شۆڕشگێڵنی ئینترناسیۆناڵیست باگەر نوژیان (میکایل پانسەر) کە جە ١٤و کانونو یوەمو ٢٠١٨ ینە بە مەڵامەتو هرووژمێ ئاسمانی دۆڵەتو تورکیوە پەی سەرو کەشەکا کوردەسانی گەشمەرڏە بیی، جە دیمەنێوەنە کە جە کەشەکا کوردەسانینە تۆمارش کەردەبێ، بانگەوازێوەش ئاراسەو جوانا گردو وڵاتا کەردەن:

ئا گەشمەرڏە ئینترناسیۆناڵیستە جە دیمەنەکەنە پی جۆرە قسێش کەردێنێ:

نامێ حەقەتینەم میکایل پانسەرا، نامەکێم دلێ ئەرەکۆشاینە باگەر نوژیانا، وەڵتەرێ نامێم خەلیل ڤیان بییەن. من جە ١و ئەیلولو ١٩٨٨ جە ئەڵمانیاو وەرکەوتی جەئەڏایبییەنا. دۆخو بنەیانەکەیش جە رووەو ئابوورییۆ ئاساییا، وڵاتەکەمم وەش مسیۆ، وەڵتەرێ سۆسیالیس بییەنا. برا و واڵێوەم هەنۍ، من ئینانی دلێڕاسەنە. ١٣ ساڵێ وانانم، ئامادەیم تەمامنا و دووێ ساڵێچ زانکۆم وانان.

هەڤاڵا جمیەریم ئەڵمانیانە ئشناسێ. دۆخو ئەوروپای و دۆخو جەهانی چی سەردەمەنە، جە سەردەمو سەرمایەدارینە یەکلایبییەنۆ و ئەشیێ چارەسەر ئیزیێوە. ئانە گرد کاتێ پەی ئێمە ڕۆشن بییەن و بی جۆرە ئێمە بیێنمێ هەڤاڵو جمیەرەکەی. ئێمە هەڤاڵێ وێما جە ئەوروپانە ئشناسێ و بی جۆرە ئامانی کەش. جە لواشونیرەیم ڕابەرایەتی و پەکەکەم راستەوخۆ ئشناسا. وینام کە سەربارو هەوڵە بەردەوامەکام، هەوڵەکێم پێسەو پەنەوازی نەبێ. وەرو ئانەی ئەڵمانیانە دۆخەکە فرە گرژا، جوانێ ئینێ دلێ دژواریێ گۆرەنە. جوانێ جە ئێزتەیۆ ڕێوە پەی وێشا تووشو دژواری فرەی بانە. کاتێ پەکەکەم ئشناسا، من جە چێوێ یاوانیینە: جمیەرەو وەرکەوتو دلێڕاسەین، بەڵام کاراکتەرێوە گەردونی هەن. قیمەتو ئاکاری و سیاسی، قیمەتو هەمڕایەتی و جە هەمان کاتەنە تەماشەکەردەو جمیەرەکەی سەرو شارستانیەتی فرە وەرفراوان یاوان پنە. ئانەما دەسنیشان کەرد ئا ڕاو رێبەرایەتی و پەکەکەی دیاریشا کەردەن حەقیقەتو و دروسا و پەی ئێمەچ بنەمان. بی جۆرە من پەکەکەم ئشناسا، بە شێوێوە ئایدۆلۆژیکی. من کتێبەکا عەبدوڵا ئۆجالانیم وانێوە. جە دماینە قەرارمدا کە بەشداری پەکەکەی بونە. مەرامم بەردەوام ئێزتەیۆ چارەسەری بییەن.

ئێمە ویناما کە جە ئەزمون و رێبازو پەکەکەینە چێوێ گەردوونی هەن. تاوۆنە فرەو چێوی کە پەی چارەسەری جە ئەوروپانە پەنەوازێنۍ، بە زیاڏۆ کریا. جە هەمان کاتەنە، کێشەکێ راسەوخۆ پەیوەندیش پێوەرە هەنێ. ئەر شۆڕشو کوردەسانی و وەرکەوتوو دلێڕاسەی سەرگنۆ، ئانە راسەوخۆ کاریگەریش سەرو مۆدێرنیتەو سەرمایەداری جە ئەوروپانە منیۆرە، وەرو ئانەی مەرامما ئانەبێ، کە کۆنفێدڕالیزمو دیموکراتیکی پێسەو مۆدێلو چارەسەری بشناسریۆ، خاستەر بشناسیۆنەو و وەڵابۆوە. بەراسیچ گەرەکم بێ سردێوە ساز کەرونە.

وەرو ئانەی دەرونما و پێرسپێکتیڤو ئەوروپای فرە جە جەهانی ئەرەبڕیان، بە تایبەتیچ ریشەو وێش جە وەرکەوتوو دلێڕاسەی جە ویرکەردەن و ئێمە گەرەکما پێ ئا پەیوەندییە سەر جە نوێ ساز کەرمێوە. وەرو ئانەی جوانێ فرە شۆنەو چارەسەرینە گێڵا. مەرامما ئانەبێ.

پەروەردە بە حەقیقەتی بە ماناو ئانەی مێ کە شۆڕش چێشا؟ ئێمە گەرەکمانە گلێرگەی ئازاد کەرمێ، ئێمە گەرەکمانە چارەنووسو دیاریکریاو مرۆڤایەتی فاڕمێنە. پەی ئانەیچ مشۆم وەڵێ گرد چێوێ ئێمە کێشەکا جە کەسایەتی وێمانە خاستەر درک پنەکەرمی. مشۆم ئێمە وێما ئا کێشە کۆمەڵایەتیا جە کەسایەتیمانە بییەیشا هەن ویەرنمێ. جە پرەنسیپ و بنەماکانە بڕێ هامشێوەو شیکاری دەروونی، مشۆم ئێمە وێما بشناسمی، جە چ دۆخێوە کارەساتبار و قەیراناوینە مژیومێ؟ وەرو ئانەی ئا راستیێ بابەتێوە کەسیی نیەنێ، بەڵکووم چێوێ کۆمەڵایەتی و تاریخین. ئا چێوەی تاومێ دلێ وێمانە چارەسەرشا کەرمێ، تاومێنە دلێ گلێرگەیشەنە چارەسەرشا کەرمێ. ماناو پەروەردە بە تەمامەتی ئینەن. ئینە پەروەردەن. کەش یاگێ ئێمەن. ئێمە چێگە پێوەرە ژیومێ و پێوەرە کێشەکاما چارەسەر مکەرمێ. وێما بەقەوەت مکەرمێ و سەرو ئا بنەمێ ئێمە ئا کاتە جە گلێرگەنە بە پاو وێما پەی ئایندەی هەرمانە کەرمێ: ئێمە چەنین تاومێ تاریخی فاڕمێ؟ وەرو ئانەی نامێنمێ ئێگە کە گێڵای و پەیجوریما چێوە تایبەتی و ئاوارتەیە، سەرو ڕێوە جە گلێرگەنە فرەو کەسیم وینا کە دماو هەمان چیویرە گێڵێنێ و ئارێم ئشناسێ. وەرو ئانەی ویر مکەروە کە ڕاو شۆڕشو کوردەسانی، ڕاو پەکەکەینە، ڕاو ئشناسای و یاواینە جە ڕابەرایەتی ڕێوە راسەنە کە وینریەنۆ. ئینەیج نەک هەر بەتەنیا پەی شۆڕشو وەرکەوتوو دلێڕاسەی، بەڵکووم پەی شۆڕشو جەهانی راسا.

بەتایبەتی پێسەو جوانێ- من گەرەکما، کە بە تایبەتی جوانێ ئانەی بە دروسی درک پنەکەرا و یاوانە، دۆخو ئێمە فرە جە دۆخو جەنگی جەهانی یەرەمی مشۆ.

مشۆم بە دروسی جە دەورو وێمانە چانەیە یاومێنە، شانە دەیمێرە وەرو بارو وەرپرسیارێتیماو ئا دۆخەیە فاڕمێ. مشۆم چارەسەرێوە بێزمێوە. ئەر چا حەقیقەتەیە یاومێنە، رەنگە دماین جەنگو مرۆڤایەتی بۆنە. بە مۆدێلو رێکوزتەو کۆمەڵایەتیی کۆنفێدڕاڵیزمی دیموکراتیکی، مرۆڤایەتی تاۆنە جە دۆگمای دۆڵەتی بڕیۆنە و سیستمو تاتەسالاری سەروچێر کەرۆ- با مەرجەی ئێمە جە قۆناغو وێڕێکوزتەی کۆمەڵایەتی بە دروسی یاومێنە. بە بەیلواو من ڕا حەقیقەتەکێ رێکوزتەیما ئانەن کە ئێمە تێکەڵ بە پارتەکەیما بیمێ، مشۆم بەیمێ ریزو گەریلایۆ و بەشداری جە ڕێکوزتەو جوانا شۆڕشگێڵی کەرمێ. جوانێ چێشا؟ جوانێ سەرمەشقێنێ. مشۆم جوانێ جە پراتیکەنە بە شێوەو وەرپرسیارانەی دەور گێڵنا و شانە بڎا چێرو بارو وەرپرسیارێتیۆ.

پا قەناعەتۆ، هیواو سەرکەوتەیشا پەی موازمێ!".