لقو ٢٦و دادگاو شۆڕشو تارانی بە سەرداری دادوەر ئیمان ئەفشاری حوکمو جە قەنارەدایس سەرو ۋەرگریکارەو مافەکا ژەنا و ڕۆنامەنوویسەو کوردی پەخشان عەزیزیێرە، کە ماوەو ساڵېن جە ئێرانەنە دەسبەسەرەنە، سەپنا.

پەخشان عەزیزیە بە تاوانەو ئانەی گوایە " دژوو حکومەتی ئیسلامی جە سەرهۊردایەکانە چەکش بەکار ئاوردەن و سەرمەشقایەتی چالاکییەکاش کەردەن" و "یاخیبیەی"، سزاو جە قەنارەدایش سەرەرە سەپیان.

یوەم ئەرەنیشتەو دادگایەکەیش جە٢٨و ئایاری و ١٦و حوزەیرانو ٢٠٢٤لواڕاوە. حەرپاسە دمایین پرۆسەو دادگاییەکەی جە ٢٣ۍ تەمووزینە لواڕاوە و جە ئاکامەنە سزاو جە قەنارەدای سەرو پەخشان عەزیزیێرە سەپیا.

پەخشان عەزیزیە جە ٤و ئابو ٢٠٢٣ جەلایەنو هێزەکاو ئیتلاعاتو ئێرانیوە جە مەنتیقەو هەرازی تارانی دەسبەسەرە کریا و ڕۆو ١١و کانوونو یووەموو ٢٠٢٣ ڕەوانەو ژوورو  ژمارە ٢٠٩ی جە زیڼانی ئەوینی کریا کە ناوەڼێوە تایبەتی وەزارەتوو ئیتلاعاتیا.

یاگۍ ئاماژەینە پەخشان عەزیزیە جە پرۆسەو گێرتەیشەنە ماوەو ٤ مانگا بە تنی و بە شێوێوە سیستماتیک ئەشکەنجە دریێنە. جە گرڎوو مافە سەرەتاییەکاش پېسە مافوو چەمپنەکۊتەی چنی بنەیانەی و پارێزنەرەکاس بێبەشە بیێنە. هەرپاسە ئەنداماو بنەیانەکەیچش گیریۍ و دماو ۋنەپەرسایۆ ئازاڎۍ کریۍ.

پەخشان عەزیزیە وەڵتەر جە ١٦و کانوونوو دووەمو ٢٠٠٩ ینە بە تۆمەتەو بەشداری کەردەیش جە ناڕەزایەتییەکا دژ بە جە قەنارەدای جە تارانەنە گیریێ بۍ. دماو ئازاڎبیەیش دەسش بە ۋنەکۊڵیای سەرو ژیۋای ژەنا جە کورڎەسانەنە مکەرۆ.

پەخشان عەزیزیە، جە دمایین نامەشەنە کە جە زیڼانو ئەوینیوە کیاستەنش بەر، باسش جە ئەشکەنجەدای سیستماتیکی کەردەن.