ئەرسۆی: وڵات بیەن بە نمونێوە جە مافیای
تاتەو سەدات ئەرسۆی، کە جە مێرسین وەختوو هجومکەردەی سەروو قاوەخانېوەنە، گیانش جە دەس دا، زیرڤە ئەرسۆی ئاماژەش پانەی دا کە کوڕەکەش جە ئاکاموو جەنگوو چەتەکانە گیانش جە دەسدان، واتش وڵات بیەن بە نمونێوە جە مافیای.
مێرسینەنە جە وەختوو هجومکەردەی سەروو قاوەخانێوە سەدات ئەرسۆی ٢٤ ساڵ و ژەنێوە کە نامەکێش ئاشکرا نەکریێنە عەمرەو خوڎایشا کەردە و جوانېوە ١٧ ساڵیچ بە سەختی زامڎاربی. تاتەو ئەرسۆی ئاماژەش پانەی کەرڎ کە کوڕەکەش جە وەختوو تەماشەکەردەو ترۊمبێلە ورەشییاکەو ساحیب قاوەخانەکەینە، جەنگێوە جە بەینوو پۆلیسی و چەتێوە مادەهۆشبەرەکانە وەش بۆ و گولېوە وەروو سەرەیش گنۆو عەمرەو خوڎای کەرۆ.
تاتەو زیرڤە ئەرسۆی باسش جە ڕووەداکەی کەرڎ و واتش: "ئی هجوومە ۋنەپەرسایۆ بیەن جە بەینوو چەتەکانە و جە ئاکاموو ئینەینە کوڕەکەش عەمرەو خوڎایش کەردێنە. جە ڕۊو ڕووەداکەینە ئەوەکۊڵیای فرە کریان بەڵام تاوانبار نەگیرییان و داواشکەرڎە وەرپەرسوو کوشتەی کوڕەکەیش گیریۆنە" زیرڤە ئەرسۆی ئاماژەش پانەی دا پۆلیس دلۍ ئی هجومەینە بیەن. تاتەو ئەرسۆی واتش: "ماوەو چن ساڵێوەن ئامېنۍ مێرسین، کوڕەکەم ماوەو حەفتێوەن بیەن بە تاتە و زاڕۊڵێوە مەلۊتکەش جییا ئاست".
ئەرسۆی باسش جە بکوژوو کوڕەکەیش کەرد و واتش: "ماوەو ١٥ ڕووا بۆ ئی چەتۍ جە ئەستەنبوڵۆ ئامېبێنۍ پۍ وۍ و یانێوەشا سەروو جاڎەکەیۆ بەکرێ گرتەبۍ، فرەو جاری لوێنۍ پۍ قاوەخانەکەی. ئا ڕووەی کە ساحیب و قاوەخانەکەی گێڵۊوە و جە وەختوو لووایشەنە پۍ قاوەخانەکەی ئاسایش مڎۆ سەروو قاوەخانەکەیرە و جەنگ ڕووە مڎۆ، گەر پۆلیس ئی گرڎ چێوییە بزانۆ ئانە چنی مەتاوۆ زانیاری سەروو ڕووەداکەی بزانۆ".
وڵات بیەن بە نمونێوە جە مافیای
تاتەو ئەرسۆی باسش چانەی کەرڎ کە جە وڵاتەنە ۋنەپەرسایۆ چی جۆرە کەسا مەکریۆ و واتش: "وڵات بیەن بە نمونێوە جە مافیا خانەی، پۍ بەدەسئاردەی زەڕی گرڎ چێوۍ ئەنجام مڎریۆ. هەتا مافوو ئی ڕووەدایە هۊرنەگێروو دەسش چنە ۋەرمەڎەو، گەر لاو حکومەتیوە گرنگ نەبۆ، ئانە خودوو ۋېم ئانەی کەروو".
