حافز ئەحمەد تورهالی باسش چانەی کەرد کە دەرفەتە تاریخیەکەو وەرنیشتی مشۆم بە یۆبییەی گەلو کوردی تاجدار بکریۆ و واتش، "ئانە وەرپرسیاریەتیێ موبارەکا کە گەشمەرڏێ و گەلەکەما بە ئێمەشا دان".
سەرۆکو گردی جمیەرو زانایا ئیسلامی کوردەسانی سەردەمی و هامچەرخی حافز ئەحمەد تورهالی ئانەش وست ڕووە کە جە دژو هرووژمە ئەرەگیرییەکا پەی سەرو دەسکەوتەکا گەلو کوردی پەنەوازیش بە پێکئاردەو یۆبیەی هەن.
تورهالی جە قسەکاشەنە پەی ئاژانسو هەواڵو فوراتی یاڏش وستیمێ، کە گەلو کوردی ١٠٠ ساڵێن بێ شناسنامە و بێ ستاتۆکریان، چی سەردەمەنە قوربانی فرەشدان و واتش، "سەدامی ستەمکار وڕا، بەشار ئەسەد وڕا. ئینە یاساو خوداین کە نمەفاڕیۆنە؛ ستەم تاسەر بەردەوام نمەبۆ. خوڏاوەن فەرماوۆنە، 'شمە ویندێ کە ستەمکارێ چنین وڕا'. با قسێ یاڏما مارۆوە کە ئا مرۆڤێ جە وەراوەرو ستەمینە وێڕاگری کەرا، چنین سەرێگنا".
تورهالی ئانەیچش وست ڕووە کە جە سەڏ ساڵو ویەردەینە جوانا کوردی و گەلو کوردی تا مەردەی وێڕاگیریشا کەردەن و سەرەشا نەنامنانەرە. مەردەی، ئەشکەنجە جاریشا کریان، بەڵام سەرەشا پەی دوژمنی نەنامنانەرە. جارۆیسەنە ئا دۆخەی جە وەرنیستەنە ئامان ئاراوە، وەرپرسیارەتی وسۆ ئەستۆما، کە وێڕاگیری بکەرمێو سەرو رێچکەو سەڏان هەزار گەشمەرڏێ هەنگامێ بنییەیمێ".
باسش چانەیش کەرد ئەر گەلو کوردی جە عێراق و سوریانە ستراتیژێوە نەتەوەیی ساز نەکەرا، دەستکەوتەکێشا گنا چێرو تەرسێ و جەختش کەردۆ، کە جە ڕاو پێکئاردەو یۆبییەی ئا دەرفەتە تاریخیێ ئامێنێ ئاراوە پارێزیانە".
حافز ئەحمەد تورهالی جەختش کەردۆ، پارێزناو ئەزمونو وەرنیشتی وەرپرسیارەتی گردیمانە. خوڏاوەند و پێغەمبەریشما بەردەوام هانشا دێنمێ پەی یەکڕیزیی و یۆگێرتەی و ئا ڕێشا نیشانەدێنمێ. ئەر هێزەکێما تووشو پەرت بییەی وپەرش و بڵاوی بانە، ئەر نەتاومێنە یۆبییەی وێما ساز کەرمێنە، ئا دەرفەتێ وەردەمیما فاریا پەی تەرسێ گۆرێ.
بڕوادارێ، رۆشنویرێ، وڵاتپارێزێ، مرۆڤە خاوەن ویژدانەکێ مشۆم چی قۆناغە هەستیارەنە ئەرکو وێشا بە یاگێ یاونا و پەی یەکڕیزی وەرپرسیارانە مامەڵە بکەرانە.
پێسەو گەلێ کە دەیان ساڵێن وەرەو ڕوو کۆمکوژی، دور وستەیۆ، زینان و نادادی بیمێوە، مشۆم ئیتر یۆگێرمێنە، یۆبییەیما قەوەت کەرمێنە. مرۆڤە بڕوادارە سوونەکێ، عەلەویەکێ، ئێزدی، ئاشوری، نوێنەرا گردوو باوەڕییەکا جە کوردەسانەنە مشۆم سەرمەشقایەتی پەی ئا داواکارییەو یۆبیەی گەلی بکەرا. پەی پارێزگاری جە بەهاکا گەلەکەیما، ئەر ئێمە یۆبییەی وێما ساز نەکەرمێ ١٠٠ ساڵێ تەر ناچارێ بیمێ کە ئا دۆخەی پەی رۆڵەکاما گێڵنمێ. مشۆم خاوەنداری چی دەرفەتە تاریخیێ کەرمێ و سەرمەشقایەتش بکەرمێ. یۆبییەی گەلەکەیما ئایندەما بنیاد منیۆ و ڕاو ئازادیما کەرۆوە. مشۆم ئا دەرفەتێ بەکاربێنە. ئینەیچ وەرپرسیارەتی هامبەشو گرد لایێن".
