چا ڕووەوە عەفرین دەوڵەتوو تورکی ئەرەگیر کەردەن، تاوانکارییەکاو دەوڵەتوو تورکی و چەتەکاش پەی سەروو پێکئامایەکاو هەرێمەکەی جە کوشتەی و دەسدرێژی و ئڕفاناینە و داواکەردەی فیدیەینە و هەڕەشە و تاڵانکەردەی سرووشتینە بەردەواما. چی دمایاوە بە پاو ڕاپۆرتەو ناوەندوو بەدیکۆمێنتکەردەی پاشێلکارییەکاو مافوو ئینسانی، دادگاو تورکی عەفریننە سزای قورسەش سەروو ١٠ ژەنارە سەپنێبێ و ٩ ژەنێشا کوردێبێنێ.

تەڤگەروو ئازادیی ژەناو ئێزدی (تاژێ) بە ئەرەیاوناێوە تاوانکارییەکاو دەوڵەتوو تورکی و چەتەکاش شەرمەزارێ کەردێ. ئەرەیاونایەکە قەبرسانوو گەشمەردە دڵگەشی و گەشمەردە بەرخۆدانوو شەنگالینە ئەندامەو دەسەو هەماهەنگیی تاژێ، نەعیم بەدەلیوە ونیاوە.

ئەرەیاونایەکەنە تیشکە وزیا سەروو پاشێلکارییە بەردەوامەکاو دەوڵەتی ئەرەگیروو تورکی و چەتەکاش جە هەرێمە ئەرەگیرکریایەکانە و ماچۆ: "بەتایبەت ژەنی ڕووبەڕووێ گرد جۆرە ئەشکەنجێوە باوە. ئی تاوانکاریاو چەتەکاو دەوڵەتوو تورکی وەرەچەموو ڕێکوزیایەکاو  پارێزنای مافوو ئینسانیوە کریا. ژەنی هەرێمەکەنە دادگایێ کریا و قەراروو قەنارەدای ملوو ٢ ژەنارە دریان.  

سزای قورسە سەروو ژەنارە مسەپنیۆ.  بە نامێ ناوی ژەناو ئێزدییوە دەنگما میاونمێ بە جیهانی، پەنەوازا سنوورێوە پەی بۆ پاشێلکارییەکاو ئەردۆگانی بنریۆرە. پەنەوازا ئەرەگیرکەراو هەرێمەکەی دادگایێ کریا. حیچ جیاوازیێوە بەینوو ئەردۆگانی و داعشینە نەمەنەن. هەردوویشا هەمان تاوانی کەرا، داوا جە تەماموو ڕێکوزیایەکاو پارێزنای مافوو ئینسانی کەرمێ، خاوەنداری جە ژەناو عەفرینی و هەرێمە ئەرەگیرکریایەکا کەرا. دەس جە کۆشیای ورمەگێرمێ و وەراوەروو زۆرداراوە سەرە مەکۆمنمێرە ".

ئەرەیاونایەکە بە درووشموو "ژەنی، ژیوا، ئازادی"ی و "گەشمەردێ مەمرا" دماییش ئاما.