درێژەو کاردایوەکاو گەشمەردەکەردەی ڕۆنامەنویسا "گوڵستان تارا و هێرۆ بەهادین"ێنە وەردەموو کەناڵوو BBC ینە لەندەننە ناڕەزایەتی نیشانە دریا و ئیدانەو هجوومەکاو دەوڵەتوو تورکی و بێهەڵوێستیی BBC کریا.
وەردەموو کەناڵوو BBCینە لەندەنوو پایتەختوو بەریتانیاینە، بە دەسوەڵێوزیی ئەنجوومەنوو گەلوو کوردی، تەڤگەروو گەنجە شۆرشگێڵنا و ژەناو جیهانی بەریتانیانە، کوردسانیێ و ڕۆنامەنویساو لەندەنی دژوو هجوومو دەوڵەتی ئەرەگیروو تورکی پەی سەروو سەیارەو کۆمپانیاو چەتری و گەشمەردەبییەی دووێ ڕۆنامەنویسا سەیدسادەقنە، کوێ بیێوە.
بەشدارێ ڕسماو گەشمەردا "گولستان تارا" و "هێرۆ بەهادین"ێشا بەرزێ کەردێوە و درووشموو "BBC دمایی بە بێدەنگیی بارە، مەبە بە بەشیوە جە فاشیزمی"ێشا واتێوە.
کۆبییەیوەکەنە وتاریوە سەروو نامێ کارمەنداو ڕۆنامەگەریی لەندەننە پیشکەش کریا و ئیدانەو هجوومو ئەرەگیراو تورکی و ڕژێمی فاشیستوو ئاکەپە-مەهەپەی پەی سەروو ڕۆنامەنویسا ئەرەیاونای ئازادی کریا.
هەرپاسە جەختیچ کریاوە کە وەعد مدەیمێ وەرمەکاو گولستان تارێ و هێرۆ بەهادینێ پەی ژیوای ئازادی بەزیندەیی بازمێوە.
وتارەکەنە، ڕەخنە وەنەو BBC گیریا، بۆنەو پەشتگۆشوستەی هجوومەکاو دەوڵەتی ئەرەگیروو تورکیوە، کە ڕۆنامەنویسێش کەردێ ئامانج و ئەرەیاونیاشارتەیوە ئی هجوومە نائینسانانەیە دەوڵەتو تورکیای جە خەڵکی و پەشتگۆشوستەیشا، هیچ ئەخلاقێوەنە یاگێ نمەگێرۆ، شەرمەزار بەو فاشیزمی بوینە.
هەمان وەختنە، ئەرجان ئەکبال، وتارێوەنە بە نامێ ئەنجوومەنوو گەلوو کوردیوە تیشکەش وستە سەروو دەوروو خیانەتوو پەدەکەی هجوومەکاو گەلوو کوردینە و واتش:" پەدەکە و بنەیانەو بارزانیی بە هامکارییشا چەنی دەوڵەتی ئەرەگیروو تورکی بەشداریی کۆکوشیی دژوو گەلوو کوردی مکەرا، چێولای هەڵوێستی تندتەرما بۆ و جوابی پەنەوازیچ مدەیمێوە، ئانێ ئی بێئەخلاقییە نمەوینا و بێدەنگێنێ، هامبەشێ ئی تاوانە دژە ئینسانییەینێ.
دماو وتارەکا، بەشداربیێ وەردەموو باڵایانەو BBC ینە ناڕاەزایەتیی ئەرەنیشتەیشا نیشانە دا، درووشموو " گەشمەردێ نمەمرا، نا پەی تیرۆرکەردەی و کوشتەی ڕۆنامەنویسا، دەوڵەتوو تورکی تیرۆریستا"یشا واتۆ و دماو دوێ سەعاتا چالاکییەکە دماییش ئاما.
