تەڤگەرو ئازادی سەرکەوتەیەکاو دەم پارتی-یش مەبارەکێ کەردێ
دەسەو ڕاوەبەریی تەڤگەرو ئازادیی کوردستانی پێوەس بە سەرکەوتەیەکاو دەم پارتی ورچنیەیە وێمانەکانە مەبارەکباییش کەرد و واتش: " ئا وەختە گەل مبۆ بە یۆ و وێش ڕێک وزۆ، بێگومان سەرکەوتەی مسۆگەر مبۆ."
دەسەو ڕاوەبەری تەڤگەرو ئازادیی کوردستانی پێوەس بە سەرکەوتەیەکاو دەم پارتییوە ورچنیەیە وێمانەکاو سەرنیشتو کوردستانی و تورکیاینە پەیامێو مەبارەکباییش وەڵا کەردۆ.
پەیامەکەنە ئامن: "سەرکەوتەی ئیرادەیی ئاشتییانە و دیموکراتیکو گەلەکەیما سەرنیشتو کوردستانینە مەبارەک بۆ، سەرکەوتەی دەم پارتی ورچنیەیەکاو ٣١ ئادارینە سەرنیشتو کوردستانینە و تورکیانە جە تەماموو گەلو خەباتکەری و کاندیدە سەرکەوتەکا پڕۆسەی دیموکراتیکی مەبارەک مکەرمێ.
دەرنجامەکاو ورچنیەی پەی گەلو کوردی تەنیا پەی دەسکەوتەی خزمەتگوزاری و ڕاوەبەری نییەنێ، بەڵکوم هەمان وەختنە سەرکەوتەێوی گەورەی سیاسینێ، کە بییەن بایسو ماڕای ڕۆحی نەتەوەپەرەسی و فاشیزمی.
ڕاسیینە ئی سەرکەوتەیەو گەلو کوردی، تەمامکەرو کۆشیای گەریلای و خەباتی ھامبەشو گەلی و ئازادییوازان پەی ئازادیی جەسەیی ڕابەر ئاپۆی، ئەوەڵ و ھەنگامێوی گەورێنە پەی سەرکەوتەی جمیەری ئازادییوازانەو گەلو کوردی، چی قۆناغەنە.
مشۆم گەلەکەما پانیشتو کوردستانینە، چی سەرکەوتەیە ئەزموون و ھێز ورگێرۆ، باوڕش بە ئیرادە و ھێزو وێش بۆ پەی سەرکەوتەی ملو داگیرکاری و دەسەڵاتداری وابەسەتەی و بەرژەوەندیوازیرە، ئەگەر گەل یۆ بۆ بێت و وێش ڕێک بوزۆ، گومانش نیا چەنە سەرکەوتەی مسۆگەر مبۆ."
