ئێشکگیری ئازاڎیی کە جە ٢٥ و حوزەیرانوو ٢٠١٢ ەیۆ شاروو ستراسبۆرگوو فەرەنساینە بە ئامانجوو ئازاڎیی جەستەیی ڕابەروو گەلوو کوردی عەبدوڵا ئۆجالانی و هۊرگێرتەی گۆشەگیری ئەنجام مڎریۆ، جە حەفتەو ٦١٤ ەمینینە بەردەواما.

چالاکییەکە هەر حەفتێوە جە تەرەفوو گرووپێوە جە وڵاتێوە جیاوازوو ئەوروپایۆ ملۊڕاوە، ئی حەفتە ٥ نوێنەرۍ ڕێکوستەی چەترەو مەجلیسوو ژەنا ئێزدی (سەمەژێ) جە ئەڵمانیاوە چالاکییەکەشا گێرت دەس.

واتەواچەو گرووپەکەی، نورێ ئالکیشە جە کەسایەتی ڕابەروو گەلوو کوردی عەبدوڵا ئۆجالانی و مدرامانکەرا زینڎانیانە سڵامش کەرد و یاڎش ئاردۆ کە هێزی جە تورکیا و کوردسانەنە هۊرچنیێوە تاریخی ئەنجامدریان و واتش: "سڵام جە ئیرادەو کوردی سەروو بناغەو فەلسەفەو ڕابەر ئاپۆی مکەرمۍ و هیواو سەرکۊتەی پۍ گرڎوو هەڤاڵە هۊرچنیەکا موازمۍ".

نورێ ئالکیشە ئەرەیاۋناش پۍ ئازاڎیی ڕابەروو گەلوو کوردی عەبدوڵا ئۆجالانی ئینۍ چۍ و واتش: "ڕابەرما ٢٥ ساڵێن جە گۆشەگیریێوە سەختەنە زینڎانیکریان. ئینە ئاسایی نییا، ئێمە ئاڎیی پێسە کەسێوە مەوینمۍ. فەلسەفە و ئایدۆلۆجیا و ئیرادەو ژەنۍ ئازاڎێن، بناغەو فەلسەفەو "ژەنۍ، ژیۋای، ئازاڎیی"ن کە گرڎوو ژەنا جەهانی ۋێشا چنەشەنە مویناوە. پی ئامانجۆ پێسە چەترەو مەجلیسوو ژەنا ئێزدی ئینەما کەردەن بە ئەرکوو ۋێما، چی مێڎانەنە پۍ ئازاڎیی ڕابەریما هاوار مکەرمۍ. ماچمۍ، بێ سەرۆکی ژیۋای مەبۆ، ژەنی ژیۋای ئازاڎیی".