چوارچوەی هەڵمەتەو "ئازاڎیی پەی عەبدوڵا ئۆجالانی، چارەسەری سیاسی پەی پەرسەو کوردی" ئێشکگێریی داڎپەروەری بنەیانەو گەشمەردا ئامەدنە و واننە و مێرسیننە و ئەڎەنەنە و ئیستەنبوڵنە و ئەزمیرنە و مێردیننە بەردەواما.

چالاکییەکەو ئەڎەنەینە، هاموەڵاتێوە بەنامێ بەدری شەنگولی، ئاماژەش پانەیە کەرد، تا ئاشتی و داڎپەروەری بێ وەڵاتۆ، پەنەوازا گۆشەگیری نەمەنۆ و ڕابەروو گەلوو کوردی عەبدوڵا ئۆجالان ئازاڎ کریۆ.

چالاکییەکەو مێرسینینە، پەرلەمانتاروو دەم پارتی مێرسینی پەریهان کۆچ ئاماژەش پانەیە کەرد، مدرامانوو ئەڎێ دژوو سیستمی فاشیست و سیاسەتی فاشیستی بەردەواما. ئەوەخوایش کەردۆ خاوەندارێتی وەنەو چالاکییەکا کەرا.

چالاکییەکەو ئیستەنبوڵینە سەرۆکوو لقوو ئیستەنبوڵوو کۆمەڵەو مافەکاو ئینسانی گوڵسەرەن یولاری ئاماژەش کەرد، کە ئەشکەنجە هەم بەپاو یاساکاو تورکیای و هەم بەپاو یاسا میاننەتەوەییەکا قەدەغەن، وەلێ جە زیندانەکاو تورکیاینە ئەشکەنجە و گۆشەگیری هەن، گۆشەگیری ئینا ئیمراڵیینە، ئەوەخوایش کەردۆ دەوڵەت وەنەو زیندانییەکا تەرسۆ، کۆشیای زیندانییەکا کۆشیای ئێمەیچا.

چالاکییەکەو وانی ٣٨ ڕوێن بەردەواما، فرەو لایەنەکا و هاموەڵاتا ئامادێ بێنێ و درووشمەکاو "ژەنی، ژیوای، ئازاڎی"ی و "بژیوۆ مدرامانوو زیندان"ی و "بێ سەرۆکی ژیوای مەبۆ"یشا بەرزێ کەردێوە.

چالاکییەکەو ئامەدی ٣٩ ڕوێن بەردەواما، چالاکێ هێلەکێ "گۆشەگیری تاوانوو ئینسانیەتین"یشا پۆشتێ و درووشموو "بژیوۆ مدرامانوو زیندان"ی و "ژەنی، ژیوای، ئازاڎی"یشا بەرزێ کەردێوە".

چالاکییەکەو ئەزمیرینە هامسەرۆکوو دەم پارتی کاراباگلار، ئەمینە بۆزداگە واتش: "گەرەکشانە هومێدوو داڎپەروەری نازا، وەلێ ئەڎێما هەرگیز هومێد جەدەس نمەدانێ و شۆنەو  هەنگامەو ڕۆڵەکاشا گنا. ئێمە بە هومێدوو و ئیرادەیوە سەروو پایاوە مردێنمێ".

بۆزداگ تیشکەش وستە سەروو گۆشەگیریی ڕابەروو گەلوو کوردی عەبدوڵا ئۆجالانی و واتش بێدەنگیی وەراوەروو ئی ئەشکەنجە گەورەیە چێوێ ئاسایی نییا و واتش: "پەنەوازا دەنگما بەرزتەر بۆ. چونکوم سیستەم گەرەکشا ئەشکەنجەی بە ڕەوا نیشانە بدۆ. پەنەوازا دژوو ئینەیە مردمێوە تا نەتاوا درێژە بە ئەشکەنجەی بدا".

چالاکییەکەو مێردینینە ئەڎاو ئاشتی نورێ تارلاکە، واتش: "چیوە پەی ڕابەریما و ڕۆڵەکاما چالاکیی کەرمێ، چالاکیی مانگێرتەی زیندانییا نزیکەو ٢ مانگان بەردەواما. پەی پەشتیوانییشا ئینایمێ چێگە. ڕۆڵەکێما پەی ڕابەرەکەیشا و مافەکاشا ئینێ مانگێرتەینە. گەرەکمانە پارێزنەرێ و بنەیانێ چەنی ڕابەرێتی کوێ باوە. ئێمە گۆشەگیریی سەروو ڕابەرێتی و زارۆڵەکاما قبووڵ مەکەرمێ. تا ئاخر درێژە بە کۆشیای مدەیمێ. ئازاڎیی ڕابەریما گەرەکا، ئینە داواو ئێمەنە".