ڤەژین ئاراراتە واڵۍ و هەمڕۍ ڕۆنامەنوویس عەگید ڕۆژی، جە کەشەکا کوردەسانیوە نامێوەش پەی بنەیانەکەیش و گەلی وڵاتپارێزنو کوردەسانی کیاست.

جە نامەکەو ڤەژین ئاراراتێنە ئامان:

"ئێمە ئارۆ جارێوەتەر شایەتۍ ڕاییکەردەی عەگیدێوە وڵاتەکەیمانمۍ. شەهادەتو هەڤاڵاما پەی ئێمە یاگۍ فەخرو سەربەرزیا، هەرپاسە نیشانۍ دۆزی رەواو گەلەکەیما و قەول و پەیمانێوەن پەی پاگیریکەردەی سەرو ژیۋایۍ ئازادی."

پەی بنەیانەی قارەمان و گەلی وڵاتپارێزنیما؛ سەرەتا سەرەو ئەڎێم، تاتەیم، واڵە و براکام، گرڎو گەلەکەیما و جەنگەوانا ئەرەیاۋنای ئازادی، سڵامەت بۆ. گەشمەرڎەبیەو هەڤاڵ و براو من عەگیدی پېسە شمە کاریگەری فرەیچش سەرو منۆ جیائاست. ئی گەشمەرڎەبیەیە خەمبارێش کەردیمۍ. هەرپاسە ئڼەو ئی خەمباریە جە زېڵۍ ئێمەنە هێز و توڕەیێوە گۊرەش وەشکەرڎ. حەقیقەتو شەهادەتی کە ئارۆ جە کەسایەتیی هەڤاڵ و براو من عەگیدینە ۋێش نیشانەدان، جارێوەتەر یاڎوو گردیماش ئارڎۆ کە مشۊم پەی چێشی دژو دژمناما ئەوەکۊشای بکەرمۍ. پی مەعنۍ گەشمەرڎەبیەو قارەمانی گۊرەما عەگیدی پەی ئێمە مایۍ هێز و مڎرامانینە. پۊکەی مشۊم کەس نەواچۆ عەگید مەردەن. هەتا مڎرامان گۊرەتەر و سەختتەر بۆ ئانە عەگید و یادەوەرییەکێشەنە کە چنیما مژیوا، پۊکەی ماچمۍ گەشمەرڎە نمەمرۆ."

پەنەوازا گرڎما بە گەشمەرڎەبیەو عەگیدی سەربەرزۍ بیمۍ

بنەیانەی قارەمانم؛ پەنەوازا گردیما بە گەشمەردەبیەو عەگیدی سەربەرزۍ بیمۍ. چونکی جە ڕێوە پیرۆز و شکۆمەندەنە گەشمەرڎەبیەن. کەواتە مزاندۍ کە عەگید هێماو کەسایەتی شکۆمەندو کوردینە و متاومۍ تا دما نەفەس فەخر بە کار و کۊششیشۊ بکەرمۍ. حەرچڼە چی کاتەنە فرە خەمبارێنمۍ، بەڵام کاتێ وڵاتەکەما و عەفرینما چېرو دەسا دژمنینە ڕزگار کەرد، ئا کاتە فرە وەش کەیفۍ بیمۍ. چونکی وەرمو خیاڵو عەگیدیما عەفرینێوە ئازاڎ کریابۍ، من پېسە واڵۍ و هەڤاڵێش جە ئەوەکۊشاینە، قەول مڎەو حەتا دما نەفەس جە دووو وەرمو خیاڵەکەیشەنە بەردەوامی بە ئەوەکۊشای بڎەو.

بە بەردەوامیدای بە ڕێبازو عەگیدی، گرڎو گەشمەرڎا ڕاو فەلسەفەو ژیۋای ئازادی بە ڕێزدارییو یاڎۍ مارووە. ئێمە پەی وڵاتەکەیما گرڎ چێوۍ ۋێما بەخشان، جە هەر کاتێنە کە پەنەواز بۆ، ئاماڎێنمۍ گیانو ۋێما بەخشمۍ. بەڵام بە دڵنیاییوە وەرمو عەگیدی و هەزاران عەگیدۍ تەرۍ وڵاتەکەیما بەدی مارمۍ. ئێمە نەک هەر عەفرینێوە ئازاڎ، ئامەدێ ئازاڎ، هەولێرێوە ئازاڎ و مەهابادۍ ئازاڎ و کوردەسانێوە ئازاڎ پێشکەش بە گەشمەرڎاما مکەرمۍ. گەشمەرڎەبیەو عەگیدی قارەمانی، ڕۊشنایی ڕێمانە. پۊکەی مشۊم شمەیچ هێز چی شەهادەتەیە هۊرگێردۍ. هەرپاسە ئانەی بزاندۍ کە بەهەزاران عەگیدۍ جە عەفرین، تشرین و گرڎو وڵاتینە سەرو ڕێبازو عەگیدی درێژە بە ئەوەکۊشای مڎا. بە دڵنیاییوە حەقەو عەگیدی قارەمانیما مکەرمێوە. گەشمەرڎە نمەمرۆ.