ڤیەناو پایتەختو نەمساینە سەرو داواو دەم کوردی، گەشمەرڎەکەرڎەو ڕۆنامەنوویسا گوڵستان تارۍ و هێرۆ بەهادینی جە لایەنو دەوڵەتو تورکیوە ۋەرودەم و کونسوڵخانەو عێراقینە شەرمەزار کریا.

هامسەرۆکو گلێرگەو ئازاڎیی، ئەحمەڎ زیرەک واتش: "ئینە پلانەو قڕکەردەی و پاکتاوین. مەرامشا دلێنەبەردەی گەلی و ژەنا کورڎین. ئەرەکۆشایما ۋەرا ۋەر پی هرووژما بەردەوام مبۆ".

دماتەر ئەرەیاۋنێوە بە زۋانی ئەڵمانی ۋنیاوە، وچیا: "دەس جە هامکاری سیاسەتو جەنگو تورکیای هۆرگێردۍ، کۆمکوژی دژو کورڎی مردندۍ".

هەرپاسە وچیا: "هەر کەس بێدەنگ بۆ، هامبەشو ئی کۆمکوژییەینە، دلێشانە دەوڵەتو نەمسای".

هامبۆرگ

شارو هامبۆرگو ئەڵمانیاینە گلێرۆبیەیۍ ناڕەزایی ئەنجامدریا.

گلېرۆبیەکەی بە سەرمەشقایەتی مەجلیسو ژەنا ڕۆژبینی ڕێکوزیا، نوویسەرە و چالاکەو مافەکا ژەنا ئەڵمانیای، ئانژا فلاخە ئەرەیاۋناش دووە ڕۆنامەنوویسە ژەنەکۍ بە ئەنقەس کوشیێنۍ، جەختش کەردۆ هرووژمەکە دژو ئیراڎەو ژەنۍ ئازاڎێن.

پەرلەمانتارو پارتو چەپو هامبۆرگی، جانسو ئۆزدەمیر ئەرەیاۋناش ئی کۆمکوژییەو ڕۆنامەنوویسا ژەنۍ قبووڵ نمەکریۆ، وڵاتا ۋەرنیشتی هەر جۆرە هامکاریێوە ئابووری و سەروازی بڎا بە ئەردۆگانی بانۍ بە هامبەشۍ تاوانۍ و کۆمکوژی.

ئارنهایم

پەی هەمان مەبەسی شارو ئارنهایمو هۆڵەنداینە چالاکی ئەنجامدریا. جە چالاکییەکەنە دەوڵەتو تورکی و پەدەکەی هامکارش شەرمەزارکریۍ.