کەزبان کۊنوکچو کۊک-ە، کاندیدەو ژمارە یەکوو پارتوو چەپی سەوزی ئەستەنبوڵنە ئەرەیاوناش، کە چەنی ماڕای دەسەڵاتی، گەرەکشانە بە قووەتۍ فرەوە پەرلەماننە هەرمانە کەرا و واتش، " ئێمە پەی فاڕیای وڵاتێوە ئازاڎی مەیمۍ."

کەزبان کۊنوکچو کۊک-ە، کاندیدەو ژمارە یەکوو پارتوو چەپی سەوزی ئەستەنبوڵنە، کە لاو دەسەڵاتیوە جە وەختوو دۊخی نائاسایینە، جە مامۊستایەتینە بەرە کریا و ١٩ ساڵۍ ڕەنجش بی بە ڕەنجوو قۊلانچۍ، ماوێوە ڕۊنامەنویسە بۍ. ماوێچ جە سەندیکاو کرێکاراو گەشتیاریی شۊڕشگێڵینە پێسە ڕێوەبەرۍ هەرمانە کەرۍ و جە پلاتفۊرموو پەشتگیریی سۊسیالیستینە قسەکەرە بۍ. کەزبان کۊنوکچو کۊک-ە، پەی ئاژانسوو هەواڵوو فورات (ANF)ی باسش جە ئامانجەکاش کەرد جە ئەستەنبوڵنە.

چەپە سەوزەکۍ گەلشا بۍ یاگەگێرەوە ناستەن

کۊنوکچو کۊک-ە، باسوو ئانەیچش کەرد، کە پارتوو چەپی سەوزی جبەروو دوەو سیستمەکەیۊ، یاگەگێرەوەش پێشکەش بە گەلا کەرڎەن و واتش، " بێگومان ئێمە متاومۍ بڕۍ ئەزموونۍ سیاسیۍ بەدەس بارمۍ. پارتەکەما پەوکای ماچۊ، " گەرەکمانە بەرەو جەحەننەمی وزمێرە". پەی نموونەی پەوکای پەی سەرۊککۊماری کاندیدما نەبۍ. ئێمە خاس مزانمۍ کە وەروو ئانەی دیموکراسی و شۊڕشگڵنی قەوەت بۊ، چی ورچنیەینە پێویسا بە قووەتۍ فرەوە بەشداری جە پەرلەماننە کەرمۍ."

گەل خێرامایۍ گەرمشا وەنە کەرڎا

کۊکە واتیچش، ئەستەنبوڵنە خێرامایۍ گەرمم وەنە کریان و واتش، " گرد لاێوەنە ئێمە بەجۊشوخرۊشۊ خێرامایما چەنە کریۊ، جەماوەرما فرە ڕێکوزیان. ئێمەیچ متمانەما بە وێما هەن. چی مانگێنە بە هەرمانۍ فراوانەوە یاومۍ سەرکەوتەی."

قووە جە گەنجا  ور گێرمێ

کۊکە ماچۊیچ کە گەنجۍ پێویسشا بە چارەسەرێوەعاقڵانەی هەن. وەروو ئانەی فرەو قۊرتا ئینۍ وەرڎەموو گەنجانە و واتیچش، " دژوو بێهەرمانی، پەی دماڕۊیشا، بە وەڵێوینای و چارەسەروو وێما، چەنی گەنجان کوۍ بیمۍ و قووەتشا چەنە ور گێرمۍ."

ژەنی قوەو ڕێکوستەینێ

کۊکە باسوو هەرمانەکاش بارەو ژەناوە کەرد و واتش، کە دژوو دماییئارڎەینمۍ بە پەیمانەو ئەستەنبوڵی، وەلۍ جە هەمان وەختەنە هەرمانە پەی وەرقەرارکەرڎەی ئاسایشوو ژیوای ژەنا کەرمۍ. کۊکە واتش، " ژەنی قۊرتۍ جیددیۍ ژیوایشا هەنۍ. جە ڕاو کۊشیایماوە، ژەنی سەرە ور مڎا، داواکارییەکاشا وزا ڕووە و ڕاو وێشا وێزاو. جە دژوو کوشتەی ژەنا پارتەکەما هەرمانەی جیددییە کەرۊ. ئێمە وێڕاوەبەری و کۊشیای ژەنا بەجیددی وینمۍ. چوون متمانێما بە کۊشیای و قووەو ڕێکوستەیشا هەنە."

دەسەڵاتی ورشانمێوە و سیستمۍ تازە منیەیمێرە

کۊکە ئانەیچش وات، کە پەی مسۊگەرکەرڎەی ئیرادەو دماڕۊی، هامپەیمانیی ڕەنج و ئازاڎی فرە گرنگا و واتش، " ئامانجی سەرەکیما ورشانایۊ ڕژێموو کۊشكێن. وەلۍ ئانەیچ بەش مەکەرۊ، پێویسا پەی بنیاتنیای وەڵاتێوە تازەی هەرمانە کەرمۍ. ئامانجما ئانەن جە ئەستەنبوڵنە ٢٠ کورسیۍ بەدەس بارمۍ. چوون متمانێما بە وێما هەنە، وەروو ئانەی بناغەما هەن و بەقووەتا.

س.ز