سەروازاو تورکی هجوومشا کەرد سەرو پارێزنەرێوە، کە چەنی موەکیلەکەیش بەکوردی قسۍ کەرۍ
ئەندامو ئۊهەدەی، ئەحمەد ئاتش وەختو دەسبەسەرکەرڎەی موەکیلەکەیشنە بە زوانی کوردی قسێش چەنی کەرڎەن، پەوکای فەرماندەو بنکەکەی و سەروازەکۍ هجوومشا کەرڎەن سەرش.
ئەحمەد ئاتش، ئەندامو کۊمەڵەو پارێزنەرا ئازادی(ئۊ هەدە)، لاو فەرماندەو بنکەو جەندرمەو هەرێمو پیشەسازیی بەرهەمئارڎەی، 4-5 سەرواز، بۊنەو ئانەیۊ بە زوانی کوردی چەنی موەکیلەکاش قسێش کەرڎێنۍ، دریانش وەنە و سووکایەتییش پەنە کریان. کرێکاراو قوماشو ئۊزاکی کە ماوەو ١٢ ڕوان ڕووبەڕووۍ فشاری، هەڕەشا و بەرکەرڎەی بیێنێوە، جە ١٠یەمین ڕۊو چالاکییەکەینە، یانی ٦ کانوونو یوەمی، لاو جەندرماوە دریانشا وەنە و دەسبەسەرۍ کریێنۍ. هەرپاسە ئاتش بە مەبەسو دیداری چەنی موەکیلە دەسبەسەرکریایەکا سەرڎای بنکەو جەندرمەو پیشەسازیی بەرهەمئارڎەی کەرۊ ڕحانە. دماو ورگێرتەی قسا، چەنی موەکیلەکاش بەکوردی قسۍ پەوکای هێزە ئەمنییەکۍ بە ئاتشی و موەکیلەکاش ماچا:"ئێمە جە کوردیی مەیاومێنە، بە تورکی قسۍ کەرمێ" و کارڎایوەش چەنە گنۊوە.
ئاتیش، چەنی هامکارێوەش، سەبارەت بە ڕوودایەکەی گێرتە ڤیدیۊیێوە تۊمار کەرا، دماتەر جە خەسەخانەو دەوڵەتیینە بالکلگۊل جە شارو ڕحاینە ڕاپۊرتەو دەسدرێژیکەرڎەکەی ورگێرا، ئاتش بە تۊمەتەو"بە ئەنقەست بریندارکەرڎەی و ڕانەدای بە کەرڎەی هەرمانەکاش" جە داواکاری گردینو ڕحاینە سکاڵاش سەرو هجوومبەرەکا تۊمارە کەرڎە. جە داواکارییەکەشنە داواو وەنەکۊڵیایۊش جەکامێراکاو ناو بنکەو پۊلیسی کریێنە و ئا کەسۍ کە شناسنامەشا دەستنیشان کریان سزا بدریا.
