مڎرامان سەرو سنوورو کۆبانێنە دژو هرووژمە ئەرەگیریەکا پەی سەرو سەرنیشتی و ۋەرکۊتوو سوریای بەردەواما. جە ئێشکگیرییەکەنە پەیامدریا "ئێمە پەشتیوانی جە پەیامەکەو عەبدوڵا ئۆجالانی مکەرمۍ".
هامسەرۆکو شارەوانی خەلفەتی محەمەد قەرەیلان جە چالاکی سەر سنوورو پیرسوس_کۆبانێنە ئەرەیاۋناش ۋەرنیشت مۆدێلێوە تازەو ژیۋای کەردەین و پەنەوازا پېسە نموونەی هۊرگیریۆ، واتش: "تا دما نەفەس پەشگیری کۆبانێ مکەرمۍ".
چالاکی ئێشکگیری دژو هرووژمەکا دۆڵەتو تورکی و چەتەکا سوپاو نەتەوەیی سوریای (SNA) پەی سەرو سەرنیشت و ۋەرکۊتوو سوریای سەرو سنوورو پیرسوسو ڕحای و کۆبانێنە، بە سەرمەشقایەتی دەم پارتی و دەبەپەی و تەژەئای، ١٥ ڕووێن بەردەواما.
جە چالاکییەکەنە وێنەو گەشمەرڎا ڕۆنامەنوویسی نازم داشتانی و جیهان بیلگینی هۆرگیریا، هامسەرۆکو شارەوانی خەلفەتی محەمەد قەرەیلان ئەرەیاۋناش ڕاو ئاشتی بەردەواما و پېسە هەمیشەی خاوەنداری جە کۆبانێ مکەرا، واتش: "ۋەرنیشت مۆدێلو ئاشتییا، ئەر گەرەکتانە جەنگ جە سوریا و پشێوییەکۍ تورکیای دمایشا پنە بۍ، ۋەرنیشت عالتەرین نموونەن".
جە درێژەنە محەمەد قەرەیلان واتش: "ئێژا ئۆجالان چڼین ساڵێن ئینا گۆشەگیرینە، جە ساڵەکا نەوەڎەکاوە تا ئیساتۍ پەی ئاشتی ئەرەکۊشۆ. جە سنوورو کۆبانێوە سڵامش پەی کیانمۍ. ئێمە پەشتیوانی جە پەیامو ئێژا عەبدوڵا ئۆجالانی مکەرمۍ".
چالاکییەکە بە چەپڵۍ و درووشمۍ دمایش پنە ئاما.
