شاروو سیدنی ئوسترالیاینە بە سەرمەشقایەتی ناوەنڎوو گلێرگەی دیموکراتیکی کوردی (دەکتەم) نەورۆز بە مەراسیمێوە پیرۆز کریا، پەرلەمانتار و نوێنەراو پارتوو کرێکارا ستیفان بالی، کاریشما کالیاندا، ئان ستانلی، بێتی گرین، ئەنتۆنی ئادەم، سیناتۆرۍ و پەرلەمانتاراو پارتوو سەوزی لی ڕیانۆن، جەیمی پارکەر، سەرنوویسەروو ڕۆنامەو چەپی سەوزی پیتەر بۆیل، بیل کریوس ڤاکفی، باشکانی پاپز، بیل کریوس، نوێنەروو گەلوو تامیلی، پارێزنەروو مافەکا مرۆڤی لاریسا پاین، نوێنەروو ڕێکوزیا مەدەنییەکا، کوردسانیۍ و دۆسەکێشا بەشدارۍ مەراسیمەکەی بێنۍ. مێڎانەکە بە ئاڵاو ڕابەروو گەلوو کوردی عەبدوڵا ئۆجالانی و پەکەکەی و کەجەکەی و وێنەکاو گەشمەرڎا نەورۆزی ڕازیاوە. سەرەمڕە درووشمەکاو "بژیۋۆ سەرۆک ئاپۆ" و "بێ سەرۆکی ژیۋای مەبۆ" بەرزۍ کریێوە.

دماو دەیەقێوە ڕێزگێرتەی جە گەشمەرڎا، پەرلەمانتار ستیفان بالی واتش: "بە پەشتیوانی گەلوو کوردی فرە دڵوەشێنمۍ. هیواڎارێنمۍ نەورۆز بۆ بە سەرچەمەو ئاشتی و ئازاڎیی، نەورۆزوو گرڎ لایۍ پیرۆز بۆ".

جە پارتوو سەوزینە، جەیمی پارکەر نەورۆزش جە ڕابەروو گەلوو کوردی عەبدوڵا ئۆجالانی و گەلوو کوردی پیرۆز کەرد، ئەرەیاۋناش گەلوو کوردی بە سەرمەشقایەتی پەکەکەی دژوو سیاسەتوو قڕکەردەی کۊشیای ئازاڎیشا ئەنجامدان، واتش: "ڕابەروو ئی گەلەیە بەڕێز عەبدوڵا ئۆجالانا، حەرچنڎە ئینا هەلومەرجی سەختوو گۆشەگیری ئیمراڵینە، هەڵای پا گیرا جە چارەسەری سیاسی و دیموکراتیکی پرسوو کوردینە. حۊڵی فیکریش وستەن گەڕ پۍ چارەسەرکەردەی پرسوو ژەنۍ و تەماموو پرسەکا مرۆڤایەتی. ئێمە قەرزارۍ بەڕێز عەبدوڵا ئۆجالانینمۍ. پۍ ئازاڎیی جەستەیی ئاڎیی درێژە بە کۊشیای مڎەیمۍ. سەروو ئی بناغەیە، نەورۆزوو بەڕێز عەبدوڵا ئۆجالانی و گەلوو کوردی پیرۆز مکەروو".

هامسەرۆکاو دەکتەمی گولای ئاڵکانە و تەیمور تاتوان سڵامشا کەرد جە مزانیەکەو ئەنداموو کۆمیتەو ڕاوەبەری پەکەکەی موراد قەرەیلانی و مدرامانی کەم وێنەو گەریلای، تەئکیدشا کەردۆ کۊشیای ئازاڎیی ڕابەروو گەلوو کوردی عەبدوڵا ئۆجالانی ئێژاتەر کەرا.

دماو گۆرانیا و هۊرپڕای، مەراسیمەکە بە درووشمەو "بژیۋۆ سەرۆک ئاپۆ" دمایش پنە ئاما.