ئا ئەڎایۍ بەشدارییشا جە ئێشکگرییەکا داڎپەروەرینە کەردەن باس چانەی کەرا کە پۍ ئازاڎیی جەستەیی ڕابەروو گەلوو کوردی عەبدوڵا ئۆجالانی، مشۊم گۆشەگیری هۊرگیریۆ و پۍ فراوانکەردەی و خۊتانکەردەی جە چالاکیەکەیشا بانگەوازشا ئەرەیاۋنا.
پەی ئازاڎیی جەستەیی ڕابەروو گەلوو کوردی عەبدوڵا ئۆجالانی و چارەسەروو پرسوو کوردی جە چنڎین شارێنە کەسوکاروو زینڎانیا دەسشا بە چالاکی ئێشکگیریی داڎپەروەری کەردەن.
ئامەڎەنە جە بیناو رێکوستەو دەم پارتینە ئێشکگیرییەکە بەردەواما و بەشدارا ئێشکگیریی داڎپەروەری سیستموو گۆشەگیری جە ئیمراڵینە شەرمەزار کەرا و داواکارێنۍ کە گۆشەگیری هۊرگیریۆ و ئازاڎیی جەستەیی رابەروو گەلوو کوردی عەبدوڵا ئۆجالانی مسۆگەر کریۆ.
ئێمە داواو ئاشتی و داڎپەروەری کەرمۍ
عەفیفە کارتاڵە ئەڎاو محەمەڎ کارتاڵی کە زینڎانوو جۆروو ئەی ئانتالیاینە زینڎانییا ئەرەیاۋناش: "حەفتەی وەڵین لووانی پۍ سەردای کوڕەکەیم، ورەش بەرزبۍ، بەڵام داخەم مەشۆ ڕاوەبەرایەتی زینڎانەکەی ستەمشا ۋەران ۋەر کەرا. کوڕەکەم جە ماوەو ١٠ ڕووا مانگرتەی جە واردەینە ٦ کیلۆگرامۍ جە کێشیش جە دەسدان. ڕاوەبەرایەتی زینڎانی مۊچیاریەکا تایبەت بە زینڎانیا مانگرتەی جابەجێ مەکەرۆ. ئاوی و مەکی بە زینڎانیا مەڎۆ. ئێمە داواو داڎپەروەری کەرمۍ. ئێمە پېسە ئەڎایا داڎپەروەریما گەرەکا. داواکارێنمۍ رابەر ئاپۆ بتاوۆ چنی پارێزنەرا و بنەیانەکەیش دیڎار ئەنجام بڎۆ. داواو ماڕای گۆشەگیری سەروو رابەریما کەرمۍ. ئەگەر گۆشەگیری سەروو رابەر ئاپۆی مەڕیۆ، ئا وەختە گۆشەگیری سەروو زارۊڵەکایچما هۊرگیریۆ. ئێمە تەنیا داواو داڎپەروەری و ئاشتی کەرمۍ. تا مانگرتەی جە واردەی رۆڵەکاما بەردەوام بۆ ئێمەیچ درێژە بە ئێشکگیریی داڎپەروەری مڎەیمۍ. بەیدۍ با پېوەرە چالاکیەکەی فراوان کەرمۍ".
ئێمە ئی ستەمیە قبوڵ مەکەرمۍ
زەکیە یڵمازەیچ پۍ پەشتیوانی جە ئێشکگرییەکەی بانگەوازش ئەرەیاۋنا و واتش، "گەرەکمانە ئی ئەشکەنجەی جە تورکیانە هەن دمایش پنە بۍ. ماچا چی وڵاتەنە داڎپەروەری هەن، بەڵام ئێمە داڎپەروەری مەوینمۍ. گەرەکمانە رۆڵەکێچما جە مافوو زینڎانیا ئیسفاڎە کەرا. بە یاسای دوژمنکارانە مامەڵە چنی رۆڵەکاما کەرا. رۆڵەکێما زینڎانەنە رووبەڕوووو ئەشکەنجەی و ستەمکاری باوە. ئێمەی ئەڎایا وەختۍ زارۊڵەکاما چا ئاژەنە موینمۍ جەرگما ژانی کەرۆ. رۆڵەکێما بە ناڕەوا زینڎانی کریېنۍ. ئێمە ئەڎێنمۍ و درێژە بە کۊشیای ۋېما مڎەیمۍ و ئا ستەمیە قبوڵ مەکەرمۍ. پۍ ئانەی پەشتیوانی جە مدرامانوو رۆڵەکاما کەرمۍ ئێمە ئینایمۍ چۍ. تا جوابوو داواکاری رۆڵەکاما مڎریۊوە ئێمە چۍ بیمۍ و دەس جە ئێشکگیریی داڎپەروەری هۊرمەگێرمۍ".
گۆشەگیری دژوو مرۆڤایەتیا
فاتمە ئاداکە باسش چانەی کەرد کە گۆشەگیری دژوو مرۆڤایەتیا، مشۊم هۊرگیریۆ و ئەرەیاۋناش: "ڕابەر ئاپۆ ئارۊنە گۆشەگیرکریان، ئێمە ئانەی شەرمەزار کەرمۍ. زینڎانیا سیاسی گۆشەگیرکریېنۍ، ئێمە ئا ئەقڵیەتەیە شەرمەزار کەرمۍ. ئێمە داوا کەرمۍ گۆشەگیری سەروو ڕابەریما و رۆڵەکاما هۊرگیریۆ. پۍ ئانەی پەشتیوانی جە رۆڵەکاما کەرمۍ ئێمە ئینایمۍ چۍ. داواکاریما جە گەلەکەیما ئانەن کە پەشتیوانی جە کۊشیای ئێمە کەرا. ئانەی دەوڵەت ۋەران ۋەر بە ئێمەش کەرۆ ستەما، ئێمە ئا ستەمیە قبوڵ مەکەرمۍ. مشۊم گەلوو کوردی خۊتانکەردەی جە رابەر و ئیراڎەو ۋێش کەرۆ. قەناعەتم هەن کە کۊشیایما سەرگنۆ".
ئێمە درێژە بە کۊشیایما مڎەیمۍ
فاتمە چاگریشە دەسنیشانش کەرد کە گۆشەگیری سەروو رابەروو گەلوو کوردی عەبدوڵا ئۆجالانی مشۊم دەموودەس هۊرگیریۆ و واتش، "پۍ ئانەی گۆشەگیری جە زینڎانەکانە هۊرگیریۆ ئێمە ئینایمۍ چۍ. پېسە ئاڎایا ئێمە پەی ئانەی کوۍ بیێنمېوە. رۆڵەکێما جە زینڎانەنە پەی رابەر ئاپۆی دەسشا بە مانگرتەی جە واردەی کەردەن. پۍ ئانەی پەشتیوانی چاڎیشا کەرمۍ ئێمە ئینایمۍ چۍ. رۆڵەکێما ئینۍ زینڎانەنە، ئێمەیچ جبەروو زینڎانینە درێژە بە کۊشیای مڎەیمۍ".
