ئێشکگیری دادپەروەری ئەمینە شەنیاشارێ کە هامژین و دووێ کوڕێش جە ١٤ و حوزەیرانوو ٢٠١٨ ینە جە ناوچەو پیرسوسی ڕحاینە جەلایەن و پاسەوانا و قەوما پەرلەمانتاری وەڵینوو ئاکەپەی ئیبراهیم خەلیل یەڵدزیوە کوشیێ، ١٠١ ڕۆن بەردەواما.

ئەڎایا ئاشتی جە مێرسین و ئەدەنۆ ئامێ و نیازشا بێ ڕۆو ئەڎایا جە ئەمینە شەنیاشارێ پیرۆز بکەرا. بەڵام ڕووبەڕوو تەوقەو پۆلیسی بیێوە و پۆلیس ڕاش نەڎا ئەڎایا سەردای ئەمینە شەنیاشارێ بکەرا. دماتەر ئەڎایا جە جاڎەو بوکلومەیوە ئامێ وەروودەم و بیناو ناوەندوو گردیی دەم پارتی و چا چالاکی ئەرەنیشتەیشا ئەنجامدا.

ئەڎایا تەئکیدشا کەردۆ تا ئەمینە شەنیاشارێ نەوینا، یاگەکێ جیانمازا، ماوێوە فرە چالاکی ئەرەنیشتەیشا ئەنجامدا. دماتەر ئەمینە شەنیاشارە ئاما لاو ئەڎایا ئاشتی، ئەڎایا بە گوڵێ و درووشمەو "ماف، یاسا، دادپەروەری" و "بژیوۆ مدرامانوو زیندانی" پێشوازیشا ۋنە کەردە. 

واتەواچەو دەم پارتی ئایشەگوڵ دۆغانە، پەرلەمانتارەو دەم پارتی ئامەدی سەڤیلای چەلەنکە و پەرلەمانتارەو دەم پارتی ئیدر یەڵماز هونە چنی ئەڎایا بێنێ.

دماتەر ئەمینە شەنیاشارە ۋەروودەم و ناوەندوو گردیی دەم پارتینە ئەرەیاونێوەش وەناوە، ئەرەیاوناش ٦ ساڵێن داواو دادپەروەری مکەرۆ بەڵام ڕووبەڕوو ئاستەنگی دەسەڵاتی بیێنۆ، واتش: "ئانێ ئی ستەمما ۋنە مکەرا، هەوڵ مڎا کوڕەکەیم جە گۆشێ تاکەکەسینە کوشا".

ئەڎاو ئاشتی ڕەفیقە ئاکینە سەروو نامێ دەسوەڵێوستەی ئەڎایا ئاشتی ئەدەنەی ئەرەیاۋناش ئەمینە شەنیاشارە تەنیا نییەنە و هەمیشە پەشتیوانێش بیمێ، ئاستەنگ و تەوقەو پۆلیسیش شەرمەزار کەردە و واتش: "ئەمینە شەنیاشارە هەوڵوو دادپەروەری ئی وڵاتەینە، نوێنەرایەتی گردیما کەرۆ. ئێمە جە هیچ وەخت و شۆنێوەنە ئەڎا ئەمینەی بە تەنیا جیا نمازمێ".