ئەندامەو کۆنسەو سەرۆکایەتی گرڎیی کەجەکەی، سۆزدار ئاڤێستا پەی ئا ڕاپیمایەی کە بۆنەو ساڵیاڎو کۆمکوژی پاریسیۆ ئەنجام مڎریۆ، پەیامێوەش کیاست. سۆزدار ئاڤێستا ماچۆ: " تا ڕۊشنکەردەیۆ هەردووە کۆمکوژییەکەی ئەۋەکۊشای گەلوو کوردی بەردەوام بۆنە".
ئەندامەو کۆنسەو سەرۆکایەتی گرڎیی کەجەکەی، سۆزدار ئاڤێستا پەی ئا دەیان هەزار کەسا کە پاریسەنە گلێرۍ بیێوە قسێش کەردۍ و واتش: "دووە کۆمکوژییەکە بەشێوێوە ڕێکەوت نەبێنۍ. تاوانبارەکۍ دیارێنۍ. میت و دۆڵەتو تورکی و گلادیۆ پێوەرە پلانەو کۆمکوژییشا نیارە. جە چوارچێوەو ئی پلانێنە، کۆمکوژییەکە ئەنجامدریا. ئی کۆمکوژیۍ چن مەرامێوەشا هەن. هەرچڼە هێزو پەشتەو کۆمکوژییەکا دیارێنۍ، بەڵام هەڵای کۆمکوژییەکۍ ڕۊشنۍ نەکریێنۍ و ۋنەپەرسایۆ جە تاوانبارا نەکریان. تا ڕۊشنکەردەیۆ هەردووە کۆمکوژییەکەی ئەۋەکۊشای گەلوو کوردی بەردەوام بۆنە".
سۆزدار ئاڤێستا واتش: "جە ١٢ هەمین ساڵیاڎو کۆمکوژی یووەمو پاریسینە، کە جە ئاکامەنە یۆ جە ئەرەمەرزنەرا پارتەکەیما ساکینە جانسزە و هەمڕا فیدان دۆغانە و لەیلا شایلەمەزە، وە جە کۆمکوژی دووەمو پاریسینە کە یووە جە سەرمەشقا ئەوەکۊشای ئازادیی ژەنا ئەڤین گۆییە و وڵاتپارێزنی قارەمان عەبدولڕەحمان کزل و هونەرمەڼو گەلوو کوردی میر پەروەر گەشمەرڎۍ بیۍ، بەڕێزۆ یاڎشا مارمێوە. جە کەسایەتی هەمڕا قارەمانەکامانە گرڎو گەشمەرڎا ئەوەکۊشای ئازادیی کوردەسانی بە ڕێزۆ یاڎ مارمێوە. پېسە پارتو گەشمەرڎا دەسما پی ئەوەکۊشایە کەرڎ و ئا ئاستەی ئارۆ پنەش یاوێنمۍ جە سەیەو ئەوەکۊشای گەشمەرڎاماوەن. پۊکەی ۋێما بە قەرزارو گەشمەرڎاما مزانمۍ".
سۆزدار ئاڤێستا ئەرەیاۋناش "هەڵوێس و ئەۋەکۊشای گەلی و ژەنا و جواناما جە جبەرو وڵاتی نموونەییا". هەرپاسە واتش ژەنا کوردی چڼین ساڵێن سەرو هێڵۊو ساکینە جانسزێوە ئەۋەکۊشا. سۆزدار ئاڤێستا ئەرەیاۋناش سەرو ئی بناغەیە، ئەۋەکۊشای ئازادیی ژەنا کوردەسانی و ئەوەکۊشای ئازادیی کوردەسانی جە گرڎ شۊنێنە وەڵابیەنۆ و ئشناسیان.
جە درێژەنە واتش: "قەولما دا هێڵۊو هەمڕا سارۍ بکەرمۍ بە بناغەو ئەوەکۊشایما پەی ئازادیی ژەنا. ئینە ١٢ ساڵێن سەرو ئی بناغەیە ئەوەکۊشمۍ. ئارۆ جە هەرێمەکەمانە و جە کوردەسانەنە پرۆسێوە چارەنوویسساز هەن. هرووژمەکۍ پەی سەرو شۆڕشو ۋەرنیشتی بەردەوامێنۍ. پلانێوە دژو سەرنیشت و ۋەرکۊتوو سوریای هەن. ئا هەڵمەتە مېیاننەتەوەییۍ کە دۆسەکێما پەی ئازادیی ڕابەرایەتی دەسشا پنە کەرڎەن و جە لایەنو ژەنا و جوانا و گەلەکەیماوە خاوەنداریش ۋنە مکریۆ، ئەنجامش بۍ. سەرو ئا بناغەیە دیدار چنی ڕابەر ئاپۆی ئەنجامدریا. بەڵام هەڵای مەنەن. تا ئازادی ڕابەر ئاپۆی بەدەس نۍ، نمەتاومۍ واچمۍ پڕۆسەو ئاشتی دەسش پنەکەردەن. پرۆسەکۍ جە ژیۋگەی ئازادەنە وەڵۍ گنا. پۊکەی پەنەوازا درێژە بە ئەۋەکۊشای بڎەیمۍ".
