یاگەگیروو سەرۆکوو ئەنجومەنوو ڕاوەبەردەی ۋېڕاوەبەری دیموکراتیکوو سەرنیشت و ۋەرکەوتوو سوریای، سەبارەڎ بە هجومەکا دەوڵەتوو تورکی پۍ سەروو ۋەرنیشتوو کوردسانی و سەرنیشت و ۋەرکەوتوو سوریای قسېش پۍ ئاژانسوو فوراتی کەردۍ.

حەمدان ئەلعەبد ئەرەیاۋناش، کە جە سەرەتاو قەیرانەکاو سوریایۆ بە دەسوەردای تورکیای جە هەرمانوو کاروو سوریاینە، هەم سەروازی، سیاسی هەم پاڵپەشتی جە گروپە تیرۆریستییەکا دەسش پنەکەرڎەن و واتش:"دەوڵەتوو تورکی گەرەکشا ڕېوە پۍ ۋەرکەوتوو دلېڕاسەی بێزۊوە و پانەیچ مافوو قەراری و میانجیکەردەی جەهانی عەرەبی و ئیسلامی جە ۋەرکەوتوو دلېڕاسەینە زەوت کەرۆ.

دەوڵەتوو تورکیای سەروو دوژمنایەتییەکاش ۋەران ۋەروو گەلوو سوریای و بەتایبەت کورد و عەرەبی مەنەن و مژیۋۆ. گرڎ لېوە بەرەو ئاخېز یان بەرەو دیموکراتیک بیەی ملۆ، بەڵام دەوڵەتوو تورکی جەنگشا چنی کەرۆ، پۍ ئانەی بەردەوام بۆ جە تاکڕەوییەکاش، سیستموو حکومەتیش جە پەرلەمانیۆ فاڕان پۍ سەرۆکایەتی.

'داعش کەڵکش نەمەنەن، پۊکاتی ۋېش هجوم کەرۆ'

ئەلعەبد باسش جە وەرفراوانی ئاستوو هجومەکا کەرد چی ماوەو دماییەینە و واتش:" ئێمە جە هجومە دڕندەییەکا دەوڵەتوو تورکی سەرەما سوڕمەمەنۆ بەتایبەتی دماو ئانەی داعش و جەبهەتوو النوسرە و گروپە چەتەکۍ تەری شکسشا ئارڎ و بیۍ بە ڕێکوزیېوە تیرۆریستی  جەهانی، بەڵام سەرەڕاو ئانەی تورکیا شێوازی تەرش بەکارئارڎ بە چالاککەرڎەی شانە تیرۆریستەکاو داعشی و فڕۆکەی بێفڕۆکەوانی، پۍ دلېنەبەرڎەو شێخوو هۆزەکا، کەسایەتی، ڕۆشنویرا و چالاکا ئیدارەو ۋېڕاوەبەری، وەڵاکەردەیۆ مادەو هۆشبەری گەرەکش بۍ گلېرگەو سوریای دلېنەبەرۆ. حەرپاسە دۆسیەو پەنابەرا سوریایش ۋەران ۋەر بە یۊبیەی ئەوروپای بەکار ئارڎ، چەتەکېش پۍ مەنتیقەکا تەروو جەهانی پېسە لیبیای و ئازەربایجانی ڕەوانەکەردۍ، دماو ئەرەگیرکەرڎەو عەفرین، سەرێکانی، و گرێ سپی دەسش بە فاڕای دیمۆگرافی چا هەرێمانە کەرد. پۍ شکسپنەئارڎەو گەلاو سوریای گرڎ ڕێبازێوەش تاقی کەردەنۆ وەروو ئانەی بە ئەنجام نەیاوا، هجوم کەرۆ سەروو سەرنیشت و ۋەرکەوتوو سوریای و ژیۋای گەلی بە ئامانج گێرۆ. مەنتیقە مەدەنییەکۍ پېسە خەسەخانەی، مەکتەبی، کارەبا و وێستگەو نەوتۍ، ئا یاگۍ کە هەزاران کەسۍ چنەشەنە مژیوا و ملۋېنان کەسۍ ئیسفاڎەش چنە کەرا کەرۆ ئامانج و ئینەیچ بە تاوانێوە دژ بە مرۆڤایەتی منریۆرە و جە ئاکامەنە کۆچێوە زۆرەملێش چنە گنۊوە.

'تورکیا گرڎوو یاساکاش وستېنۍ بنەو پەیا'

حەمدان ئەلعەبد ئەرەیاۋناش، تورکیا گرڎوو یاسا و ڕێسا میان دەوڵەتییەکا پاشێل کەرۆ و واتش:"دماو ئانەی ئیسرائیل چېرخانوو غەززەیش کەرد ئامانج، گلېرگەی میان نەتەوەیی حیچ کاروەدایۍ جددیش دژوو ئیسرائیلی نیشانە نەڎا، ئەردۆغان ئیسفاڎەش چا دەرفەتیە هۊرگێرت و بەردەوام بە فڕۆکەی جەنگی هجومەکېش پۍ سەروو سەرنیشت و ۋەرکەوتوو سوریای ئەنجام مڎۆ و گەلاو مەنتیقەکەی کەرۆنە ئامانج."

ئەلعەبد بێدەنگی گلېرگەی میان نەتەوەییش شەرمەزار کەرد و واتش:"گردما مزانمۍ کە ئەردۆغان گرڎوو یاسا میان نەتەوەییەکا پاشێل کەرۆ و پەی ئەرەگیرکەرڎەو مەنتیقەکەی و چۆڵکەردەیش جە ئەرەنیشتا ڕەسەنوو هەرێمەکەی و گەلا تەری بەردەوام حۊڵوو تێکدای ئارامی مەنتیقەکەی مڎۆ و بە ئاردەی فەلەستینیەکاو غەززەی و ئەرەنیشتەکەردەیشا جە هەرێمەکاو سەرنیشت و ۋەرکەوتوو سوریاینە گەرەکشا یاگېشا پەڕ کەرۊوە."

'وەڵېکۊتەی ئیدارەو ۋېڕاوەبەری بە دڵوو دەوڵەتوو تورکی نەبۍ'

ئەلعەبد ئەرەیاوناش، دەوڵەتوو تورکی گەرەکشا پی هجوما داعشی زینڎە کەرۊوە و واتش:"دەوڵەتوو تورکی دووۍ گورزێش جە ئیدارەوو ۋېڕاوەبەریوە دریېنۍ ۋنە؛ ئاڎیچ ئەرەمەرزناو هامپەیمانی کۆمەڵایەتی تازە و پەسەنڎ کەردەی فرەو سورییە چالاکەکان. ئەوی تەرشا ئەنجامدای چوارەمین کۆنفرانسوو مەسەدەیا."

حەمدان ئەلعەبد، بێدەنگی حکومەتوو دیمەشقی و ڕوسیای و ئەمریکایش شەرمەزار کەرد و پی جۊرە دمایش بە قسەکاش ئارڎ:"پێویس بۍ، حکومەتوو سوریای پەیوەس بە هجومەکا دەوڵەتوو تورکی دادگایۍ میان دەوڵەتیش چڕیۍ بە هامکاری هێزەکاو سوریای دیموکراتی  مەنتیقەو سەرنیشت و ۋەرکەوتوو سوریایش پارېزنۍ، بەڵام داخەم مەشۆ جیای ئانەی ئانەی کەرۆ ملۆ تەوقەو دووۍ کۊڵانا حەلەبی (شێخ مەقسود و ئەشرەفیە)ی و شەهبای مڎۆ".