٣٤ مانگێن زانیاری دەربارەو ڕابەروو گەلوو کوردی عەبدوڵا ئۊجالانی دەس مەگنۊ، ئێشکگێریی داڎپەروەری ئامەد و وان و ئیستەنبوڵ و ئەڎەنە و مێرسیننە و چی دمایچۊ مێرسیننە لە چوارچوەو کەمپەینی میاننەتەوەیی "ئازاڎیی پەی بۊ عەبدوڵا ئۊجالانی، چارەسەری دیموکراتیک پەی پەرسەو کوردی" بەرڎەواما.

 چالاکییەکەو ئامەدینە، چنڎین کەسایەتیۍ و لایەنۍ یاگە جیاوازەکاوە سەردایشا کەرد، پەشتیوانیی وێشا پەی چالاکا و قەوماو زینڎانییا ئەوەخوای کەردۊ، تیشکەشا وستە سەروو گرنگیی ئازاڎیی جەسەیی ڕابەروو گەلوو کوردی عەبدوڵا ئۊجالانی، چونکوم بە گۊشەگیرییش، گەلوو کوردیچی ئینا گۊشەگیریینە.

چالاکۍ داواشا کەرڎە پەشتیوانی وەنەو چالاکییەکەی زیاتەر کریۊ و پەی ئی مەبەستەیە داواشا جە گرد لێوە کەرڎە بەشدارۍ با.

چالاکییەکەو ئەڎەنەینە، یۊ جە چالاکا، جەواهیر تەمەلە، ئەوەخوایش کەردۊ پێسە ئەڎێوە گەرەکش نیا گەنجاو کوردی و تورکی مرا، واتش کرێڵوو ئاشتی ئینا مشتەو ڕابەروو گەلوو کوردی عەبدوڵا ئۊجالانینە و داواش کەرڎە، سەرەڕاو گردوو هەلومەرجەکا ڕابەروو گەلوو کوردی عەبدوڵا ئۊجالان ئازاڎ  کریۊ.

چالاکییەکەو مێرسینینە هامسەرۊکەو کۊمەڵەو پەشتیوانیی بنەیانەو  زینڎانییا و حکومدریایا چوکرۊڤای، ئەرگین ئاڵتونتاشە واتش، پەیاموو چالاکا ڕۊشنا، پەنەوازا گۊشەگیری سەروو ڕابەروو گەلوو کوردی عەبدوڵا ئۊجالانی و زینڎانییە سیاسییا دماییش بۍ و پەرسەو کوردی بە ڕای دیموکراتیکە چارەسەرە کریۊ.  

یوە جە ئەڎاو زینڎانییا، ساڵیحە ئومێدە واتش: "ڕابەرما ئینا زینڎانەنە، با گۊشەگیری سەروو ڕابەریما و زینڎانییا ورگیریۊ، با ئی ستەمە دماییش بێ. داواو من پەی گردوو ئەڎایان، با گردشا پەشتیوانێما با، ئی گۊشەگیرییە ورگیریۊ و ئاشتیی بۍ دی".

 چالاکییەکەو ئیستەنبوڵینە، قومری ئاکگوڵە، واتش: "با بیمۍ بە دەنگوو زینڎانییا، بیمۍ بە جوابێوە پەی داواو زینڎانییا. پەنەوازا گرد لایۍ کۊشیای گەورەتەر کەرا".

چالاکییەکەو وانی، ٢٩ ڕوێن بەرڎەواما، پەرلەمانتاراو دەم پارتی واننە، گوڵدەرەن ڤارلی و زوڵکوف ئوچار و چنڎین کەسۍ تەرۍ سەروو چالاکییەکەیشا دا و چنڎین جار درووشموو "بژیوۊ مدرامانوو زینڎانی" بەرز کریاوە.