مەراسیمەکە سەعات ۲ دمانیمەڕۆو ئارۆی هۆڵوو خاکینە شاروو سلێمانیینە کریا. یاگێ ئاماژەینە کە ژمارێوە فرە جە هاموەڵاتا و چالاکا و میدیاکارا و چینەکاو گلێرگەی بەشدارییشا کەردەبێ.

ئەوەڵوو مەراسیمەکەی بە دەیەقێوە مردای پەی گیانی پاکوو گەشمەرڎاو ڕاو ئازادیی (ساکینە جانسە، فیدان دۆغانە و لەیلا شایلەمەزێ) دەسش پەنە کەرد و تیپێکرد و لاو بنەیانەو گەشمەرڎاوە مۆمێ پەی گیانوو گەشمەرڎا ورکریێ، دمایی وتاروو ڕێکوزیاو ژەنە ئازاداو کورڎسانی لاو شەیما نەبیلێوە ئەندامەو ئەنجوومەنوو ڕەژاکی ونیاوە دلێشنە ئامابێ:خەباتوو ژەنە شۆڕشگێڵنا پەی ژیواێوە ئازادی هۆش مەبەرمێوە سەروو خەبات و مدرامانوو ئا هامڕایاوە بەردەوامێ بیمێ، دژوو گرد بەکارئاردەێوە ژەنا پێسە کەرەسەی و وێوڵێ، پەی هۆشیارکەردەیۆ ژەنا جە هەوڵ و خەبات و کۆشیای وێما مەمردمێ.

حەر مەراسیمەکەنە وتاروو تەڤگەروو ئازادی لاو سارا ڕەزێوە پێشکەش کریا و دلێشنە باس جە گرنگیی خەباتوو ئا ژەنە شۆڕشگێڵنە گەشمەرڎا کریا و جەخت سەروو ئانەیە کریاوە بەردەوامی بدریۆ بە خەبات و کۆشیایشا دژوو گرد نایەکسانی و نادادپەروەریێوە وەراوەروو ژەنە ئازادا.

دماتەر خەڵاتوو یوەموو ساڵانەو گەشمەرڎە ساکینە جانسزێ، کە لاو ڕێکوزیاو ژەنە ئازاداو کورڎسانیوە ئامادە کریۆ، بەخشیا بە ئەدا ئەستێ، هاموەڵاتەو بناروو قەندیلی، کە بۆردومانەکاو دەوڵەتوو تورکیاینە گەشمەرڎێ کریا و لاو خێڵان پێنجوێنیێوە ور گیریا. خەڵاتی دووەموو ساکینە جانسزێ بەخشیا بە مامۆسا جیهان تەهای، کە بەشێوێوە گوماناوی کوشیا و لاو ڕێبوار محەمەدیوە ورگیریا.

دماتەر سینەفزیۆنێوەدەربارەو ژیوای گەشمەرڎە سارێ و هامڕایا و گەشمەرڎاو دووەمین کۆکوشیی پاریسی پێشکەش کریا، سینەفزیۆنەکە دەربارەو قۆناغەکاو ژیوای گەشمەرڎە سارێ و خەبات و مدرامانوو هامڕایەکاش بێ.

ئاخرۆ مەراسیمەکە بە واتەیۆ دروشمەکاو "گەشمەرڎە مەمرۆ" و "ژەنی، ژیوای، ئازادی"ی دماییش ئاما.