تیموو کوردستانوو عێراقوو سی پی تی، کە ماوەی ویەرڎەنە بەشداریی ٢٤ ئەرەنیشتاو کەیسوو زیندانییاو بادینانیش کەرڎەن، جە دمایین ئەرەنیشتەینە کە ٢٠ تەمووزوو ئێساڵی هەولێرنە لوا ڕاوە، سی پی تی چا ئەرەنیشتەینە ئامادە بۍ، کە دلێشنە حوکموو چوار ساڵا زیندانییش پەی شێروان شێروانیی ڕۊنامەنویسی درێژ کریاوە.

دەربارەو ئا داڎگاییکەرڎەیە سی پی تی جە کۊنفراسێوە ڕۊنامەوانیینە تەماموو پڕۊسەو داڎگاییکەرڎەکەیش وست چێروو پرسیارێوە و ڕەخنەی جیددیش وەنە گێرت، قەرارەکەش دژوو شێروان شێروانیی بە سیاسی نامۍ نیا، نەک یاسایی.

سی پی تی ڕەخنە و چەنەوینایەکاو وێش بە چند خاڵێوە پێسە واتێ:"

یوەم: هۊڵوو داڎگای سەروازی کریابۍ لاو کەمیوە نزیکەو ١٥ سەروازا دلۍ هۊڵوو داڎاگاینە بێنۍ،  بەچەکۊ زیاتەر چانەیچە جبەرۊ مردێبێنۍ، چەنی  کەسێوە متاوۊ جە ژیوگێوە چانەنە داکۊکی جە وێش کەرۊ، وەختێوەنە ئا چەکدارۍ ئانێنۍ کە سکاڵاشا سەروو شێروان شیروانیی تۊمارە کەردێنە."

دووەم: پڕۊسەکە ناداڎییش چەنەبۍ چونکوم پارێزنەراو شێروانی بە هیچ نۊعۍ نەتاواشا پەڕەو داڎگای و پەڕەو كۊڵیایۊ وینا، چەنی کەسێوە متاوۊ داکۊکی جە وێش کەرۊ ئەگەر نەزانۊ پەڕەو چەنەکۊڵیایۊکەیش و پەڕەو داڎگای چێششا چەنەن.

سییەمم: ئەو شایەتۍ کە داڎگانە ئامادۍ بێنۍ گردشا بێتاوانیی شێروان شێروانیشا سەلەمنا و ئاماژەشا کەرد، کە وەکالەتشا دان بە شێروان شێروانی، وەروو ئانەی جیاتیی ئاڎیشا ئیمزا کەرۊ و داوکاریی ئاڎیشا بەرز کەرۊوە.

 چوارەم: بەڕێز داڎوەر پرسیارەش ئۊو شایەتەکا کەرڎە ئایا شمە هیچ زەرەرێوەتا وەر کەوتەن، جیاتیی ئانەیە شێروان شیروانیی ئیمزاش کەردێنە، واتشا نا هیچ زەرەرما وەنە نەکەوتەن و ئێمە وێما داواما جە شێروانی کەردێنە، کە ئیمزا جیاتیی ئێمە کەرۊ.

پەنجەم: نوێنەروو زیندانوو خاسسازیی گەوراو هەولێری ئاماژەش پانەیە کەرد:" شێروان شێروانی نامۍ ئێمەش خراپە کەردێنە پەوکای سکاڵاما تۊمارە کەردێنە" ئێمە پێسە سی پی تی پرسیارە کەرمۍ کە دۊکۊمێنتێوە پەی دلۍ زیندانی بییەن چەنی لوان جبەر و نامێتا خراپ بەرەکەردێنە".

ششەم: ئێمە فرە نیگەرانێنمۍ جە دۊخوو تەندروسیی زیندانییا و نیگەرانێنمی چانەیە زیندانیۍ ئەشکەنجە مدریا و مافەکێشا پەی دەسەبەرۍ مەکریا. ئانە ئێمە چەنەوینایما کەرڎەن سیستموو داڎوەری جە کوردستاننە سەربەوۍ نییا، بەڵکوم پێسە کەرەسێوە بەکار مۍ پەی دەسەڵاتوو حیزبە سیاسییەکا و سەرکوتکەرڎەی ئازادیی ڕابەروستەی.

حەوتەم: نێچیرڤان بارزانی، مەسروور بارزانی و وەرپەرسای تەروو هەرێموو کوردستانی ماچا داڎگا هەرێموو کوردستانینە ئازاد و سەربەوێن، وەلۍ دیما کە ئومێد بەرۊشکی وەروو ئانەی ڕەخنەش ئۊو مەسروور بارزانی گێرتەبۍ، نیمەشەونە یانەکەو وێشەنە ئڕفاناشا، دماتەر واتشا کە بە قەراروو مەسروور بارزانی ئازاد کریان. کەواتە قەراروو ئازادییش بە دەسوو مەسروور بارزانی  بۊ، قەراروو گێرتەیچش هەر بە دەسوو ئاڎی بییەن بووە نەک داڎگای.

س.ز