دادگاییکەرڎەی سیاسەتمەدارو کورڎی کەنعان ئەیاز جە دادگاو ویلایەتو هامبورگینە لواڕاوە و دادگا سزاو ٤ ساڵا و ٣ مانگا زیڼانیش سەرو کەنعانیرە سەپنا. سزاکۍ جە لایەن و کورڎەسانیاوە ۋەردەم و دادگاینە شەرمەزار کریا.
سیاسەتمەدارو کورڎی کەنعان ئەیاز کە سەرو داواو ئەڵمانیای قوبرسەنە گیریان و ڕادەسو ئەڵمانیای کریابێوە ئارۆ جە لایەنو دادگاو ویلایەتو هامبورگیوە دادگایی کریا و دادگا سزاو ٤ ساڵا و ٣مانگا زیڼانیش سەرەرە سەپنا.
وەڵۍ ئەرەنیشتەو دادگاینە کورڎەسانیا ۋەردەم و بیناو دادگاینە پەی پەشتیوانی جە کەنعان ئەیازی گلێرۆبیەیۍ ناڕەزایشا ئەنجامدا.
گلێرۆبیەکەی جە لایەنو کۆمیتەو پەشتیوانی جە کەنعان ئەیازی هامبورگەنە رێکوزیابۍ، بەدەیان کەسۍ بەشداریشا جە ناڕەزاییەکەینە کەرڎ، نوویسەرە و پارێزنەرەو مافەکا ژەنا ئانژا فلاچە ئەرەیاۋناش کەنعان ئەیاز جە ۋەرگیری کەردەکەیشەنە دەرزێوە مرۆییش بە دادگای دا و واتش: "هامسۆزی ۋێتا نەک تەنیا پەی ئەیازی بەڵکم پەی گرڎوو زیڼانیا سیاسی نیشانە بڎەیدۍ. قەرارەکە هەرچیۍ بۆ ئێمە پەی ئازاڎکەردەی کەنعان ئەیازی و زیڼانیا سیاسی تەری، بەردەوامۍ مبیمۍ جە چالاکییەکاما."
