دەقو نۋیستەکە و سیاسەڎمەدارو نام ڎارو کورڎی محەمەڎ ئەمین پێنجوێنی پی جۆرەنە:

"ئا سەرگوزشتۍ کە مشۊم بزانیا"

٢٠ ساڵۍ چېوەڵتەر یۋەم کۆنفرانسو لۆزانی!

جە قسەکامانە جە دۋەم کۆنفرانسو لۆزانی، ئاماژەما پانەی کەرڎ، کە ساڵەو ۱۹۹۷ی پۍ جاری یۋەمی جە تاریخو گەلوو کورڎینە، ئەنستیوتی کورڎیی بەرلینی پۍ ئەوەکۊڵیای و زانستی  کۆنفرانسێوەما جە بارەو پەیماننامەو لۆزانی بەست، کە یەرۍ ڕۋېش خواینا جە حەفتا و پەنجەمین ساڵوەگېڵ و ئی پەیمانە شوومېنە

 جە کۆنفرانسەکەنە جەمۍ جە کەسایەتی و تاریخ نۋیسا و سیاسەڎمەدارۍ گۊرۍ جەهانیۍ و کورڎۍ خوڵقە کریېبېنۍ، گرڎ جە سیمینارەکاشانە سەرو ئانەی کۊکۍ بېنۍ کە کورڎ زوڵمێوە تاریخی گۊرەش ۋنە کریان پۊکاتی پەنەوازەن جە ڕاو نەتەوە یۊگېرتەکاوە

 ئا مەزڵومیەتە لا بریۊ .

  ئێمەئچ پېسە ئەرکێوە نیشتمانی و ئەخلاقی، جە ئەنستیوتی کورڎی بەرلینی قەرارما دا کە شاندێوە کیانمۍ پۍ ئەمریکای پۍ لاو سکرتێرو گرڎی نەتەوەیۊگېرتەکا.

 شاندەکەما پێكئامابۍ چی بەڕێزا:

 ١ ـ دکتۆر عیسمەت شەریف وانلی، هامسەرۆکو ئەنستیتوتی کورڎی جە بەرلین.

 ٢ ـ محەمەڎ ئەمین پێنجوێنی، ڕاوەبەر و هامسەرۆکو ئەنستییوتی کورڎی جە بەرلین.

 ٣ ـ پرۆفیسۆرمهیرداد ئیزادی، مامۆسا و زانشتگەی جە زانشتگاو میشیگانی.

 ٤ ـ عەلی یەگید، سەرۆکو ۋەڵتەرو کۆنگرەی نەتەوەیی.

 ٥ ـ دکتۆر ئیلهان قزڵهان .

 ئانەی چېگەنە گرنگا و مەبەسا ۋچیۊ  وردەکاری ئا گفتوگۊیە وزیۊ ڕووە کە جە بەینو سەرۆکو نەتەوە یۊگېرتەکانە و یاگەگیرەکەیشەنە و شاندەکە و ئێمەنە  ٢٠ ساڵۍ چېوەڵتەر ڕووەشدا و ئێمە داواو چېشیما جە نەتەوەیۊگېرتەکا کەرڎ چونکی ڕۋەدایۍ تاریخیا و پەنەوازەن گرڎ کورڎېوە بزانۊش.

 ١  ـ یاداشتێوەما بەنامۍ کۆنفرانسو یۋەمو لۆزانیوە پێشکەش کەرڎ کە بەشێۋېوە زانستی و قانونی تاریخی نۋیسیابۍ.

 ٢ ـ ئانامەی کە بەڕێز ( عەبدوڵڵا ئۆجالان)ی، نۋیستەبېش چنی نامېوە دەمی  کە  بەڕێزشا  بە منش ۋاتەبۍ پێشکەش بە (پەترۆس گالی) سکرتێرو گرڎی نەتەوە ئۊگېرتەکاش کەرو.  جە نامەکەنە ئامابۍ ئێمە ئاماڎېنمۍ جەنگ چنی دەوڵەتو تورکیای مرڎنمۍ و دەس بە گفتوگۊی کەرمۍ چېرو چەمڎاری نەتەوە یۊگېرتەکانە و پەرسو کورڎی چارەسەر کەرمۍ  .

 دکتۆر عیسمەت شەریف وانلی کە سەرۆکو شاندەکەی بۍ ۋاتش: داوا جە نەتەوە یۊگېرتەکا کەرمۍ کە قەتڵوعامو دێرسیمی، کەشو ئاراراتی، گەلی زیلان، کیمیاۋارانو هەڵەبجەی و ئەنفالی بە جینۆساید بشناسیا (ئا وەختە جە کۆنگرێسو ئەمەریکاینە گفتوگۆ سەرو قڕکەرڎەی ئەرمەنەکا کریۍ، کە بە جینۆساید بشناسیۊ).

 جە جوابەنە ۋاتشا: شمە هەروەختۍ پېسە ئەرمەنەکا دەوڵەتتا بی ئا داوۍ کەرڎۍ، ئێمەیچ وزمېش پرۆگرامو گلېرۊبیەکاما پۍ گفتوگۆی.

 منیچ ۋاتم: با پېسە فەڵەستینیەکا ئەنڎامێوە چەمڎارما بۊ.

 جە جوابەنە ۋاتشا: ٢٠ دەوڵەتۍ عەرەبیۍ داواشا چنە کەرڎیمۍ، ئەوسا قەراردریا  فەڵەستینییەکۍ چەمڎارېشا جە نەتەوە یۊگېرتەکانە بۊ .

پرۆفیسۆر میهرداد ئیزادی ۋاتش: شمە پنەما ماچدۍ واز جە جەنگی چەکڎاری باردۍ. خاسا! جە بارەگاو نەتەوە یۊگېرتەکا ڕاما دەیدۍ قسۍ کەرمۍ، با چېگۊ صەڎاو ئاشتییانەو ۋېما بیاۋنمۍ بە گرڎو دنیۍ، کە شمە ڕا نەڎەیدۍ حیچ چارېوە تەرما ۋەردەمەنە نیا، جگە جە جەنگی چەکڎاری پۍ ۋۍ پارېزنایما.

بەنامۍ شاندەکەیۊ داواما کەرڎ نامەکەو بەڕێز ئۆچ ئالانی، پېسە قسۍ سەرۆکو هۆزو هیندییە سوورەکا( بیگ چیف)ی وزیۊ ئەرشیفو بەڵگەنامەکا نەتەوە یۊگېرتەکا 

 حەر پۍ تاریخی و پېسە وەفېوە پۍ ڕۆحو (عیسمەت شەریف وانلی)، ماچو دکتۆر (عیسمەت، دکتۆر جەبار قادر و سەلیم فورات) دەورېوە گرنگشا بۍ جە پێكئارڎەی و ڕاوەبەرڎەی کۆنفرانسو یۋەمو لۆزانینە

بە حۊڵېۋە تایبەتی و شەخسی ۋېما و جە ڕاو ( عیسمەت کەتانی)یوە تاۋاما بیاۋمۍ بە سکرتێرو گرڎی نەتەوە یۊگېرتەکا.

*ئا وەختە عیسمەت کەتانی یاردیدەرو سکرتیرو گرڎی بۍ پۍ هەرمانو کارو مرۆڤایەتی.

 براتا/ محەمەڎ ئەمین پێنجوینی

 • بە خاسما زانا کە جە کۆنفرانسو دووەمو لۆزانینە ئی چالاکییە تاریخیەتا پۍ باس کەرمۍ.

 • ڕاس کەرڎەیۊ خەڵەتی، جە قسەکەرڎەیمانە جە کۆنفرانسو دووەمو لۆزانینە ۋاتەنما کۆنفرانسو یۋەمی ساڵەو۱۹۹٥ بیەن، ڕاسییەکەش ساڵەو ۱۹۹۷ ین داواو چنە ۋیەرڎەی کەرمۍ".

هـ . ش