕووەش کەردێنە ئی سەنگەرا. جە ڕاو ئی جۆرە مۆڵگە کۆنکرێتییاوە هەوڵمڎۆ ۋێش لە گورزەی زەمینی و ئاسمانیۍ بە دوورگېرۆ. چالاکیە بەردەوامەکاو گەریلای جە ناوچەکەنە ئانەما پنەماچا ئی جۆرە کارۍ نمەبۆ بە دەرمانو دەردەو شکسەکا ئەرەگیرا و تەرسەو زاپی دلۍ دەروونو سوپاو تورکینە بیەن بە مۆتەکێوە.
