ئامەدنە گەل و هامسەرۆکاو شارەوانیی لوێ دلێ شارەوانییوە
هامسەرۆکاو شارەوانیی شاری گەورەو ئامەدی مەرسوومو وێشا ورگێرت و چەنی هەزاران کەسا لوێ دلێ شارەوانییوە، هامسەرۆکاو شارەوانیی سڵامشا وەنەو سەرکەوتەی گەلی کەرد.
هامسەرۆکاو شارەوانیی شاری گەورەو ئامەدی دۆغان هاتون و سەرا بوجاک و هامسەرۆکاو شارەوانیی مەنتێقەکاو پارتو یەکسانی و دیموکراسیی گەلا (دەم پارتی) نیمەڕۆ چەنی پارتەکا لوێ کۆمیسیۆنو ورچنیەیەکاو ئامەدی و چا مەرسوومو وێشا ورگێرت.
هامسەرۆکاو شارەوانیی شاری گەورەو ئامەدی دۆغان هاتون و سەرا بوجاک هامشانە چەنی بەشێو جە هامسەرۆکاو شارەوانیی مەنتێقەکا مەرسوومەکەشا ورگێرت، ئەدایاو ئاشتی و چالاکاو تەڤگەرو ژەنە ئازادا و و قسەکەرو دەم پارتی خالیدە تورکئۆغلو ئامادێ بێنێ.
دماو ڕسمگێرتەی وەردەمو کۆمیسیۆنو ورچنیەی ئامەدینە، لوێ مەیدانو شێخ سەعیدی، هەزاران کەسێ بە چەپڵێوە خێرامایشا وەنەو هامسەرۆکاو شارەوانیی ئامەدی کەرد، بە درووشمو "ژەنی، ژیوای، ئازادی" ڕاشا پیما.
هامسەرۆکێ و گەل بە چەپڵێوە ئامێ وەردەمو شارەوانی، وەردەمو بیناو شارەوانیینە پانکارتو " چێگە قەیومیەتی خەیاڵی شاریانۆ" ورواسیا.
بیناو شارەوانیینە کۆنفرانسە ڕۆنامەوانییەکە بەسیا، هامسەرۆکو دەم پارتی ئامەدی، پنار ساکیک تەکین واتش جە هەلومەرجی نایەکسان و نادیموکراتیکنە سەرکەوتێ، وەراوەرو ئا کەسا، کە نکۆڵی جە بییەی کوردی مکەرا و واتش: "نەوەک حەر گەلو کوردی، گردو گەلا براوێ بێنێ".
ساکیک مەرسومەکەش کەرد سەوقاتیی گەلو کوردی و ئەدایا و گەلاو تورکیای و ئا کەسایچە جە کۆشیای ئازادیینە گەشمەردێ بیێنێ، هومێدش واست مەرسوومەکە بۆ بە مایێ ئاشتی و دیموکراسی و ئازادی.
دمایی هامسەرۆکو شارەوانیی ئامەدی، سەرا بوجاک ویرش وستۆ چەنی ساڵەو ٢٠١٦ گوڵتان کشاناکە و فورات ئانلی گیریێ، هەرپاسە ساڵەو ٢٠١٩ سەلجوق میزراکلی و هولیا ئالۆکمەن دماو ورگێرتەی مەرسوومەکەیشا گیریێ، قەیومشا یاگێنە نریارە، واتش: "کۆشیای ئی گەلەیە دماییش نمێ".
بوجاک ئەرەیاوناش، حەرند زانیێ مەرسوومەکەما ورگێرمێ، بەڵام قەیوم ئارۆ کۆبییەیۆ مەجلیسیی مانگەو نیسانیش کەردەن، ئەوەخوایش کەردۆ وەنەشا پەرسیۆوە، وەعدش دا شارەکەی چەنی گەلو ئامەدی بەرانێ ڕاوە و واتش: " ٥ ساڵی دماتەرنە، ئی شارەوانییە مبۆ بە شارەوانیی گەلی، بەرەو شارەوانیەکەیما هەردەم بەکریایۆ مەنۆوە".
هەرپاسە هامسەرۆک دۆغان هاتون واتش قەرزارێ ڕەنجو گەلینێ و درێژە بە هەرمانە وخەباتو هامسەرۆکە وەڵینەکا مدانێ، واتش: "ئارۆ دەس پەنە مکەرمێ و ٥ ساڵێ خزمەت مکەرمێ، نەوەک ئانێ دەنگشا پنە دێنمێ، خزمەت بە ٢ ملوێن هاموڵاتاو شارەکەی مکەرمێن. وەعد مدەیمێ، تەمامو ٢ ملوێن هاموەڵاتەکا گەلو ئێمەنێ، وەنەو گەلەکەیما مەبارەک بۆ".
