تاژێ نامێوەش ئاڕاسەو پەڕلەمانو سویسرای کەرد و ئاماژەش بە تەرسەو داعشی کەردە پەی سەرو هەرێمەکەی کە بەهاندای دۆڵەتو تورکی ئەنجام مڎریۆنە و داواش جە پەڕلەمانو سویسرای کەرد دۆڵەتو تورکی و داعشی دادگای بکریا.
تەڤگەرو ئازادی ژەنا ئێزدی (تاژێ) نامێوەشا ئاڕاسەو پەڕلەمانو سویسرای کەرد، کە جە ١٧و کانوونو یوەمینە دانشا بە قڕکەردەو ئێزدییەکارە نیا.
جە نامەکەنە تاژێ کۆمکوژی و فەرمانەکاو سەرو گەلا میزۆپۆتامیایشا ویرئاردەنۆ و ئامان: "باوەڕداری ئێزدی پێسەو پێکئامێوە قەڎیمی خاکو میزۆپۆتامییای بە درێژای تاریخی ٧٤ فەرمانێشا سەرەرە ئامێنێ. فەرمانێ کە وەر چەمو گردو جەهانی ئەنجامدریا، فەرمانەو ٣و ئابی ٢٠١٤ بیی کە بە شێوێ دڕندانە سەرو گلێرگەو ئێزدی ئەنجامدریا. ئا دڕندایەتیەو داعشی دژو گلێرگەو ئێزدی ئەنجامشدا نموونەش کەما جە تاریخەنە."
هەنگامێوە ئەرێنیەنە
جە نامەکەنە ئاماژە پانەیە کریان ئی هەنگامەو پەڕلەمانو سویسرای بە ئشناسای و دانپۆرەنییای جینۆسایدو ئێزدییەکا هەنگامێوە ئەرێنییەنە و داواکریێنە جە پەڕلەمانو سویسرای ئەرکو وێش جابەجێکەرۆنە جە ئەرەگیری دۆلەتو تورکی-پەدەکە-داعشی و ئامان: " دۆڵەتو تورکی بە پەشتگیرکەردەی داعشی و پارتو دیموکراتو کوردەسانیچ (پەدەکە) بە ورەتەو خاکو شەنگالی و خیانەتەکاش بیی بە تاوانبارو جینۆسایدی. دە ساڵێ سەرو جینۆسایدەکەینە ویەرۆنە، هەڵای داعش و تاوانبارێ کە ئی جینۆسایدەشا ئەنجام دا، جە دادگێوە مییانەتەوەیینە دادگایی نەکریێنێ. ئینەچ بۆ بەمەڵامەتو ئانەی جارێوە تەر داعش وێش زینە کەرۆوە، زینەبییەیۆ داعشی تەرسەو فەرمانەو تازێ جنی وێش مارۆ."
دۆڵەتو تورکی مەڵامەتو زینەبییەیۆ داعشین
دێژەو نامەکەینە ئاماژە پانەیە دریان جە ئیسەنە جنین شانێ شاریێوە داعشی جە عێراق و سووریانە هەنێ، وە جەختکریانۆ چانەیە دۆڵەتو تورکی بە درێژایی هرووژمە ئەرەگیرییەکا مەڵامەتو زینەبییەیۆ و پاڵپەشتیکەردەی داعشی و گرووپەکا تەری کە تاوانەو جەنگی ئەنجام مرانە. جە نامەکەنە تاوانە جەنگییەکێ دۆڵەتو تورکی سەرو سووریای و وەرنیشتوو کوردەسانی باسکریان و بە درێژەپنەدەرو عەقڵێتو ئەرەگیری داعشی نریانەرە جە دژو گلێرگەی و ژەنا.
بەردەوامیینە ئاماژە پانەیە کریان جا یاگانە دۆڵەتو تورکی ئەرەگیرش کەردێنێ جە دژو گەلا جینۆساید ئەنجام دریۆنە.
تاوانبارا قڕکەردەی دادگای بکریا
جە دما دمایی نامەکەینە تاژێ داواش جە پەڕلەمانو سویسرای کەردەن پەی ڕاگیری کەردەی جە زینەبییەیۆ داعشی و دمای ئاردەی بە قڕکاریەکا پەنەوازا چەتەکا داعشی و هامکارەکێ پەدەکەی و دۆڵەتو تورکی جە دادگای کەردەیۍ مییاننەتەوەیینە دادگای بکریا و ئامان: "پەی ڕاگیری کەردەی جە کۆمکوژی و فەرمانێ تازێ مشۆم ڕاگیری جە ئەرەگیرییەکا دۆڵەتو تورکی بکریۆنە."
