هامسەرۆکوو گلێرگەو ئازاڎیی، ئەحمەد زیرەک ئەرەیاۋناش نەورۆزوو ٢٠٢٤ بە سەرمەشقایەتی مەجلیسەکا گلێرگەو ئازاڎیی جە ٥ شارۍ نەمساینە ئەنجام مڎریا و بانگەوازش کەرد پۍ ئێژاکەردەو هەڵمەتەو "ئازاڎیی پۍ عەبدوڵا ئۆجالانی، چارەسەر پۍ پرسوو کوردی".
کوردسانیا نەمسای بە درووشمەو "ئازاڎیی پۍ عەبدوڵا ئۆجالانی، چارەسەری پۍ پرسوو کوردی" ۋێشا ئاماڎە کەرا پۍ پیرۆزکەردەی جەژنەو نەتەوەیی گەلوو کوردی نەورۆزی. هامسەرۆکوو گلێرگەو ئازاڎیی، ئەحمەد زیرەک ئەرەیاۋناش نەورۆزوو ئێساڵی بە سەرمەشقایەتی مەجلیسوو شارەکا ڤیەنای و ئینسبروکی و گراز و برێگنزی و لینزی ئەنجام مڎریا.
زیرەک ئەرەیاۋناش نەورۆز پۍ گەلا ۋەرکەوتوو دلێڕاسەی ژیۋایۆ سرووشتی و ژیۋایۍ تازەین، پۍ گەلوو کوردی و تەڤگەروو ئازاڎیی خاوەنوو مەعنێوە جیاوازا و ڕووێوە تاریخی و سیاسییا، ڕۊو مدرامانی ماناڎارین، واتش: "هاموەخت جەژنەو ئازاڎینە پۍ کۊشیای دژوو هەر جۆرە کۆیلایەتی و فشاری و ستەمی و قڕکەردەی و سیاسەتێوە ئەسیمیلاسیۆنی. پێویسا گەلوو کوردی بەپاو ئی مەعنا و نەواخنە تاریخیە خاوەنداری جە نەورۆزی کەرۆ و نەورۆزی پیرۆز کەرا".
قەرارا کوردسانیۍ نەورۆزوو ئێساڵی پێسە جوابێوە دژوو هجومی ئەرەگیری و قڕکەردەی دەوڵەتوو تورکی پۍ سەروو کوردسانی و گەلوو کوردی جە چوارچێوەو هەڵمەتەو "ئازاڎیی پۍ عەبدوڵا ئۆجالانی، چارەسەری پۍ پرسوو کوردی" پیرۆز کەرا. زیرەک داواش جە گرڎوو کوردا نەمسای کەرد بەشداری مەراسیمەکا بکەرا.
١٩ و ئاداری چالاکی پێشوازی جە نەورۆزی ملۆڕاوە، حەرپاسە قەرارا جە ٢٠ و ئادارینە جە ڤیەناو پایتەختوو نەمسای ڕاپیمایۍ بە هۊرگێرتەو شۊڵە چراوێوە ئەنجام بڎریۆ.
مەراسیموو نەورۆزی بە سەرمەشقایەتی یۊبیەی خۊنکارا کورسانی (یەخەکە)ی جە ٢١ و ئادارینە جە هێلدنپلاتزا ئەنجام مڎریۆ.
