"عومەر ئۊجالان" پەرلەمانتاروو ڕحاو هەدەپەی و کاندیدوو ئیسەو پارتوو چەپی سەوزی پەی پەرلەمانی، پەی ئاژانسوو هەواڵوو فورات (ANF)ی قسێش کەرڎە و واتش: فرەو ئشناسنامەکا و گرووپە ئاینییەکا و هەمەنۊعەکا دلۍ پارتوو چەپی سەوزینە کوۍ بیێنێوە. "عومەر ئۊجالان" واتیچش، سەروو بنەماو ڕوانگەو یۊگێرتەی هەمەنۊعەی، وێشا پەی ورچنیەی ئامادە کەرا.

عومەر ئۊجالان واتش، "قەناعەتم چانەن ئێمە پەی چارەسەرکەرڎەی دیموکراسییانەو مشکیلەو کوردی، پەی چارەسەرکەرڎەی مشکیلەو باوەڕەکا و پێکئاما ئاینییەکا، پەی چارەسەرکەرڎەی دەیان قۊرتا وەڵاتەکەی دەورێوە یەکلاییکەرەوە جە پەرلەماننە وینمۍ. پارتوو چەپی سەوزی و سیاسەتوو ڕای یەرەمۍ یەکلاییکەرەوەن."

'مەبۊ پەی هەردووە بلۊکەکا جیا بازیۊ'

"عومەر ئۊجالان" واتش، ئادۍ ئینۍ پڕۊسێوە فرە هەستیارنە، کە مەتاویۊ پەی هەردووە بلۊکەکا جیا بازیۊ و واتش، "ئی وەڵاتە قۊرتە گەورا یەخۍ گیرتەن، پەوکای بەینوو هەردووە بلۊکەکانە سنوورڎار مەبۊ. ئێمە ڕای یەرەمەما هەنە و سیاسەتوو وێما قووڵتەر کەرمێوە. سەروو بنەماو بەها دیموکراسییە بنەڕەتییەکا پەی کۊکەرڎەیۊ گرڎ کەسی ئانەی قودرەتما بۊ کەرمێش. چۍ کادێرۍ فرە بەتوانۍ و فرە وەرفراوانۍ و گەلێوە فرە فرەڕەنگ هەن. ئێمە بە دیایۍ گەورە و کریاوەوە تەماشەو وەڵۍ کەرمۍ. پەی ئانەی کە کۊمار جە سەدەی دووەمنە چەنی دیموکراسی یۊی گێرا، چەنی دیموکراسی ئاشتۍ باوە، پەی ئانەی کورڎەکۍ بابە دارۍ ئشناسنامەو وێشا، بتاوا بە زوانی ئەدایی وێشا بوانا و پەروەردۍ کریا و فرەو قۊرتەکاشا نەمەنا، ئێمە هاگادارۍ دەوروو وێمانمۍ. ئێمە ئی پایۍ وێما وێما وەشەش کەرمۍ و هەرمانەکاما جە بەرزتەرین ئاستەنە بەرمۍ ڕاوە".

س.ز