دۆڵەتو تورکی ئەرەگیری رۆو ٢٣ۍ ئابی سەرو ڕاو سەیسایەق- سلێمانیۆ بە درۆنی هرووژمکەر ترۆمبێلێوە رۆنامەواناش کەرڎ ئامانج و پا مەڵامەتۆ گوڵستان تارا و هێرۆ بەهادینە گەشمەرڎۍ بیۍ.

سەبارەت بە مژارەکەی و شەرمەزارکەرڎەی ئا هرووژما ئی دماییە پەی سەرو رۆنامەوانا، ئەرەنیشتا کەمپو پەنابەرا مەخموری قسێشا پەی ئاژانسوو هەواڵوو فوراتی (ANF)ی کەرڎۍ.

'پەی ئانەی حەقەتینەکۍ وەڵۍ نەکریاوە، هرووژم مکریۆ سەرو ئەرەیاۋنای ئازاڎیی'

کەریمە قەوالیە سەرەڕاو شەرمەزارکەرڎەی هرووژم و سەرو رۆنامەوانا کورڎی واتش، "دۆڵەتو تورک ئیتر بێ دووە دڵی و بێ سڵەمایۆ گرڎ کەسۍ مکەرۆ مەرام. پەی ئانەی ئەرەیاۋنای ئازاڎ حەقەتینەکا نە فاڕۆوە ئا هرووژما مکەرۆ سەرو ئەنداما ئەرەیاۋنای ئازاڎیی. پېسە وەرگێوە دڕنڎەی هرووژم مکەرۆ سەرو ئانیشا کە بووە و کوردایەتیشا چۆوە مۍ.. گەر دۆڵەتو عێراقی و پەدەکە هامکارێش نەبیێنۍ دۆڵەتو تورکی نەتاوۍ بە ئاسانی هرووژم بکەرۆ سەرو ئەرەیاۋنای ئێمە. ئینە ئەوەڵ هرووژم نیا، بە دەیان جارۍ دۆڵەتو تورکی هرووژمش کەرڎەن سەرو شەنگالی، مەخموری، سلێمانی، کەرکوکی و ۋەرنیشتوو کورڎەسانی. پېسە گەلی تا سەر ئینایمۍ چنی جوانا، جمیەری، گەریلای و ئەرەیاۋناو ۋێما و چا هرووژما دۆڵەتی نمەتەرسمۍ. داکۆکی جە دۆزو گەلەکەیما و بیەو ۋێما مکەرمۍ. عال بزانا کە ئێمە سەرۍ گنمۍ. ئانەی دۆڵەتو تورکی ئیساتۍ مکەرۆش پا هرووژما قینی دۆڕیاو ۋێش جە کەشەکانە پاسە مجۆ.

'جە دژوو هرووژمەکا، هێزو گەلوو کورڎی تا مۍ زیاتەر مبۆ'

لاو ۋێشۆ ئیسماعیل هیلالی جە قسەکاشەنە باسش چانەیە کەرڎ کە دۆڵەتو تورکی ئەرەگیری بە گرڎوو هێزو ۋێشۆ کە پەشتیش بە ناتۆی بەستەن هرووژم مکەرۆ و پەلامارەو کورڎی مڎۆ و پی جۆرە بەردەوام بی: "جە کەسایەتی گەشمەرڎە گوڵستان تارۍ و هێرۆ بەهادینینە گرڎوو گەشمەرڎا ئازاڎیی کورڎەسانی یاڎمکەرووە. ۋەرو ئانەی ئەرەیاۋنای ئازاڎ راسی و دڕندەیی دۆڵەتو تورکی ئەرەگیری ئاشکرا مکەرۆ و وزۆش ڕووە، دۆڵەتو تورکی کپ کەرڎةی وبێدەنگکەردەی ئەرەیاۋنای ئازاڎیش کەرڎەن بە مەرامی سەرەکی ۋێش. جە ماوەکا ۋییەرڎەینە دۆڵەتو عێراقی چنی دۆڵەتو تورکی رێککۆتەیش ئیمزا کەرڎ، بەڵام ڕوۍ مۍ دۆڵەتو عێراقی چا رێککۆتەیە پەشیمان مبۆوە. ۋەرو ئانەی فاشیزمو تورکی هەرمانە پەی ئەرەگیری مکەرۆ. مەراموو دۆڵەتو تورکی جە لۆزانۆ تا ئیساتۍ رەڎکەردەیۆ کورڎی، نکۆڵی چنەکەرڎەی، دلێنەبەرڎەی و کوشتەیشا. بەڵام جە ۋەرا ۋەرو ئانەینە رۆ دماو رۆۍ هێزو گەلوو کورڎی گۆرەتەر مبۆ".

ئیسماعیل هیلالی جە دما دمایی قسەکاشەنە داواش کەرڎە کە گەلوو کورڎی بە یەکدەنگی کاروەدای گۆرەتەر ۋەرا ۋەر بە ئەرەگیری و فاشیزمی نیشانە بڎۆ و جە ۋەرا ۋەرو هرووژمەکانە زیاتەر دەنگهۆربڕۆ".