سەربارو گردو فشار و فرتوفێڵ و ساختەکارییەکاو دەسەڵاتی، بەڵام کوردسانیێ بە گوڕ و تین بەشداریی دەنگدای مکەرا، بەتایبەتی پیرێ و نەوەشێ بە هامکاریی کەسوکاریشا ،ملا سەرو سنڎۆقەکاو دەنگدای.
پڕۆسەو دەنگدای ورچنیەیە وێمانەکا سەرنیشتو کورڎسانینە و تورکیانە، کە سەعات ٧:٠٠ بەیانیوە دەسش پەنە کەردەن بەردەواما.
کوردسانیێ پەی بۆ داکۆکیکەردەی جە ئیرادەو وێشا پۆل پۆل بەرەو بنکەکاو دەنگدا ملانێ و چندین دیمەنێ وەڵێ کریێنیوە، کە کەسێ پیرێ و نەوەشێ بە هامکاریی کەسوکاریشا بەشداریشا دەنگداینە کەردەن.
وەرپەرساو دەم پارتی جەخت مکەرانێوە، کە بە بەشداریێوی وەرەچەمو دەنگدەرا متاوا سەرجەمو پیلان و ساختەکارییەکاو ئاکەپەی ماڕانێ و سەرکەوتەی گەورە مسۆگەر بکەرا.
ئاکەپە وەڵێ ورچنیەیۆ ڕاو فاڕایۆ تۆمارو دەنگدەراوە ژمارێوی فرە جە لایەنگێراش و هەرپاسە پۆلیس و سەروازاوە شارەکاو تورکیایۆ پەی شارەکاو کورڎسانی هەوڵێش دێ ئەنجامەکا جە بەرژەوەندیی وێشنە ساختە بکەرۆ، ئارۆیچ چەنی دەسپەنەکەردەی پڕۆسەو دەنگدای ڕاو سانای دەنگاوە، نیایۆ پشێوی وێستگەکانە، دەنگدای بەکۆمەڵ و چند شێوێوی تەر هەوڵێ مدۆ پڕۆسەکەی بەرژەوەندیی وێشنە ماڕۆوە.
فرەو وێستگەکانە جەماوەر بە شێوەی جیاجیا ناڕەزایەتییش وەراوەرو هەوڵەکاو دەسەڵاتو ئاکەپەی پەی ساختەکاری نیشانە مدانێ. بنکێوی شارو شڕنەخینە بە واتەی "دزی دەنگداینە مکریۆ" هاموەڵاتێ ناڕەزایەتیشا وەراوەرو گزییەکاو ئاکەپەی نیشانە مدانێ.
هاموەڵاتێ کوردێ ڕاو بەشداری دەنگدای و دەم پارتییچ ڕاو چەمدارا و نوێنەراو سەرو سنڎۆقو دەنگدایۆ هەوڵێ مدانێ ئا هەڵمەتە ساختەکارییاو ئاکەپەی دەسەڵاتداری پووچەڵێ بکەراوە.
وەرپەرسێ، پەرلەمانتارێ، کاندیدێ و نوێنەراو دەم پارتی جگە جە چڕیەی هاموەڵاتا پەی بەشداریی کارای دەنگداینە، هاموەخت داوایچ مکەرانێ گردوو لایەنەکا چەمکریاوێ با پەی پارێزنای و خاوەنداریی جە سنڎۆقەکاو دەنگدای و ڕاگێری جە ساختەکاری.
وەختو لوایگژێرە و هەوڵدای کاندیدو هامسەرۆکایەتیی گەورەشارو مێردینینە پەی ڕاگێری جە ساختەکاریی ئاکەپەییەکا، پۆلیسەکێ بە گازی هەڵسمج هجوومشا کەرد سەر. بەڵام ئا کاندیدەو دەم پارتی خەسەخانەنە واتش، "ئامانجو هجوومکەرا ئانەن کە کێشناماوە، بەڵام هەرگیز ئانە ڕووە نمەدۆ"، جەختیچش کەردۆ تا سەرنەگنا واز نمارا.
جە دەنگدای ورچنیەیە وێمانەکاو سەرنیشتو کورڎسانی و تورکیاینە ٦١ ملوێن کەسێ مافو دەنگدایشا هەن و نزیکەو ٢٠٨ هەزار سنڎۆقێ دەنگدای نریێنێرە.
