واتەواچوو ڕاوەبەری خۆسەری ۋەرنیشتی جە ئەڵمانیا د. عەبدولرەحمان عومەر ئاماژەش بە ئیراڎەو گەلوو کوردی کەرد و واتش: "سەرەڕاو هجوومەکا سەروو گەلوو کوردی، بەڵام بەدڵنیاییوە گەلوو کوردی جە سەڎساڵی تازەنە سەرگنۆ."
واتەواچوو ڕاوەبەری خۆسەری ۋەرنیشتی جە ئەڵمانیا د. عەبدولرەحمان عومەر سەرەنجش وست سەروو پلانەی تازۍ و هجوومە ئەرەگیریەکا دەوڵەتوو تورکی، درێژکراوەو سیساسەتوو قڕکەردەی گەلوو کوردی، کە جە پەیماننامەو لۆزانیوە دەسشپنەکەردەن.
واتەواچوو ڕاوەبەری خۆسەری ۋەرنیشتی جە ئەڵمانیا د. عەبدولرەحمان عومەر پەی ئاژانسوو هەواڵوو فوراتی (ANF)ی قسېش کەردۍ و ئاماژەش پانەی دا کە ماوەو سەڎ ساڵان دەوڵەتوو تورکی ئینا حۊڵوو قڕکەردەی و دلېنەبەردەو گەلوو کوردینە و واتش: "جە هیچ شۊنۍ دنیێنە دەوڵەتوو تورکی چنی ستاتۆو کوردی نیا، پەی دلېنەبەردەی و قڕکەردەو کوردا، گرڎ فرت و فێڵۍ و ئەرەگیریۍ مکەرۆ."
عومەر سەرنجش وست سەروو هامکارییەکاو دەوڵەتوو تورکی پەی چەتەکاو داعشی، کە ئینا چوار چێوەو پلانەکاشەنە پەی دلېنەبەردەو ئاخېزوو ۋەرنیشتی و ئەرەگیرکەردەو عەفرینی، بڕێ جە هەرێمەکاو سەرنیشت و ۋەرکەوتوو سوریای، کۆمکوشی و فاڕیای دیمۆگرافیای و واتش: "پەی قڕکەردەو کوردا و دلېنەبەردەی دەسکۊتەکا گەلوو کوردی، گرڎ جۆرە ڕێوە و قەیرانێوە جەهانی پېسە هەلێوە پەی ۋێش بەکارمارۆ، تاکە چێوۍ گەرەکشا دلېنەبەردەی گەلوو کوردین. پەی بەشداریپنەکەردەو حکومەتوو پانیشتوو کوردسانی و حکومەتوو ناوەندی عێراقی پەلکێشوو دلۍ رێکۆتەیەکا مکەرۆ. ئی گرڎوو سەردای و هەوڵاشە تەنیا پەی دلېنەبەردەو کوردین."
تاریخ بەرشوستەن مەتاوا هیچ ئەنجامێوە بەدەس بارۆ
جەبەردەوامی قسەکاشەنە عومەر سەرنجش وست سەروو شکستواردەی دەوڵەتوو تورکی جە ئاست هێزوو بەڕێکوستەبیەو کوردی و واتش: "کوردەکۍ جە ڕووبەڕووبیەیۆ تیرۆرینە جە جیهانەنە دەورێوە ناوازەشا گېڵنا. ژەنی کوردی جە جەهانەنە مشناسیا و دەوروو سەرمەشقایەتی گێڵنا. دۆسۍ کوردا جە جیهانەنە پېڎۍ بیێنۍ. پۊکەی سیاسەتوو تورکی پەی تێکداو سیاسەتوو کوردا جە جیهانەنە تێکشیەن. ٢٥ ساڵېن گۆشەگیرییشا سەروو ڕابەروو گەلوو کوردی عەبدوڵا ئۆجالانیرە سەپنان، وەڵتەرۍ دەسشا گېرت سەروو شارەوانییەکارە، سیاسەتمەداراو کوردیشا زینڎانیۍ کەردۍ، سەرەڕاو ئی گرڎ سیاسەتە پیساسە، بەڵام گەلوو کوردی جە هۊرچنیە دلېینەییەکانە سەرکۊتەیش دەس وست و فاشیزمش توشوو شکسی کەرد. پۊکاتی موینمۍ گەلوو کوردی جە گرڎ شۊنێوەنە خاوەنوو هێزیا. پەی ئی مەبەسیچە دەوڵەتوو تورکی گرڎ شانسێوە ۋێش تاقی مکەرۆوە. گوایە دەسش بە هجوومی ئەرەگیری تازەی کەردەن، پۊکەی ڕۊشنا کە مەتاوۆ هیچ دەرنجامێوە دەس وزۆ و شکس مارۆ پېسە هەمیشەی. کورد ئیتر کوردی وەڵین نیا. گەلێوە بە ڕێکوستەبیەین. خاوەنوو هێزی، سیاسەتی و پرۆژەین."
