دڵوەشەنا بە ئەژنیەی جوابوو خەڵکوو سەرنیشتوو کوردسانی وەختۍ میدیاکۍ ۋنەشا پەرسا، دەنگتا بە کۍ دا؟ دەنگت بە کام لایەنی دا؟ یەکسەر جوواب مڎاوە! ئێمە دەنگما بە ۋێما دا. دەنگما بە شەرەفوو ۋێما دا. ڕاسیی ئینە تەنیا دەسەواژێوە ساڎە نییا دەمەنە مۍ بەر، پەیوەندیێوە درێژخایەن و بەقوەت چنی کەیسەکەی و بە جۆشوخرۆش و هەسکەردەی بە سەربەخۆیی نیشانە مڎۆ.

ئیساتۍ گەرەکم نیا باسوو هۊرچنیەی بکەروو. ئینە ڕووەدایۍ ئاسایی و وەختیا و کاریگەریی گەورەش سەروو چەمکوو کۊشیای و مۆڕاڵوو ئا مەردمیە نییا کە پی ماراسۆنە دوورودرێژەو ئازاڎیی کوردسانیرە ویەردێنۍ. پێسە ویرمەندی ڕادیکاڵوو فەرەنسای، ئێرنست ڕینان ماچۆ: (کۊشیای پەی نەتەوێوە پێسە ڕیفراندۆمێوە ڕووانەی پاسەن) پێشنیازوو (ڕینان)ی بە شێوێوە سەرەکیی پەیوەندییش بە گرووپە چێر دەسەکاوە هەن و پەنەوازەن گرڎ ڕووۍ و جە گرڎ ڕووەدایێنە ۋێنیشاندای بکەرا.

سەرەڕاو بەکارئاردەی گرڎ جۆرە فرتوو فێڵ و تەڵەکێوە جە تەرەفوو دەوڵەت و حکومەتوو تورکیایۆ، خەباتوو کورد و کوردسانیی جە سەرنیشتوو کوردسانی و تورکیای ڕووانە و جە گرڎ ڕووەدایێنە چالاکی ئەنجام مڎا و ۋێنیشاندای مکەرا. بەڵۍ میاومێنە ئەردۆغان تووڕەن و ئاکەپە-مەهەپە شارە گەورەکا جە دەس مڎا و بە خێرایی دەسبەرداروو دەسەڵاتی با، بەڵام هەڵای تووڕەیی و غەزەبوو ئاڎیشا بێ دوودڵیی جە سەپنایش سەروو گەلوو کوردیرە بەردەواما، حۊڵ مڎا چ جە پانیشتوو  چ ۋەرنیشتوو کوردسانینە ئۆپراسیۆنە سەروازییەکاشا زیاتەر بکەرا. دیارا ئەردۆغان گەرەکشا دەوری سیاسیی ۋێش جە ۋێنەو فاشیست و ۋنمجێنە تامام بکەرۆ و پێسە (کەنعان ئەڤرێن)ی مرۆ. سەرەڕاو ئانەی شانسوو ئانەیشە بۍ کە ئاشتیی بەرقەرار کەرۆ و تورکیایچ بۆ بە شۊنۍ عالتەر پۍ ژیۋای.

جە لێوەتەریچۆ هیواو هومێڎێوە گەورە، دەرفەتێوە ئێژا و جمیەرێوە بەقوەتما هەن و متاوۆ بە کرداری فرە ڕەهەند جوابوو گرڎ چەشنە سەختیێوە بڎۆوە و بەرەکا پۍ خەباتێوە عالتەری بکەرۆوە. جە ڕوانگەو سیاسەتیۆ تەماشەو دەم پارتی بکەردۍ چی هۊرچنیەنە چێشش کەرد. جە ڕوانگەو سەروازییوە تەماشەو ئانەی بکەردۍ کە گەریلا ڕووانە جە کەشەکا کوردسانینە چێش مکەرا. جە بواری دیپلۆماسیینە تەماشەکەردۍ خەباتوو کوردا چ کاریگەریێوەش سەروو گرڎوو هێزە دلێینەی و میان دەوڵەتییەکا مەنتیقەکەیچ بیەن. چانەیچ موهیمتەر، سەروو ئاستی مەدەنیی و کۆمەڵایەتیی، بزاندۍ کورد چنی ۋێش ڕێک وستەن و پێسە کەشێوە هێقمی ۋەروو دەم و فاشیزمی و هێزی تاریکی و ئەومەنڎەی (دماکۊتەینە) مردانۆ.

سەرچەمە/ گۆڤاروو ئازاڎیی گلێرگەی.