گەریلاکۍ ھەپەگەی و یەژاستاری جەژنەو نەورۊزیشا جە ڕابەر ئاپۊی و گەلا ۋەرکەوتوو دلۍ ڕاسەی پیرۊز کەرڎو ئەرەیاۋناشا؛ ساڵەو ٢٠٢٣ۍ ئەرەکۊشای ئازاڎیی میاۋنمۍ بە بەرزتەرین ئاست.

گەریلاو ھەپەگەی ڕۊژھەڵات قارەمان:" ۋەڵۍ گرڎ چېۋێنە جەژنەو نەورۊزی جە ڕابەر ئاپۊی و گرڎو گەلا پیرۊز مکەرو. من جە کەسایەتی مەزڵوم دۊغانیەنە بە ڕێزۊ یاڎو گرڎو گەشمەرڎا ئاخېزی مکەروە و سەرەو ڕێزیشا پۍ منامنورە.  من ئا ۋەعدو سەرکۊتەیەی کە پایشام دان واوەیش کەروە. نەورۊزو ٢٠٢٣ۍ  بۊ بە ساڵەو بەدیئاماو ئازاڎیی جەستەیی ڕابەر ئاپۊی. جارێۋەتەر نەورۊز جە گرڎو گەلا پیرۊز بۊ. ئېمە بەئیراڎەو نەورۊزی سەرکۊتەی بەدەس مارمۍ.

گەریلاو یەژاستاری "تېکۊشین جودی"ە؛ ئېمە بە پرۊسېۋە فرە قورسەرە ۋیەرمۍ. پرۊسېۋەن کە چنەشەنە مدرامانۍ گۊرە ملۊڕاۋە قوربانی گۊرەش چنە دریۊ. بە ئیراڎەو مدرامانو مەزڵوم دۊغانی ئەرەکۊشایۍ بۍ ھامتا دژوو دوژمنی ئانجام دریۊ. مدرامانو گەریلای نیشانەشدا، کە ڕۊحو ئەرەکۊشاو چېردەساو چەوەسیاکاو کەمالەکا، حەجگیز دلېنە مەشۊ. ئېمە چڕیەو ئانەی کەرمۍ، کە ساڵەو ٢٠٢٣ۍ ئەرەکۊشاو ۋێما بیاونمۍ بە بەرزتەرین ئاست. چونکی ۋەختو ئانەی ئامان کە ژیایۍ ئازاڎ پېشکەش بە ڕابەر ئاپۊی و گەلەکەیما کەرمۍ. ئېمە گەریلاکۍ یەژاستاری سەرو ئی بنەمۍ دژو دوژمنی جەنگو مدرامان مکەرمۍ. ئېمە ئاماڎێنمۍ چی پرۊسەنە گرڎو ئا ئەرکا کە جە ئېمە چەمەڕا کریۊ جا بەجېش کەرمۍ، چونکی پېۋیساو گرنگا حەتا بتاومۍ بیاومۍ بە ماناو گرنگی نەورۊزو ڕابەر ئاپۊی. ئېمەی ژەنا سڵام کیانمۍ پۍ مدرامانو ڕابەر ئاپۊی. ٥٠ ساڵېن خەباتېۋە ۋەردەوام دژوو دوژمنۍ ملۊ ڕاۋە، کە گەرەکشا گەلوو کورڎی دلېنە بەرۊ. ڕابەر ئاپۊ ۋەڵێۋەبیەی پۍ ئا ئەرەکۊشایە مکەرۊ. ئامانجما ئانەن ئی ئەرەکۊشاو ڕابەر ئاپۊیە بە سەرکۊتەی تاجدار کەرمۍ.

گەریلاو یەژاستاری "ڕوکەن کۊبانی"ە؛  ساڵەو ٢٠٢٣ۍ پۍ ئېمە بۊ بە گۊرەتەرین ساڵەو ئەرەکۊشای و مدرامانی. ھومېڎەوارەنا نەورۊزو ٢٠٢٣ۍ  بۊ بە مەڵامەتو ئازاڎیی گرڎو گەلا ۋەرکەوتوو دلېڕاسەی و گرڎو گەلەکەیما، کە بومەلەرزەکەنە زەرەرشا ۋنە کۊتەن. ئېشو ۋنەقۊمیایا بومەلەرزەکەی ئېشو ئېمەیچا. جەژنەو نەورۊزی جە تەمامو ئەڎایا گەشمەرڎا پیرۊز مکەرمۍ. ئەڎۍ ھامڕاکاما ئەڎۍ ئېمەیچەنۍ. ئەشۆ بزانا، کە ونەو ھامڕایاما سەرو زەمینیۊ مەمەنۊۋە. ئېمە حەقە جە دوژمنی مسانمېۋە، با حیچ کەس گومانش چانەی نەبۊ.

ھ.ش