ماوەو مانگېوەنە جە ۋەرکەوتوو کوردسانی نزیکەو ٥٠ کۆڵبەرا سەروو سنوورەکاوە بیېنۍ بە قوربانی، ٢٢ زینڎانیۍ کوردی دریېنۍ قەنارە و ٢٤ چالاکۍ گیریېنۍ و سزایچ سەروو ٣١ چالاکارە سەپیان.
تۆڕەو مافەکاو مرۆڤوو کوردسانی ئامارەو پاشێلکارییەکا مافوو مرۆڤیش جە ۋەرکەوتوو کوردسانی ماوەو مانگەو سەرماوەزی(٢٢ۍ نۆڤەمبەری – ٢٢ۍ دیسەمبەر)ی وەڵاکەردۆ و بە پاو ئامارەکۍ چا مانگېنە لاوکەمیۆ پەنج کۆڵبەرۍ کە یۊشا زارۊڵە بیەن بە تەقەو هێزەکاو ئێرانی جە مەنتیقە سنووریەکاو بانەی و مەریوانینە جە پارێزگاو سنەی و نەوسوڎۍ و کرماشانی ژیۋایشا جە دەسدان.
ئانەیچ وزیان ڕووە، کە ٤٣ کۆڵبەرۍ کە پەنجشا زارۊڵېنۍ جە مەنتیقە سنووریەکاو ۋەرکەوتوو کوردسانی بە تەقەو هێزەکا دەوڵەتی زامڎارۍ بیېنۍ و کۆڵبەرێوەیچ جە مەنتیقە سنوورییەکاو نەوسوڎۍ جە پارێزگاو کرماشانینە ئەڵخامش پۊرە تەقانۆ و پا مەڵامەتۆ زامڎار بیەن.
جە بەشێوە تەروو ئامارەکێنە ئاماژە پانەی کریان، کە جە مانگەو سەرماوەرزییەنە ٢٢ زینڎانیۍ کوردی بە تۆمەتەی جیاجیا چانیشا خراپەکاری سەروو زەمینیۆ، کوشتەی بە ئەنقەس، دۆسیەکا پەیوەس بە ماددە هۆشبەرەکا و دەسدرێژی جە زینڎانەکاو دەوڵەتوو ئێرانینە دریېنۍ قەنارە.
فشارەکۍ هێزە ئەمنییەکاو ئێرانی پۍ سەروو چالاکا سیاسی و مەڎەنی جە ۋەرکەوتوو کوردسانینە بەردەوامېنۍ و پېسە جە ئامارەکېنە ئامان، ماوەو ئا مانگېنە ٢٤ هاموڵاتیۍ و چالاکۍ سیاسی و مەدەنیۍ کوردی جە شارە جیاجیاکاو ئێرانی و ۋەرکەوتوو کوردسانینە گیریېنۍ، ئەگەرچی بەشێوە کەمشا بە نیایرەو بارمتەی دارایی بە شێوۍ وەختی ئازاڎۍ کریېنۍ، بەڵام فرەیشا بە زینڎانەنە مەنېنۍ.
حەر چاس ماوەیەنە سزای جیاجیا پېسە زینڎانی، قامچی و سزاو دارایی سەروو ٣١ چالاکارە سەپیان.
هامشێوەو مانگەکا ۋیەردەی، جە مانگەو سەرماوەرزیچەنە فشارۍ هێزە ئەمنییەکا پۍ سەروو بنەیانەو گیانبەخشایا سەرهۊردای ژەنۍ، ژیۋای، ئازاڎیی بەردەوام بیەن و چا مانگېنە زوهرە پایروەندە و مێهدی قاسمیفەرد، ئەڎا و براو ئێحسان قاسمیفەردی بە مەبەسوو ڕاگېرتەی جە لووای ڕاوەو مەراسیموو ساڵیاڎوو ئیحسانینە چڕیېنۍ پۍ ئیدارەو ئیتلاعاتوو کەنگاوەری و موعید ساعیدیچ، براو سارینا ساعیدیێچ بە تۆمەتەو 'بانگەشەی دژ بە حکومەت'ی خوڵقەو وەردەموو دادگاو سنەی کریېنۍ.
هاموەخت موژگان ئیفتیخاریە، ئەمجەد ئەمینی و ئەشکان ئەمینی (ئەڎا و تاتە و براو ژینا ئەمینی)ۍ جە ڕېکۊتوو ١٨و سەرماوەزینە (٩و کانونوو یووەمی) چا وەختەنە کە گەرەکشا بۍ بە مەبەسوو بەشداریکەرڎەی جە مەراسیموو پێشکەشکەرڎەو خەڵاتوو ساخارۆفینە بە ژینا ئەمینیۍ جە فڕگەخانەو خومەینیی تارانیوە پۍ شاروو ستراسبۆرگی جە فەرەنسا گەشت کەرا، بەڵام هێزە ئەمنییەکۍ کۆماروو ئیسلامیی ئێرانی ڕاشا ۋنە گېرتۍ و پناشا واتۍ کە قەڎەغەو گەشتی و لووای بەریشا ئینا سەر و دماو ئانەی ۋنەپەرسایشا چنە کەرڎۍ، دەسشا گېرت سەروو پاسپۆرتەکاشارە.
ڕۊو جەهانی ۋەرەنگاربیەیۆ تنووتیژی دژوو ژەنا کۊتەن مانگەو سەرماوەرزی، بەڵام هەر چا مانگێنە پېسە جە ئامارەکۍ تۆڕەو مافەکا مرۆڤوو کوردسانینە ئامېنە، لاو کەمیۆ دووۍ ژەنۍ جە ورمێ و کەنگاوەر جە تەرەفوو تاتەی و هامسەرەکاشاوە کوشیېنۍ.
بەشێوەتەروو گوزارشتەکۍ تایبەتەنە بە ئاژەو کرێکارا و ئانە وزیان ڕووە کە جە سەرماوەرزەنە لانی کەم چوار کرێکارۍ کوردی جە شارەکاو کرماشانی، بانە، مەریوانی و دێوڵانی بە مەڵامەتوو ڕووەدایەکا شۊنماو هەرمانەکېشاوە عەمرەو خوڎایشا کەردېنە.
تۆڕەو مافەکا مرۆڤی جەختیچش چانەی کەردەنۆ، کە بە مەڵامەتوو قەڎەغەبیەی چالاکیی ڕێکوزیا سەربەخۆکا مافوو مرۆڤی جە ئێرانەنە و فشاروو سەروو بنەیانەو قوربانیا پاشێلکەرڎەی مافەکا مرۆڤی، ئاماڎەکەردەی گوزارشتەی بەڵگەدارە و وردە ڕووبەڕوو گرفتۍ فراوانی بۆوە، حەر پۊکەی ئامار و زانیارییەکا دلۍ ئی گوزارشتۍ و تەماموو حاڵەتەکا پاشێلکەرڎەی مافەکا مرۆڤی مەگېرۊوە. ئی گوزارشتۍ سەروو بنەماو هەواڵی و گوزارشتە وەڵاکریاکا تۆڕەو مافەکا مرۆڤوو کوردسانی و حەرپاسە ۋنەکۊڵیای و پەشتڕاسکەردەیۆ گوزارشتە و هەواڵوو ڕێکوزیا و ماڵپەڕە چالاکەکا تەری چی بوارەنە ئاماڎە کریېنە.
