ئەندامەو کۊمیتەو دیپلۊماسیی تاژۍ سوهام شەنگالییە واتش، هەرمانەی سەرەکییەو گلێرگەی ئێزدی مسۊگەرکەرڎەی ئازاڎیی جەستەیی ڕابەرو گەلو کوردی عەبدوڵا ئۊجالانین و واتش، "پەی ئازاڎیی ڕابەر ئاپۊی گوڕ بە کۊشیای مڎەیمێ".
١٠و تشرینو یوەمو ٢٠٢٣ هەڵمەتەو 'ئازاڎیی پەی عەبدوڵا ئۊجالانی و چارەسەری سیاسی پەی پەرسەو کوردی' جە دەیان وەڵاتێنە بە شێوەی هاموەخت دەسش پەنە کەرد و تا مۍ وەرفراوانتەر بۊ. گلێرگەی ئێزدی و پێکئامایەکاو شەنگالی ٢١ تشرینو یوەمو ٢٠٢٣ بە دروشمو "ئازاڎیی پەی ڕابەر ئاپۊی و وێڕاوەبەری پەی شەنگالی" بەشدارییشا جە هەڵمەتەو ئازاڎییینە کەرد. جە چوارچوەو هەڵمەتەکێنە گرد ڕوۍ چالاکیی جیاجیۍ کریا. ئەندامەو جمیەرو ئازاڎیی ژەناو ئێزدی (تاژێ) سوهام شەنگالییە بارەو گۊشەگیریی تندکریاو سەرو ڕابەرو گەلو کوردی عەبدوڵا ئۊجالانی و هەڵمەتەو 'ئازاڎیی پەی عەبدوڵا ئۊجالانی و چارەسەری سیاسی پەی پەرسەو کوردی" قسێش کەرڎۍ. شەنگالییە باسش چانەیە کەرد، کە خەبات و هەرمانەی سەرەکییەو گلێرگەی ئێزدی پەی دەسەبەرکەرڎەی ئازاڎیی ڕابەرو گەلو کوردی عەبدوڵا ئۊجالانی بۊ.
'مشۊم هەڵمەتەکۍ قەوەتتەرە و بەگوڕتەرە کەرمێ"
شەنگالییە وستیچش ڕووە، وێڕاوەبەریی بەشدارییش جە هەڵمەتەکێنە کەرڎەن و واتش، "بەشداریی گلێرگەو ئێزدی هەڵمەتەکێنە فرە گرنگا. دماو فەرمانەو ٢٠١٤ یۊ جە ئامانجە سەرەکییەکاو گلێرگەی ئێزدی ئازاڎی جەستەیی ڕابەرو گەلو کوردی عەبدوڵا ئۊجالانین. بە چالاکیی جیاجیا ئێمە بەشداریی هەڵمەتەکێنە کەرمۍ. بەشێوە جە خەبات و چالاکییەکاو ئیدارەو وێڕاوەبەریی شەنگالی، خەباتی پێوەس بە ئازاڎیی ڕابەر ئاپۊین. ئێمە پێسە گلێرگەو ئێزدی ماچمۍ، ئێمە و ڕابەر ئاپۊ جە یۊیۊ نزیکێنمۍ. وەروو ئانەیە دژوارتەرین بارودۊخەنە ڕابەر ئاپۊ خاوەندارییش چەنە کەردیمۍ، جەنگەوانەکێش ئامۍ دەمماوە. پەوکای مشۊم گوڕ بە کۊشیای ئازاڎیی ڕابەر ئاپۊی بدەیمێ".
'پەرسەو ئازاڎیی ڕابەر ئاپۊی سەرو ئاستو جیهانینە پەرسەی گەرمەو ڕۊینە'
شەنگالییە واتش، کە هەڵمەتەو ئازاڎی فرەلایەنێنە و پێسە کۊشیایێوە درێژخواینی کریۊ و واتش: "نەک حەر کورد، بەڵکوم جە ٧٤ ناوەنداو دنیێوە داواو ئازاڎیی ڕابەر ئاپۊی کریا، ئا دۊخەیچە کاریگەرییش سەرو پەرسەو ڕۊی دنیاینە نیارە. بییە بە تەوەر و بەرنامەو هەرمانەو چند پەرلەمانێوە. فرە لایەنۍ چارەسەرو پەرسەو کوردی و ئازاڎیی ڕابەر ئاپۊیشا نەوست بەرنامەو هەرمانێشاوە، وەلۍ ئارۊ ئا هەڵمەتۍ بییەن باسو گەرمو ڕۊی و ئیتر دنیا نمەتاوۊ وەراوەرو گۊشەگیریوە ددان گێرۊ وێشرە. فرەو جارا دۊخو نێلسۊن ماندێلای و ڕابەر ئاپۊی بە یۊترینی بەراورد کەرا، وەلۍ ئیساتی دۊخو ئیمراڵی گردوو سنوورەکاش ویەرنان . مافو تەندروسی و یاساییبییەی نییا، گۊشەگیری ئینا بەرزتەرین ئاستەنە و بەرڎەوامە".
'ئازاڎیی ڕابەر ئاپۊی کرێڵو چارەسەریین'
شەنگالییە وستیچش ڕووە، کە کێشەکاو وەرکەوتو دلێڕاسەی تا بۍ قووڵتەرۍ باوە، "ئەگەر گەرەکمابۊ کێشەو کوردی کێشەو وەرکەوتو دلێڕاسەی چارەسەر کریۊ، مشۊم ئازاڎیی جەستەیی ڕابەر ئاپۊی مسۊگەر کریۊ و گوڕ بە کۊشیای بدریۊ. ئانە کە بەرەو چارەسەریی کەرۊوە، ئازاڎیی ڕابەر ئاپۊیا. پی گرنگیپەنەدایۊ بەشداریی هەڵمەتەکێنە کەرمۍ و ئی هەڵمەتۍ کاتیە نییەنە. ئامانجدارەنە و پەی گردوو بەشەکاو خەباتو ژەنا و گەنجا و خەباتی کۊمەڵایەتی، هەرمانەو وێشا کەرا و بەشداریی هەڵمەتەکێنە کەرا.
واتیچش، "گردوو جیهانی دیشا کە چەنی قسۍ ڕابەر ئاپۊی یانۍ 'ژەنی، ژیوای، ئازاڎی' تەماموو جیهانیرە وەڵا. بیێنۊ، ئا دروشمۍ جە وەرکەوتوو کوردستانینە و ئێراننە دەنگش داوە. ڕابەر ئاپۊ تا ژەنی بۊ بە ساعیبەو هێزی و و ئیرادەی، ڕەنجی گەورەش دان، ئارۊیچەنە ژەنی وێشا بە فکر و ئەندێشەکاو ڕابەر ئاپۊی ڕێکۍ وزا. ژەناو ئێزدی ئازاڎیی ڕابەر ئاپۊی پێسە ئازاڎیی وێشا منیارە. ژەناو ئێزدی هەوڵۍ مدا چی هەڵمەتێنە هەرمانەو وێشا پۊڕنا".
بەشێوە تەرو قسەکاشنە شەنگالیییە واتش، "گۊشەگیریی چڕ کە سەرو ڕابەر عەبدوڵا ئۊجالانیوە پەیڕەو کریۊ، تەنیا لاو دەوڵەتو تورکیوە مەکریۊ و سیستمی جیهانی ئا گۊشەگیرییە کەرۊ. پرسیارەو دۊخو ئیمراڵی جە وەزارەتو دادو دەوڵەتو تورکینە کریێبۍ، جە جوابنە واتەبێشا سی پی تی ئاگادارا. پێسە چەنی بە شێوەی میاننەتەوەیی پیلانگێڵنی جە ڕابەر ئاپۊی کریا، سیستمو گۊشەگیری لاو هێزە دەسەڵاتدارە جیهانییەکاوە بریۊ ڕاوە".
ئەندامەو کۊمیتەو دیپلۊماسیی تاژۍ سوهام شەنگالییە ئاخرو قسەکاشنە داواش وەنەو گلێرگەی ئێزدی کەرڎە هەڵمەتەو ئازاڎیی فراوانتەرە و بەگوڕتەرە کەرا.
