تۆڕۊو مافەکا مرۆڤو کوردەسانی ئەرەیاۋناش کە ئێران بە بەهانې بەشداریکەردەی جە شۆڕشو "ژەنی، ژیۋای، ئازادی"نە، سزاو جە قەنارەدای سەرو ٥ کوردا خەڵکو ۋەرکۊتوو کوردەسانیرە سەپنا.
بەگوێرەو گوزارشتەو تۆڕۊو مافەکا مرۆڤو کوردەسانی پەنج زیڼانیې سیاسیې کوردی جە باڵبەسکریایا شۆڕشو
"ژەنی، ژیۋای، ئازادی" بە نامەکا عەلی قاسمی، پژمان سوڵتانی، کاوە ساڵحی، ڕزگار بەگزادە بابامیری و تەیفوور سەلیمی بابامیری جە لایەنو لقو یووەمو دادگاو شۆڕشو ئیسلامی ورمێوە، سزاو قەنارەیشا سەرەرە سەپیان.
هەرپاسە تەئکید کریانۆ، هەشت هاموڵاتیې تەرې کوردی بە نامەکا سیامەک هەیاسی، سواره عەزیززادە، هێمن کرمانج، حوسێن حوسێن زاده، جەلیل مەولوودی، ئەحمەد مامەزاده، جوامێر مام‌خەسرەوی و سالار داغداری بە تۆمەتۊو چالاكی سیاسی سزاو زینانیشا سەرەرە سەپیان.
بەگوێرەو هەمان گوزارشتې، ئا ١٤ هاموڵاتیې خەڵکو بۆکانینې جە ۋەرکۊتوو کوردەسانی و جە مانگۊو ئادارو ٢٠٢٣ بە مەڵامەتو بەشداریکەردەیشا جە شۆڕشو"ژەنی، ژیۋای، ئازادی"نە جە لایەنو هێزەکاو ئیتلاعاتو ئێرانیوە بە بێ ئەمرەو دادوەری باڵبەسې کریې و ڕەوانەو زینانو ورمێ کریې.
باس چانەی مکریۆ، ئا كەسې ماوەو چڼین مانگا بە مەبەسو هۊرگێرتەی دڎانیایپۊرەی زۆرەملێ وزیێنې ۋەرو ئەشکەنجەی بەڎەنی و دەروونیی قورسیوە و چېرو ئەشکەنجەینە ناچار کریێنې دڎان بە تاوانباربیەو ۋێشارە بنیا، ئی هاموڵاتیې جە ماوەو دەسبەسەربیەینە جە مافو دیدارو بنەیانەی و هۆرگێرتەی پارێزنەری بێبەشې کریێبێنې.
