مامۆسایا ژەنۍ ئەرەیاۋناشا: "گەشمەرڎەکەردەی ژەنا ڕۆنامەنوویسی کە تفەنگەکەشا قەڵەم و زیهنیەتشانە، فرە بە ڕۆشنی ئانەما پنە ماچۆ کە دەورو ژەنا چن کاریگەرا و قەوەتا، بیەن بە مەڵامەتوو تەرسەو دژمنا کورڎی."
دماو ئانەی جە ٢٣ۍ ئابو ٢٠٢٤ینە، جە سنورو قەزاو سەیسایەقی سەر بە پارێزگاو سلێمانی، دەوڵەتو ئەرەگیرو تورکی بە چەمساغی هێڵۊو خیانەتی، جە ڕاو فڕۆکەی بێ فڕۆکەوانیوە، ترۆمبێلێوە کەناڵو ستێرکیش بە ئامانج گێرت و چنەشەنە هەرڎووە ڕۆنامەنوویسۍ؛ هێرۆ بەهادین و گوڵستان تارا گەشمەرڎۍ بیۍ. جە ۋەرا ۋەرو ئا هرووژمەینە ناڕەزایی جە لایەنو گەلیوە و گرڎوو چین و توێژەکاوە نیشانە دریا، چا بارۆ هەریۆ جە مامۆسایا؛ ڕۆشنا محەمەدە و شەیما جەمال پەی ئاژانسوو هەواڵوو فوراتی (ANF)ی قسێشا کەردۍ.
' دەورو ژەنا بیەن بە مەڵامەتو تەرسەو دژمنا کورڎی '
مامۆسا ڕۆشنا محەمەڎە جە سەرەتاو قسەکاشەنە هامخەمی ۋێش بەربڕی پەی بنەیانەو هەر دووە ژەنە گەشمەرڎۍ ڕۆنامەوانۍ ئازاڎیی، واتش: "سەرو دەسو تورکیای و چەمسەغەکاش دووۍ ڕۆنامەنوویسۍ، جە سەیسایەقەنە گەشمەرڎۍ مکریا. تیرۆکەردەی ڕۆنامەنوویسا، تەنیا تیرۆرکەردەی دووۍ ژەنە ڕۆنامەنوویسی نییا، بەڵکم تیرۆکەردەی تاکو کوردین، ئەگەر ئێمە بە وردی ئەوەکۆڵیای بکەرمۍ ئانەی موینمۍ کە ئینە تیرۆرکەردەی گەلوو کوردین.
گەشمەرڎە کەرڎەی ژەنا ڕۆنامەنوویسی کە تفەنگەکەشا قەڵەم و زیهنیەتشانە، فرە بە ڕۆشنی ئانەما پنە ماچۆ کە دەورو ژەنا چن کاریگەرا و قەوەتا، بیەن بە مەڵامەتوو تەرسەو دژمنا کورڎی."
جە دمادمایی قسەکاشەنە مامۆسا ڕۆشنا ئاماژەش پانەیە کەرد کە مشۆم گەل هەڵوێس و ناڕەزایەتی نیشانە بڎۆ جە دژوو تیرۆکەردەی ڕۆنامەنوویسا ئازاڎیی و واتش: "پەنەوازا جە هەر چوار پارچەو کوڕڎەسانینە دەنگما دژو ئی ئەرەگیریە هۆربڕمۍ و جە ۋەرا ۋەرو ئی ئەرەگیریەینە مردمێوە بەتایبەتی جە ۋەرا ۋەرو تیرۆرکەردەی ئی دووە قەڵەمە ئازاڎەینە.
دواکارەنا ژەنی جە خەباتی مەدەنی و زیهنی نزیکۍ باوە و بێدەنگیما بیەن بە مەڵامەتوو گەشمەرڎەبیەی ژەنا کۊششکاری و ئازاڎیی. هوشیاربیەیۆ ژەنا هۆشیاری گلێرگەین."
' پەنەوازا ۋێنیشاندای بکریۆ پەی ئانەی جارێوەتەر هیچ ڕۆنامەنوویسێوە تەر نەبۆ بە قوربانی'
لاو ۋێشۆ شەیما جەمال-ە جە قسەکاشەنە ئیڎانەو تیرۆرکەردەی هەر دووە ژەنە ڕۆنامەنوویسی گەشمەرڎەیش کەرد و واتش: "دماو تیرۆرکەردەی هەر دووە ڕۆنامەنووسا ژەنۍ، تەماموو گلێرگەی خەمبارێنۍ و پنەشا ناوەشا کە ئی تاوانۍ ڕووەشدان، سەرەڕاو ئانەیچ بێدەنگێنمۍ ئینەیچ پەی ئانەی مگێڵۆوە کە ئیمە پېسە تاکی چێشما پنە مکریۆ؟
جە ئاژۍ چامنەنە مشۆم ئێمەی ژەنا و گرڎوو ڕۆنامەنوویسا یەک دەنگۍ بیمۍ پەی ئانەی ڕووبەڕوو ئی تاوانا بیمێوە. پەنەوازا ۋێنیشاندای و بەیاننامۍ بەربکریا پەی ئانەی جارێوەتەر هیچ ڕۆنامەنوویسێوە ژەنی نەبۆ بە قوربانی جە هەرێموو کورڎەسانینە."
