سەرەڕاو دماییئامای سزێکێش، وەلۍ ئازاڎ مەکریۊ
فیکرەت گوزەلئایدین ٦٩ ساڵە، زینڎانیی نەوەش، کە سزاو ٣٠ ساڵا زینڎانییش ملەرە سەپیێبێ، سەرەڕاو تەمامیای ماوەو زینڎانییەکەیش، وەلۍ تا ئیساتۍ ئازاڎ نەکریان.
فیکرەت گوزەلئایدین زینڎانیی نەوەش، کە زینڎانوو جۊروو (ئێڵ)وو پانۊساو ئاگریینە گیریان، قەرار بۍ ٣٠ی کانوونوو یوەمینە ئازاڎ کریۊ، وەلۍ نەکریا. فیکرەت، بە تۊمەتوو "تێکدای یەکڕیزی و یەکپارچەیی وەڵاتی" سزاو ٣٠ ساڵا زینڎانییش ملەرە سەپیێبێ، وەلۍ سەرەڕاو تەمامیای ماوە زینڎانییەکەیش تا ئیساتۍ ئازاڎ نەکریان. سەبەبوو ئازاڎنەکرڎەی فیکرەت گوزەلئایدینی ئانەبۍ کە وەختوو هەڵمەتەو وشکنای حەفتەی ویەرڎەینە دەس گیریان ملوو بڕۍ کتێباشرە.
بۊنەو ئا کتێباوە بە نامۍ "زانای کوردببیەی و کوردستانیبییەی زینڎەت کەرۊوە" کە دەسش ملەرە گیریان، ئەوەکۊڵیای سەروو ٥٠ زینڎانییاوە دەسش پەنە کەرد.
بۊنەو ئانەیۊ کە وەنەپەرسایوە سەروو گوزەلئایدین دەسش پەنە کەرڎەن، زینڎاننە ئازیانۊ. ئا زینڎانییە جگە جانەی لکی ئینا مەژگشنە، نەوەشیی جگەری، هەوکەرڎەی سینوزیت، شەقیقە، گەدێ، پاڵەپەستۊو دەمارەکا، بەرزیی فشاروو ونۍ و گیریای سەدەنە ١٠و دەمارەکاش هەن و سەرەڕاو گردوو ئانیشا ڕاپۊرتەو دەزگای پزیشکیی دادوەری ئەرەیاونانش، کە "متاوۊ زینڎاننە بمەنۊوە" و پەوکای زینڎاننە ئازیانۊ.
بنەیانەو گوزەلئایدینی واتشا، کە وەرپەرساو زینڎانی سەبارەت بە ڕاگێریکەرڎەی جە ئازاڎکەرڎەی فیکرەت گوزەلئایدینی، حیچ زانیاریێوە ڕۊشنشا نەدریان پەنە. ئەنداماو بنەیانەکەیش ئاماژەشا پانەیە دان، گوزەلئایدین بۊنەو تێکشیەی باری تەندروسییشۊ مەتاوۊ درێژە بە ژیوایش زینڎانەنە بدۊ و داوا کەرا دەمودەس ئازاڎ کریۊ.
