ڕیهام حچۆ هامسەرۆکەو ئەنجومەنو شەنگالی و عومەر ساڵح سەرۆکو پارتو ئازادی و دیمۆکراتی ئێزیدی (پادێ) جە دوێ دیمانێ جیێنە چەنی ئاژانسەکەیمان فوڕات نیوز (ANF)ی بەوردی سەرنجشان وستەن سەرو پەیماننامەو (پەدەکە/ئێراق)ی کە ماوێو جەی وەڵتەر دژ بە شەنگالی و ئێزیدییەکان مۆرەشان کەردەبێ. هەر دوێ نامبرێ دەستنیشانشان کەردەن: پەدەکە و ئێراق وەش یان تششان بۆنە، جە شەنگال لایەنی یەرمین هەن و ئێزیدیەکێ خاوەن ئیرادە و دامودەستگایێ و هێزێ وێپارێزنای شەرعیەنێ و پەیماننامەکە هەرگیز سەرنمەگێرۆن و کەردەیی نمەکریۆن.

ڕیهام حچۆ هامسەرۆکەو ئەنجومەنو شەنگالی ئاشکراش کەردەن: بەبێ وەرچەمگێرتەی ئیرادە و دامدەستگایێ و لایەنە ئێزیدییەکێ شەنگالی، ئاستەمەن هیچ پیلان و ڕێککەوتە و پەیامانێو سەربگێرونە و کەردەیی بکریۆنە. هەرگیزیچ بەئی جۆرە پەیماننامە و ڕێککەوتنامە و پیلانا نمەتاوانە ئەنجومەنو شەنگالی و وێڕاوەبەری ئێزیدییەکان بێکاریگەرێ بکەرانێ و پەراوێزێشان بوزانێ.

ڕیهامە واتەنیچش: پەی پووچەڵکەردەی و سەرڕاستکەردەی پەیمانناکەو (پەدەکە/ئێراق)ی، لایەنە ئێزیدیەکێ سەردای چەنڎین پارتێ و لایەنێ کوردیێ و ئێراق-یشان کەردەن و پنەمان واتێنێ؛ هیچ ڕێککوتێو کە ئێزیدییەکان بەرو وێشەوە بازۆوە، مایەو قبوڵ کەردەی نییەن و مەحکوم بە شکستەن. فرێو،جە ئا پارتێ و لایەنانە کە سەردایمان کەردێنێ، بە تایبەتی کەنەکە، یەنەکە و گۆڕان هامڕێ و هامهەڵوێستێمان بیێنێ و پەشتیوانی وێشان پەی داواکاریەکانمان نیشانەدان.
  
هەرپاسە، عومەر ساڵح سەرۆکو پارتو ئازادی و دیمۆکراتی ئێزیدی (پادێ) سەبارەت بەلایەنە نهێنیێ و ئەوەشاریاکێ پەیمانناکەو (پەدەکە/ئێراق)ی واتەنش: پەیماننامەکەنە لایەنێ نهێنیێ وئەوەشاریێش هەنێ کە ئیرادە و دامودەستگا و سازییە شەرعیەکێ شەنگالی مەکەرانێ ئامانج و جارێوتەر ئێزیدییەکان ڕووبەڕوو چارەنویسی نادیاری و مەتەرسیداری مەکەرانێوە و جە پەیماننامەکەن هیچ حسابێویچ پەی ئێزیدییەکان نەکریان، هەر پەوکەی ٪٨٠-و ئێزیدییەکان دژبەرێشەنێ و قبوڵش نمەکەرانێ.

سەرۆکو (پادێ) واتەنیچش: ئاکەسێ کە شەنگال و ئێزیدییەکێشان جە داعشی پارێزنێ و سەرجەنو ڕێکێشان وستێوە و نەئاستشان ئێزیدییەکێ بەیەکجاری قڕێ بکریانێ، پەیماننامەکە بەئاشکرا دژشان مدرانەوە و ئانێچە بە دژبەری شەنگالییەکان جەقەڵەم مدریۆنە، چونکە ئاکەسێ و لایەنێ ڕۆڵێ شەنگالی و ئەندامێ گلێرگەی ئێزیدیەنێ و بێگانێ نییەنێ بە هەرێمەکەی. بەڵکو شەنگالیەکێ هەرگیز ڕازیێ نەمانێ ئا کەسێ و ئا لایەنە کە شەنگالشان بەداعشی ورەت و وەرگیریشان جە داعشی نەکەرد و ئێزیدیەکێشان نەپارێزنێ، بەڵکو میشۆ دژبەری ئاڎیشان بکریۆن و ئا مافەشان نەبۆنە جارێوی تەر بگێڵانوە شەنگال و شەنگالیەکێ ئەوەگێڵایشان هەرگیز قبوڵ نمەکەرانێ. ئارۆ شەنگالو ئێزیدخان دامودەستگایێ و سازیێ و هێزێ وێپارێزنای و ئاسایشیشان هەنێ، پنەوازەن بەغداد و هەولێر بەفەرمی بشناشانشان و قبوڵێشان بکەرانێ و دەست جە دژبەریشان وەردانێ.

عومەر ساڵح سەرۆکو (پادێ)ی دژبەری پارتەکەیش و پارتەکێ تەرێ شەنگالی و ئیزیدیەکانش پەی پەیماننامەکەو (پەدەکە/ئێراق)یچوون شکست پەی پەیماننامەکەی بەنامێ کەرد و واتش: ئا دەنگێ و باسێ کە گویا باس جە نائارامی شەنگالی مەکەران، دوورێنێ جە ڕاستی و چەواشەکارانێنێ و جە ئیسەنە شەنگال و دەووروبەرش جە گرد سەردەمێوی تەری ئارامێ و بێکێشە تەرێنێ.

عومەر ساڵح گومانش جە ڕێککەوتەکەی هەن و بە دەسیسەو تورکیاش مزانۆنە و دەستنیشانش کەردەن: چی تەنها شەنگال؟ ئەی چی سەرو کەرکوکی ڕێککەوتەی نمەکریۆن کە بەدڵو کوردستانیش مزانان؟ دیارەن پەیماننامەکە پەی دژایەتی شەنگالی و ئێزیدیەکان و گەرەکشان نییەن کۆچبەرە ئێزیدیەکێ بگێڵانێوە زادگاو وێشان و بەئی جۆرە ئاستەنگیشان پەی دروست مەکەران. چونکە سەرەڕاو ڕاگیری پەدەکە-ی، ڕۆچ بە ڕۆچ خەڵکی زیاتەر مەگێڵانێوە و بە جۆرێ کە زیاتەر جە ٢٠٠ خانەوادێ ئێزیدێ ڕۆچانە مەگێڵانێوە شەنگال. پەدەکە و تورکیا بە ئەوەگێڵاکەی قەڵسێنێ و گەرەکشانە ئاستەنگش بکەرانێ.