ئەندامەو فەرماندەیی قەرارگەو مېیانی یەژاستاری شێردە مەزڵوم گابارە بەشداری بەرنامێوە تایبەتی مەدیا خەبەریش کەرڎ و نرخنایش پەی جەنگو گەریلای دژ بە دژمنی کەرڎ.

جە قسەکاشەنە شەڕدا مەزڵوم گابارە ئانەش باسکەرڎ جە گرڎ شۆنۍ وڵاتینە جەنگێوە سەخت ئینا ئارانە، هەرپاسە جە ۋەرکۊتوو مېیامینینە جەنگ هەن و کورڎەسان بیەن بە مېیانو جەنگی یەرەمی جیهانی.

مەزڵوم گابارە باسس چانەیە کەرڎ جەنگەکۍ وەڵۍ ٣ۍ تەمموزینە تەنیا جە بڕۍ ناوچۍ دیاریکریێنە بێنۍ، وە بە شێوێوە ناوچەیی ڕاوەبەرکریێنۍ و واتش: "وەڵۍ ٣ۍ تەمموزینە جە ٢٢ۍ نیسانینە ئەردۆغان سەردای عێراقیش کەرڎ و پەیمانێوە ٢٦ خاڵەش ئیمزاکەرڎە. جە دلېینەو پەیمانەکێنە بابەتو جەنگ دژو ئێمە جە هەرێمەکاو پارېزنای مەدیاینە بۍ. چا ڕوۆ هەم خیانەتو پەدەکەی زیاتەر بەرکۊت و هەمیچ جە لایەنو پەدەکەیۆ جە گرڎ ڕوێوە ڕا پەی ئەرەگیریەکا سوپاو تورکی کریاوە. جەنگ جە هێڵەکاو زاپی، گارەی جە ئامێدی، کەشو جودی، کەشو گەشمەرڎە یونسی، کەشو گەشمەرڎە چەکڎارینە بە سەختی ڕووەمڎۆ. هەرپاسە جەنگ جە هەرێمو ۋەرنیشتوو زاپی دژوار بی."

شێردا مەزڵوم گابارە کارە ئەرەگیریەکۍ دۊڵەتو تورکیش سەرو خاکو پانیشتوو کورڎەسانی مقارنە کەرڎۍ بە ئەرەگیریەکا دۊڵەتو تورکی جە ساڵەو١٩٩٠ سەرو سەرنیشتوو کورڎەسانی و واتش: "پېسە چنی جە سەرنیشتەنە بە ئۆپراسیۆنە سەروازییەکاش دەگایەکۍ سەرنیشتوو کورڎەسانیش چۆڵۍ کەرڎۍ، پاسە ئیساتێچ دماو ٣٠ ساڵا هەمان چێو سەرو دەگایەکا پانیشتوو کورڎەسانیرە مسەپنۆ و دەگایەکا چۆڵۍ مکەرۆ و سۆچنۊشا. دەگاو ئاشووریەکا سۆچنۆنە. دەگاو موسڵمانەکا سۆچنۆنە. جە کورڎەسانەنە تەنیا جەنگو کۆڵۆنیالیزمی نیا؛ پەنەوازا ئینە بوینیۆ. وەڵتەر ئا جەنگەی کریۍ جە دژو کۆڵۆنیالیزمی بۍ. بەڵام جە ئیساتێنە جەنگەکە جە ئاژێوە هامشێوەو کۆڵۆنیالی، ئەرەگیری و چەسپناینە پێناسەش مکەرمۍ. جەنگو قڕکەرڎەی ڕاوەبەر مکریۆ.

نمەیارا ڕووبەڕوو گەریلای باوە

میقدارێوە فرە جە چەکی کیمیاوی بەکاربەرانە. جگە چینەی جە تاکتیکو دژمنینە فاڕیایۍ پی جۊرە بۍ. پېسە ئانەی وەڵتەر ڕاسەوخۆ هێزەکاش کیانۍ سەرو مەڕەکا گەریلای. جە ئیساتێنە یاوانەنە چانەی کە نمەتاوۆ مەڕەکا تێکبڎۆ، چێش مکەرۆ؟ جە شۊنێوەنە کە فرە دوورا جە مەڕەکاماوە، چا شۊنێنە کە هەمڕێکێما نیەنێش چنە، بنە بە هێزەکاش موزۆنە.

پېسە ئانەی کە جە هێڵۊو زەرگەلێنە بنەشا وستە. گەرەکشا چێش بکەرۆ؟ گەرەکشا عیلاقەو بەینو هەرێمەکا بڕۆنە. زانیاریچ سەرو ئۆپراسیۆنەکا خنێرەی هەن. قسەوباسو ئانەی هەن موچیۆ، دماو ماوێوە تەری پەدەکە و عێراقیچ بەشدارۍ ئی هەوڵە ئەرەگیریە بانۍ، هێڵۊو گۆشینەی کۆنترۆڵ بکەرا، گرڎوو لۆلانی ئەرەگیر بکەرا. هێڵۊو قەندیلی و خنێرەی پڕچنۆ، وە هێڵۊو گارەیچ جە قەندیلی بڕۊرە، هەرپاسە هێڵۊو گارە، مەتینای و زاپی جە یۆی بڕۆرە. بڕیەیرەو پەیوەندییەکا، ئاستەنگکەرڎەی هێزەکاو پەشتیوانی و چڼین مەرامۍ تەرۍ دژمنی هەنۍ. ڕیبازێوە چامنە مگېرۆنە ۋەر کە فرە جەنگو هەڤاڵا نەکەرۆ و ۋێش جە جەنگی ڕووبەڕوو بیەیۆ ڕاسەوخۆی بە دوربگێرۆ.

فشارێوە فرە مکریۆ سەرو گەلی. وەڵتەر جە مېڎانەکانە گەریلا و گەل پێوەرە بێنۍ. گەل دڵوەش بۍ کە گەریلا چی کەشانە بێنۍ. هەست بە دڵنیایی ۋێشا کەرێنۍ. بەڵام دماو هرووژمەکا سوپاو تورکی، خەڵکو ئا ناوچا بە ناچاری کۆچبەرۍ بیۍ.

پەنەوازا ناڕەزاییەکۍ جە ۋەرا ۋەرو ئەرەگیرینە زیاتەرۍ با. بە تایبەت جە لایەنوو گەلوو پانیشتیماوە؛ خەڵکو ئامێدی، بامەڕنێ، شیلادزێ، پەنەوازا ناڕەزایۍ ۋێشا بەربڕا. پېسە چنی دلۍ خەڵکو شیلادزێنە کلتوورێوە قەوەتو مڎرامانی بیەیش هەن. گرڎ کەسێ ناڕەزان جە ۋەرا ۋەرو ئی ئەرەگیریەینە. بەڵام ئی ناڕەزایۍ نە فاڕیێنۍ پەی چالاکی و ناڕەزایۍ قەوەتتەری.

بێگومان دەورو پەدەکەی چینەینە هەن. هەوڵمڎۆ دلۍ خەڵکینە پاسە وەڵاش بکەرۆوە چی ناوچانە چونکی جەنگ هەن ۋەرووئانەی پەکەکەش ئینا چنە. ۋێش گەریلا عەیامێوەن ئینا چۍ، ٤٠-٥٠ ساڵېن گەریلا چۍ بیەیش هەن. ئا ماوە هرووژم سەرو گەلی نەبۍ، کەچی چی دوەساڵە دماینەینە ئی پروپاگەنڎۍ کە پەدەکە دەسشپنەکەرڎێنۍ وەڵۍ بیێنێوە. مشۆم عال چینەی بیاومێنە.

هەڵوێسو گەریلای جە جەنگەکانە

جە ۋەرا ۋەرو ئی جەنگەینە هەڵوێسو گەریلای چنینا؟ هەروێش گەریلا جە بابەتو پیمەرەکا گەریلایەتی مۆدێرنێتەی دیموکراتیکینە ۋێش قوڵکەرڎەنۆ. پەی ئی مەڵامەتیچە سەرو زمینی و چێرو زەمینینە تیمەکێش ئاماڎێنۍ، جە ئاسمانیچەنە چالاکی گەریلای ئەنجام مڎریۆ. وە تایبەتتەر چالاکییە ئاسمانییەکێما کاریگەری فرەشا وەشکەرڎەن. یەکینەو گەشمەرڎە ئاخین موشی ئەرەمەرزیا. جە هەمان کاتەنە چالاکیەکۍ یەکینەو گەشمەڕدە دۆغان زنارۍ بیەیش هەن. جە ئاسمان و زەمینیچۆ گورزە جە دژمنی مڎریۆ. پی جۆرە سیاسەتە پراکتیکییەکۍ دژمنی جە مېڎانەکەنە دلێنە بریا.

پەدەکە مەیلو ۋێش کۆیلایەتی مکەرۆ

جە حەقەتینەنە دۆڵەتو تورکی جە جەنگەنە دمایش پنە ئامان. بەتایبەت جە هەرێمو گەشمەرڎە دەلیلینە جە ۋەرنیشتوو زاپی دمایش پنە ئامان. ۋەرو ئی ئاژە مەڕیایشە ناچاربیەن چنی هێزی جیا جیای عیلاقە و هامپەیمانی وەش بکەرۆ. هەر پۊکەی ئانڼە دەورو خولو عێراقی مڎۆ. وەڵتەرۍ هەر سڵامێوەیچ جە عێراقی نەکەرۍ، کەچی ئیساتۍ ئینا ئاژێوەنە دەسشا ماچ مکەرۆ. گرڎ هەوڵ و مەرامێوەش پەی ئانەینە عێراق بەشداری جەنگو ئەرەگیری بکەرۆ.

پەدەکەیچ بە مەیلو ۋێش و بە دڵ  کۆیلایەتی پەی دۆڵەتو تورکی مکەرۆ. پەدەکە هەر ۋێش دلۍ ئی هرووژمە ئەرەگیریانە بۍ. مەیلش بۍ کە زیاتەر بەشدار بۆ. جە ۋەرا ۋەرو گەریلاینە شکسش ئارڎ، جە ئاژەو زۆرانبازێوە شکسوارڎەینە کە جە ملەملانێنە سێر نەبیەن. جە ئیساتێنە چێش مکەرا؟ جە ۋەرنیشت، جە سوریانە چەتەکا مارانە پانیشتوو کورڎەسانی گرڎ ڕێوەشا تاقی کەرڎۆ. ئیتر نمەزانمۍ جە ئاینڎەنە چێشی تەر مکەرا."

جە بەردەوامینە شێردا مەزڵوم گابارە ئاماژەش پانەیە دا کە دۆڵەتو تورکی دۆڵەتێوە قڕکەرا و واتش: " دۆڵەتو تورکی فاشیستی قڕکەری چێش مکەرۆ؟ جە کورڎەسانەنە قڕکەرڎةی ئایدۆلۆژی ڕاوەبەرمکەرۆ، ویر و هۆشو مرۆڤەکا قڕمکەرۆ، قڕکەرڎەی کۆمەڵایەتی ئەنجام مڎۆ، قڕکەرڎەی ژەنا ڕاوەبەر مکەرۆ. گرڎ کەس و چێوۍ قڕ مکەرۆ. جە وەرا وەرو ئی مەرامەیشانە، تاکە هێزێوە سەرەش نەنامنانەرە، جەخت سەرو مڎرامانی مکەرۆوە و بە گرڎ جۆرێ ئەرەکۊشای مکەرۆ گەریلاکۍ ئاپۆیینۍ."

'ئێمە و پەدەکە مقارنە بە یۆترینی نمەکریەیمۍ'

شێردا مەزڵوم گابارە دەسنیشانشکەرڎ، گەر بە تەنیایچ مەنمێوە و گرڎما گەشمەرڎێ بیمۍ ڕا بە مەنەیۆ دژمنی نمەڎەیمۍ و کورڎەسانی نمەکەرمۍ بە یار و دۆسو دژمنی و واتش: "با ئێمە و پەدەکە تێکەڵ بە یۆی نەکریەیمۍ  و مقارنەما نەکەرا چنی پەدەکەی. هەر ۋێش جە حەقەتینیچەنە هیچ کاتێ نمەتاویۆ ئێمە و پەدەکە مقارنە بە یۆترینی بکریەیمۍ. ڕۆحی ئاپۆیی جە دڵ و هۆشو ئا جوانانە یاگەگیر بیەن.

ئێمە هێزو دڵنیایی ژیۋای ڕابەرایەتیینمۍ. ئێمە هێزی سەرەکیێنمۍ کە ۋەرپەرسێنمۍ جە ڕاگێرتەی جە قڕکەردەی گەلوو کورڎی. هەر ۋەرو ئینەیچا ئارۆنە جە زاپ، خنێرە، ئاڤاشین، حەفتانینە ئانەی گەریلا بەهێز و بە ئیراڎە مکەرۆش؛ باوەڕی و قەوەتبیەی دڵسۆزی ۋێشا، ڕۆشنا جە ئامانجەکاش. حەجگیز جە ئامانجەکاش نمەکیشیۆوە. سەرچەمێوە بنەڕەتی هەن کە هێزش چنە هۆرمگېرمۍ. هەر پۊکەی نە بە تانک و تۆپ، نە بە سیخوڕی، نە بە هامپەیمانی بەستەی خیانەتکارا نمەتاوا جە دژو گەریلای مرداوە و گەریلای ناچار بە کیشیایۆی بکەرا.

گەریلا ئا هێزەنە کە فکر چەکش پێوە کەردێنێ یۆ

ئارۆنە مدرامانێوە بێهامتا کوردسانەنە مکریۆ، مدرامانێوە گەورە،ڕاسینە پەنەوازا مدرامانبوینیۆ، ڕاسینە نمەتاومێ ئی مدرامان و جەنگەیە بە ئینسانییاو دنیێ بیاونمێ. کە گرد ڕوێوە شایسەو ڕۆمانێوەن. وەزیرێوەشا بە نامێ یەشار گولەریوە، چند ڕوێ وەڵێ ئیساتێنە تەەلەفزوێنۆ قسێش کەردێ، نەزانێچ قسێ بکەرۆ. ئی جەنگەش شوبهنا بە جەنگوو سەربەوێبییەی ئاماژەش پانەیە دا، هەرێمەکاو پاریزنای مەدیاینە  کە ئادێ پێسەو هەرێموو پەنجە کیلیتی نامێش مارا. ئیساتێنە جەنگوو سەربەوێبییەی مکەرا. پێسەو جەنگوو ڕزگاری مویناش، پەنەوازا ئێمەیچ بە شێوێوە یۆگێرتە ئی جەنگەیە بوینمێ حەر وێش فەریلا ئیما مدرامانەنە و بەردەوامیچ مبۆ.

مزانمێ و ماچمێ پلانیشا ئانێنە کە گەریلای گولانە بکەراوە، یا دورێشا بوزاوە، ئینە پلانیشانە،ئانێ کە  دوژمنایەتیشا مکەرا ئینەی ماچا، وەلێ گەنجەکێما دڵوازێ چەکەکاسانێ، مزانا چیشا بەکارێ مارا، هێزەکاو هگەریلای تەنیا هێزوو چەکی نییەنێ بەڵکوم چەنی چەکی فکریچشا یەکانگیر کەردەن. گەریلا ئا هێزە نییەن کە تەنیا پەی ئامانجێوی تاکتیکی و تەنگی وەش کریابۆ، ڕابەر ئاپۆ گەریلاش پێسەو پارێزنەروو ژیوای ئازادی هورسەنگنا. ڕابەر چا وەختەوە گەریلاش ئەرەمەرزنا فرە گرنگییش بە کەسایەتیی گەریلای دا و ، کەسایەتیی گەریلایش پێسەو ژیوای ئازادی و پێسەو نموونێوە ژیوای ئازادی نیشانە دا.
پەدەکە کوردستانی مورەشۆ

پەنەوازا وەراوەروو پەدەکەینە ئی پەندێ بوچیۆوە، 'کڵاوەکێش کەوتەرە ورا و کەچەڵییش بەرکەوت'. هەڵای بڕێو هێزێ هەنێ، بەتەمامای پەدەکەی نمەشناسا. وەلێ ئێمە خاسشا مشناسمێ. کوردسانەنە دوێ خەتێ هەنێ،خەتەو خیانەتی و نۆکەری کە پەدەکە نوێنەرایەتییش مکەرۆ و خەتەو وەڵاتپارێزنیی شۆڕشگێڵنە ئاپۆییا. پەدەکە وەڵتەریچ نوێنەرایەتیی خیانەتی و نۆکەرایەتییش کەردەن. ئیساتێچ مکەرۆش و نموونێوە ڕۆشن مەیدانەکانە موینۆ، حەر وێش نامەکێش غەڵەتەنە بە وێشا ماچا پارتی دیموکراتوو کوردسانی، وەلێ نە دیموکراتێ نە کوردسانیێنێ،کوردسانیبییەی قسێ و جلێ کوردیێ نییەنێ، وەختێچ ملا ئەنقەرە  بە ئینگلیزیی قسێ مکەرا. حەر نمەتاویۆ بە پەدەکەی بوچیۆ هێزێوە کوردسانی، هیزی کوردسانی قەت کوردسانی نمەورەشۆ، ئێدێ کوردسانی مورەشا و کەراش بابەتوو بازرگانی.

پەدەکە گەرەکشا عێراقیچ تێکەڵوو ئەرەگیری بکەرۆ

ماچا تەنیا وەراوەروو پەکەکەینە ڕێبازێوە پاسنە نیشانە مدا،ماچا هجوومە ئەرەگیرییرکێ سەروو کوردسانیوە نییەنێ، تەنیا دژوو پەکەکەینێ، پەنەوازا وەنەشا بپەرسیۆ تارێخوو پەدەکەی چێشا و چێشش چەنەن؟ خاسا عەلی عەسکەری پەکەکە بێ؟ سەید ئەلچی پەکە بێ؟ ئەی دکتۆر شڤان؟ چە چیوێ بە نامێ کوردسانی ئازادیوە بۆ پەدەکە دوژمنشا. ئیساتێنە پەدەکە جەخت چانەیە مکەرۆوە، کە هێزە عێراقییەکا بەشداروو ئی پیلانگێڵنییە بکەرۆ، چونکوم گەر پاسە کەرۆ ڕەوایەتی بە وێش مدۆ، عێراق یاگێوەنە کە بێشکێ ئینسانبییەینە، وەلێ پێسە گەرەکشانە بکەراش بە قەبرسانوو ئینسانبییەی".

ئاخرۆ شەڕدا مەزڵوم گابار سەرنجەش وستە سەروو ڕێءککەوتەی بەغدای و هەولێری و واتش:"ڕەهەندی تەرسناکوو ئی ڕێککەوتەیە ئانەنەپەنەوازا گرد کەسێوە، جە جیددیەتوو ئا تەرسێ بیاوۆنە، بەتایبەت هێزە کۆمەڵایەتییەکاو دلێ عێراقی هاگادرێ ئینەیە با و ناڕەزایەتیی قەوەت نیشانە بدا و ئی ڕیککەوتەیا قبووڵێ نەکەرا و دژشا مدراوە."