پەرلەمانتاروو بازنەو بەدلیسوو پارتوو دیموکراسی و یەکسانیی گەلا (دەم پارتی)، حسێن ئۊڵان سەبارەت بە گۊشەگیریی ڕەهاو سەروو ڕابەروو گەلوو کوردی عەبدوڵا ئۊجالانی و زیندانییا قسێش پەی ئاژانسوو فوراتی کەرڎۍ.

حسێن ئۊڵان یادش ئارڎۊ، کە ئۊجالان نزیکەو ٣ ساڵان بە ڕەهایی گۊشەگیر کریان و ئاماژەش پانەیە دا، کە سەبەبەکاو ئی گۊشەگیرییە فرێنۍ و واتش:"گرنگتەرین هۊکار چارەسەرنەکەرڎەی پەرسەو کوردینە و سەرچەمەو گردوو قۊرتەکاو ئیساتۍ تورکیاین پاگێرتەیرەین جە چارەسەری، بە ڕێبازی ئەمنی و بەکارئارڎەی تندوتیژی. جەمسەری فاشیست، ڕەگەزپەرس و نکۊڵیکەر کە ئیساتێنە ئاکەپە-مەهەپە سەرکێشییش کەرۊ، سەروو ئی بنەمێوە درێژە بە حکومڕانییی وێش مدۊ. شەپۊلەو ناسیۊنالیست، ڕەگەزپەرس، شەڕوازی تا بتاوۊ زیاتەر دەسەڵاتەنە مەنۊوە، بە زانابییەی سیاسەتێوە چینە کەرۊ."

 گۊشەگیری تەنیا دوورگەو ئیمرالیینە سنوورڎار نەمەنەنۊ

ئۊڵان ئەرەیاوناش کە گۊشەگیریی ڕەها تەنیا ئیمرالیینە کریۊ، بە پلەو یوەمی ئەرەمەرزیایەکاو گەلوو کوردی، کە وەراوەروو دەسەڵاتی فاشیستی مرڎاوە گۊشەگیرۍ کریا و واتش:" پەی نموونەی پەرلەمانەنە مامەڵەی چانە چەنی پەرلەمانتارا کریۊ، وەراوەروو ئێمەی پەرلەمانتاری ڕێبازی دوژمنکارانە بەکار مارا، دەسەڵات خاس هاگاداروو گرد چێوێوەن؛ پەنەوازا گۊشەگیری سەروو بەڕێز ئۊجالانی ورگیرییۊ. وەلۍ سەرەڕاو وڕایرەی ئابووری، کۊمەڵایەتی و سیاسی، گۊشەگیریی بۍ مرڎای بەرڎەواما."

ئاخروو قسەکاشنە ئۊڵان ئەرەیاوناش ئیساتێنە جگە جە جمیەری کوردی حیچ ئۊپۊزسیۊنێوە تەر نییا و سەرنجەش پەی زوڵموو دلۍ ناو زیندانەکا کێشتە و واتش:"ئا کرڎەوۍ زیندانەکانە کریا قبووڵکریۍ نییەنۍ، لاێوە بە عارەزوو وێشا سزاو زیندانییا درێژە کەراوە، لێوە تەریچۊ پەشیمانی سەپنا، ئانە کە هجوومێوەن دژوو شکۊو ئینسانیەتی. مانگێرتەی جە وارڎەی ئینا ١٩ـــەمین ڕۊشنە، پەنەوازا دەمودەس داواکارییە ڕەواکاو زیندانییا بیاویا یاگۍ، ڕاسیینە چالاکیی مانگێرتەی دما ڕاچارەو زیندانییەکان. پا نۊعە گلێرگە بە ڕاددەو پێویسی بە ڕێک نەوزیان و وەرپەرسانە مامەڵە مەکەرۊ، پەوکای ئی بارگرانییە گنۊ سەروو شانەو زیندانییەکا، ئینەیچە ڕاس نییا، گلێرگە مشۊم وەرپەرسبییەی وێشا بیاونا یاگۍ، مشۊم جوابوو داواکارییەکا بدریۊوە، دمایی بە گۊشەگیری و مانگێرتەی بۍ."