کۆمیتەو پارێزنای ڕۆنامەنویسا (سی پی جەی) دەربارەو هجوومە درۆنییەکەو نزیکوو سەیدسادەقی و گەشمەردەبییەی هەردووە ڕۆنامەنویسا گوڵستان تارا و هێرۆ بەهادینێ ئەرەیاوناش: تورکیا جوابوو پەرسەکاش نەدێنمێوە، کە سەبارەت بە هجوومەکەو سلێمانی وەنەما کەردەبێ.
جە وەڵاوکریێوەنە کۆمیتەو پارێزنای ڕۆنامەنویسا (سی پی جەی) ئەرەیاوناش، ڕۆو جومعەی شاروو سلێمانینە هجوومێوە درۆنی کریا و ئاکامەنە دووێ ڕۆنامەنویسێ بە نامەکاو هێرۆ بەهادینێ و گوڵستان تارێ گیانشا جەدەس دا و ڕێبین بەکریچ بریندار بی.
کۆمیتەو پارێزنای ڕۆنامەنویسا ئاماژەش پانەیە کەردەن، پەیامێوەشا پەی نوێنەری هەمیشەیی تورکیای نەتەوە یۆگێرتەکانە کیانان و پەرسیشا دەربارەو ئا هجوومەیە ئاراستە کەردەن، وەلێ هەڵای جوابشا نەدریانۆ.
ئەرەیاونایەکەنە، ڕێکوزوو پڕۆگراموو وەروەرکەوتوو دلیڕاسەی و سەرنیشتوو ئەفریقای جە کۆمیتەو پارێزنای ڕۆنامەنویسانە ئەرەیاونانش:" پێسەو سی پی جەی دڵگرانێنمێ پا هجوومەو فڕۆکەی بێفڕۆکەوانی، کە ڕۆو ٢٣ـێ ئابی هەرێموو کوردستانینە ڕووەش دا و دووێ ڕۆنامەنویسێ گیانشا جەدەس دا و ڕۆنامەنویسێوە بەسەختی بریندار بی، فرە بەداخۆ پەنەوازا دەسەڵاتداراو تورکیای دەمودەس ئەوەکۆڵیای بکەرا و دیارییش بکەرا کە ئایا تیمەکە بۆنەو چێشیوە کریێنێ ئامانج".
