١٦و مایسوو ١٩٩٧ هێزەکاو پەدەکەی شاروو هەولێری و دەوروبەریشنە، هجوومێوی پیلانگێڵنانەشا کەرد سەروو نوێنەرایەتیی ڕسمیی پەکەکەی و پەیوەندیەکاش چەنی شار، ناوەندوو یۆبییەی نەتەوەیی دیموکراتوو کوردستان (یەنەدەکە)ی و ڕێکوستەیەکاو دلێ شار و دەوروبەریش، یۆبییەی ئازادی ژەناو کوردستانی (یاژک)، ناوەندوو مانگەی سوورەو کوردستانی (هیڤا سۆرا کورد)ی و گەریلا بریندارەکێ خەسەخانەکەی، ناوەندوو کەلتوری و ڕۆشنویری میزۆپۆتامیای، ناوەندوو ئەرەیاونای و پەخش و وەڵاکەردەیوە ڕۆنامەو وڵاتی، وەتەنن شەمس، گۆڤاروو ڕۆژی، ڕۆنامەو ژیوای ئازادی، وەڵێ ئا بەروارەیچەنە پەلامارەو مامۆستا تاهیر هیرانی کە ئشناسیابێ بە (مامۆستا یاسا)یشا دێبێ شەقڵاوەنە. واوەی دماو ئانەیچە پەلامارەو هامڕا ڕەئووفیشا دا لە ڕاو مەخمور- هەولێرینە، ئەنجام کۆو ئا هجووم و پەلامارە وەحشیگەری و نائینسانانە بەروو گردوو پرەنسیب و پیمانە ئەخلاقی و نەتەوەییەکاوە بە ڕۆو نیمەڕۆی ٨٣ ئەندام و کادیر و خەباتکارێ ژەنێ و پیێ شۆڕشگێڵنێ پەکەکەی بیێ بە قوربانی.

چەنی ئانەیە فرەو ئا کەسا کوردێ بێنی و چوار پارچەو کوردستانیوە ئامێبێنێ، دلێشانە یۆ مەغریبی بێ کە ئامابێ خەبات پەی ئازادیی گەلوو کوردی بکەرۆ. گردوو ئا دامودەزگایا کە ڕووبەڕوو ئا هجوومە دڕندانەیە بیێوە، بە مۆڵەت و ئاگاداری حکومەتووهەرێمی و خودو سەرۆکایەتیی پەدەکەی چابێنی. چەنی ئانەیە گردوو ئا کەسا حیچ زەرەر و هەڕەشێوەشا نەبێ پەی سەروو دەسەڵاتی و پەدەکەی هەولێرنە، خودوو سەرۆکوو پەدەکەی ڕوێ وەڵتەر وەعدش دابێ، کە دەسدرێژی مەکەرا سەروو هیچ دەزگا و بارەگا و کەسێوە، بەڵام دماو کەمتەر جە ٢٤سەعاتا، پەدەکە گردوو چەکە سووک و گرانەکاشا سەر گەریلا بریندارا و چالاکە سیاسییا و ڕۆنامەنویساوە تاقیێ کەردێوە.

پەدەکە چی ئا کردەوە نائینسانانێ، نانەتەوەیی و نائەخلاقیانێشە کەردێ، گەرەکش بێ چێشش دەس گنۆ؟ چەنی ئانەیە پەیوەندیی دەوڵەتوو تورکیای داگیرکەری و پەدەکەی مگێڵۆوە پەی سەرەتاکاو ١٩٧٠، بە کوشتەی و دلێنەبەردەی باڵی شۆڕشگێڵنیی پەدەکە\ تورکیای دەس پنە مکەرۆ. بەڵام دماو ئەرەپڕای و وەشبییەی حکومەتوو هەرێموو کوردستانی بە هامکاریی ئەمریکای ئا پەیوەندییە تازە کریانوە، سەروو بنەماو دلێنەبەردەی جمیەری شۆڕشگێڵنیی کوردی سەرنیشتوو کوردستانینە، پەوکای سەرەمڕپەدەکە هەوڵێش دێنێ چە بە تەنیا و چە بە ڕێککەوتەی چەنی لایەنەکای تەروو پانیشتی، جەنگورەشۆ بەبەردەوام بە پەکەکەی. ٣١و ئابوو ١٩٩٦ لوایباوشەو ڕژێمو بەعسی تاواش هەولێری وزۆوە دەس قۆرغکاریی وێش وەش بکەرۆ. چا جەنگ و ڕەمەڕەمالێ بەینوو پەدەکەی و یەنەکەینە، پەکەکە هیچ وەخت گەرەکش نەبیەن لایەندار بۆ، پێچەوانەوە بێلایەن بییەن، ئانەیچ سەروو بنەماو ئانەیە کە ناکۆکی و ئاڵۆزییەکا قووڵتەرێ نەباوە و بکریۆ ئاڵۆزییەکێ بەکەمتەرین قوربانی چارەسەرێ بانێ. وەهاروو ١٩٩٧ پەیوەندییەکاو پەدەکەی و دەوڵەتوو تورکیای واوەی دیسان پەرەشا پنە دریاوە، ئامادەکاریی کەرێنێ پەی ئۆپەراسیۆنێوی هامبەشی، پەی ئینەیچە سوپاو تورکیای ١٤و مایسوو ١٩٩٧ هجوومەکێش هەرێمەکاو حەفتانین، زاپ، مەتینان و ئاڤەشین دەس پەنە کردێ، پەدەکە لاێوە چا هەرێمانە ڕانمایی پەی سوپاو داگیرکەری کەرێ، دلێ شارەکایچەنە پەلامارەو دامودەزگا و بارەگا و خەڵکی وەڵاتپارێزنوو نزیکوو پەکەکەی کەرێ. بێگومان ئا هجوومێ بە ڕێککەوتەی بێنی چنی سوپاو تورکیای و ئەمریکای، تا هامسەنگیی وەش بکەرۆوە، تا بە تورکیای و ئەمریکای بواچۆ؛ من تەنیا دڵسۆز و سەروازی بەعسی سەرواز و دڵسۆزوو شمەیچنا چێش بواچدێ ئامادەنا بە دڵ و گیان پەی دلێنەبەردەی شۆڕشگێڵنا و ئازادیوازا بکەرووش!!!

پەدەکە پاسەش منیۆرە کە بە خیانەتوو ٣١و ئابی و ١٦و مایسی سەرکەوتەن و بییەن بە هێزی یوەموو هەرێموو کوردستانی!! یانی سەروو لاشەو شۆڕشگێڵنا و وەڵاتپارێزاو کوردستانیوە و بە خزمەت پەی داگیرکەرا دەسەڵاتش تۆکمە کەردەن! مشۆم ئا جۆرە کردەوێ لاو سەرۆکایەتیی پەدەکەی و دارودەسەکەیش بە سیاسەت نامێ نریا، بەڵام لاو فرەو خەڵکوو کوردستانی و شۆڕشگێڵنا و وەڵاتپارێزاناوە بە خیانەت و کەواسوورەیی وەروو لەشکرو داگیرکەرا مزانیۆ. مشۆم ئیساتێ تاوانباراو ئەو جنایەتە دژە ئینسانییە ئازادانە بسووڕیاوە و بە پاڵەوان بدانێ قەڵەم، بەڵام با بزانا نە تارێخ و نە خەڵکوو کوردستانی و شۆڕشگێڵنێ و وەڵاتپارێزنێ و ئازادیوازاێ هیچ وەخت و سەردەمێوەنە چەنەشا وەشێ مەبا. مشۆم ڕوێ بگنانێ وەردەموو دادگاو گەلی و مافوو کۆکوشیی ١٦و مایسی و سەرجەموو مافوو ئا خەڵکە هەژار و بێدەرتانانەیشا چەنە بسنیۆ، کە بە درێژایی عومریشا بە نامێ جیاجیێوە کەردەنشا.

٢٧ ساڵێ ویەردەن سەروو ئا کردەوە دژەئینسانیەیەرە، هەڵای پێشەوپەڵانوو ئا کەسا دیار نییا و بە بنەیانەکایچشا نەواتەن قەبرەشا چکۆوەنە، بە هیچ شێوێویچ ئامادێ نییەنێ، کە شۆنەو قەبرەو ئا قوربانییا ئاشکرا بکەرا.

ئارۆ پەدەکە دۆخش جە گردوو ڕوەکاو وەڵێش خراپتەرا، دیسان بەکرێگیریایی پەی داگیرکەری و دوژمنوو گەلوو کوردی دەوڵەتوو تورکیای تازە مکەرۆوە، تەرسنۆکترین هێزا پرسەو ئازادی و دیموکراتی و مافوو ئینسانینە، پرۆسەو ورچنیەیش پەکە وستەن و ڕۆنامەنویسێش وستێنێ کونجوو زیندانی، سەروەت و سامانوو خەڵکیشا تاڵان کەردەن و ئەمریکا و ئەوروپا دانشا بە ڤێلێ و کۆشکێ و تەلارێ. نەک نزیک نمەبۆوە جە یۆبییەی و یەکڕیزیی دلێ یانەو کوردی، بەڵکو پێسەو پیشەی بەردەوامیش پارچەکەردەی و جەیۆیترازنای و ڕەمنای ئازادیواز و وەڵاتپارێزناش کەردەن هەرمانەش. کورد زووۆن واتەنش پەتەو خیانەتی و بەکرێگیریایی کوڵەنە، مشۆم بڕێ بواچا، ئانە کە پەدەکەش درێژ کەردەن تاکەی وەرگەو ئا گردوو تاواناو پەدەکەیە بگێرمێ، بێگومان ئانەیچە پێوەسا بە زیاتەر خەبات و کۆشیای ژەنا و گەنجا و چینە جیاوازەکاو گلێرگەیوە، جە خەتەو شۆڕشگێڵنی و نەتەوەیی و دیموکراتیینە، کە دماییش بە خەتەو خیانەتی و بەکرێگیریای مارۆ کوردستانەنە.