وانای هەورامی پەی زارۆڵاو هەورامانی مافێوە سرووشتی زوانەوانی و ئەخلاقییا
د. مۆمن زەڵمی پسپۆڕوو بواروو سیاسەتوو زوانی و پەروەردەی، ئەرەیاوناش وانای هەورامی پەی زارۆلا، مافێ زوانەوانی و هەنگامێوە عەمەلییەنە پەی سەروستەی سیاسەتوو زوانی کوردی
میانەو یەرەمین دیداروو ئەدەبی هەورامینە، کە هەڵەبجەی شەهیدنە ساز کریا، ئەوەکۆڵیایێوە هامچەرخنە د.مۆمن زەڵمی پسپۆڕوو بواروو سیاسەتوو زوانی و پەروەردەی ئەرەیاوناش، وانای هەورامی پەی زارۆلا، مافێ زوانەوانی و هەنگامێوە عەمەلییەنە پەی سەروستەی سیاسەتوو زوانی کوردی، حەرپاسە وانای زوانوو ئەدێ دایک دایمە بایەخێوە یەکجار گەورەش هەن جە سیاسەتی زوانەوانی و سیاسەتوو خێزانیی زوانەوانینە، کاریگەریی ڕاستەوخۆش هەن سەروو گڕوگالێ و قسەکەردەی و یاوایپەنەی و ئەنەیاوای زارۆڵەینە و هەرپاسە فرەتەرینوو ئەوەکۆڵیایە تازەکا ئەنەیە بەروازا کە زاڕۆ نەوانەیش بە زوانوو ئەدێش کاریگەریی کەرۆ سەروو تواناو پەنەیاوای زیرەکیی هەقەتینیش کە دمارۆنە یەک ڕاس پۆشۆ دیارا.
دکتۆرە زەڵمییەکە نەشارتشۆ کە بۆنەو سیاسەتە شپرزەکاو زوانیوە پانیشتنە زوانی کوردی خەریکا کەوتەن پەشتەو کەنۆڵاو ئیسەنە گرنگیی فرەتەر بە زوانی ئینگلیزی و تورکی و عەردەبی و فارسی دریۆ و دماتەریچ سۆرانی و ئینجا فرە بە ناڕەحەت هەورامی، حەرپاسە ئانەشە بەروست کە ئیسەنە یاگێ پێسە پاریزگاو سلیمانینە ٦٠٠ مەکتەبێ بە غەیروو زوانی کوردیوە ونیاو ئینەیچە بێ پلانی وشپرزیی سیاسەتوو زوانین لاو دەسەلاتوو پانیشتیوە.
بارەو وەنایۆ بە زوانی هەورامی پەی هەورامییەکاو هەڵەبجەی ئانەشە ئەوەخوای کەردۆ، کە هەنگامەکێ نریێنێ و ئەوەکۆڵیای ورد کریان و وەلێ هەنگامەکێ خاوێنێ و شێنەی ملا وەرۆ، هەنگامەکێ ئوەڵ بارنە وانای ئەلفبێن و بڕێ پەرسێ ئەوەڵیێنێ پۆلەکاو سەرەتاو وانینە و ئینە حیچ بە ماناو جیاکاری و تێکدای زوانی کوردی نییەنە بەڵکوم مافێوە سروسستی وێبییەی و ئەخلاقی و سیاسیی زارۆلاو هەورامانین. مۆمن زەڵمی جە جوابوو ئا پەرسێنە کە ئایا وانای هەورامی سیاسەتوو " پژگنە و زاڵ بە" و دوژمناو کوردی نیا واتش: پەنەم سەیرا وانای بە زوانوو ئەدێ کە مافێ سرووشتی و خوایین ئی قۆرتێ وزیا وەروو دەمیش و پێسە بوچیۆ، ئێمەی هەورامی وێما بە ساعیبی هەرەقەتینوو کوردی مزانمێ و وەڵات و ئاو و خاکما وەشما مسیۆ و ئی داوێما ئینا چوارچەمەو وەشەسیای وەڵاتینە و بە نۆعێ جە وەڵاتپارێزنی و گرنگیدایش مزانمێ بە چاندەکەیما.
بارەو هەنگامە زانستی و پەروەردەییەکانە کۆڵیارەکە ئانەش وست ڕووە هەنگامەکێ دۆخی زانستیی زوانی هەورامییش وەرەچەم گێرتەن و سەروو بنەماو چەمداریی زانستیی زوانەوانا و ئەکادیمی و نویسەراو هەورامانی ملۆ ڕاوە و چەمداریێ ورد کریۆ و جە ڕووەو پەروەردەییچۆ چاندی ڕەسەنوو هەورامانی کتێبەکانە وەرەجەم گیریان ئا ڕسمێ و کێڵێ و شێعرێ و واتە هەورامیێ ورێ چنیێنێ کە جە ڕووەو دەروونییوە چەنی زاڕۆو ئا قۆناغەیە گۆنجیا و هەستی ئینسانی و کوردانەو ژیوگەدۆسی و ئینساندۆسییش دلێنە چەقنا و وەش کەرا.
