ڕوەکاو ١٢، ١٣ و ١٤ مانگەو کانوونوو دووەموو ٢٠٢٤ ڕێکوستەیەکاو ژەناو تەڤگەروو ئازاڎیی گلێرگەو کورڎسانی وەڵاتوو نوروێژینە بە دروشموو " ژەنی، ژیوای، ئازاڎی" بە هومێدوو بەرەو ڕێکوستەی پەی بەشڎاری جە شۊڕشوو ژەنۍ " بە هامکاریی ئاکادیمیاو ژەنۊلۊژی یوەم خولی پەروەردەییشا پەی ژەناو پانیشتوو کورڎسانی کەردۊ. خولەکەنە ١٥ ژەنۍ وڵاتە جیاوازەکاو ئەورووپای بەشڎارییشا کەرد.

خولە یەرەڕووەیەکەنە بابەتەکا پێسە هەلومەرجی سیاسی و کۊمەڵایەتی پانیشتوو کورڎسانی وعێراقنە، تارێخوو جمیەروو ئازاڎیی ژەناو کورڎسانی و ژەنۊلۊلۊژی پێشکەش کریا. خولەکەنە جەخت سەروو وێشناسای، هۊشیارکەردەیوە ژەنۍ جە تارێخوو وێشنە و پەنەوازیی وێڕێکوستەی ژەنا وزیا ڕووە.

چا یەرە ڕووەنە قسەوباسێوە هەس سەروو کێشەکاو گلێرگەو کوردی و ژەنەو کوردی وەڵاتاو ئەورووپاینە، پەرسەکاو کورڎسانی و کاریگەرییشا سەروو گلێرگەی بەروو وەڵاتینە کریا و هەرپاسە ئاماژە بە پێویسیی بەشڎاریی ژەنۍ جە چارەسەرکەردەی کێشەکانە کریا و گرنگیی سەرمەشقیی ژەنا جە ڕێکوستەی ژەنانە و گلێرگەنە بەگردی وزیا ڕووە جە بەشڎاریی ڕاستەوخۊو تاکەکانە جە چارەسەرکەردەی کێشەکانە. جە چارەسەرینە جەخت سەروو فەلسەفە و پارادایموو مۊدێرنیتەی دیموکراتی کریاوە، کە پایەکاو دیموکراسیینە ڕاستەوخۊ، ئیکۊلۊژی و ئازاڎیی ژەنۍ وەش بۊ. ژەنی جەنە قسەکاشانە ئاماژەشا بە گرنگیی ڕێبازەکاو زانستوو ژەنێ- ژەنۊلۊژی کەرد جە فاڕای زهنیەت و بنیاتنیای سیستمێوە ئەلتەرناتیڤینە، کە جوابوو پەرسەکاو ڕۊی و پەرسە کەڵکەبییەیەکان.

وێرەگاناو خولەکەینە ژەنی بەرنامەی هونەری و کولتوورییشا ڕێک وست یۊ چانیشا نیشانەدای بەڵگەفیلموو هێزا شەنگالین، کە باس جە فەرمانداریی یەکینەکاو ژەناو شەنگالی کەرۊ، هجوومەکاو ٢٠١٤ لاو داعشیوە مڕفانییۊ، کۊیلۍ کریۊ و ورەشیێۊ وسانیۊ. دماو ئازاڎکەردەیش لاو هێزەکاو یەپەژەیۊ بەشڎاریی یەکینەکاو ژەناو شەنگالی کەرۊ و دماتەر پێسە فەرماندارێوە بەشڎاریی جە ڕزگارکەردەی ڕەقاینە کەرۊ، چا شارەنە کە ورەتەی و سانایش پۊوە کریۊ لاو داعشیوە".

ژەناو پانیشتوو کورڎسانی، کە فرێشا ئەنداماو ڕێکوستەیەکا ژەناو تەڤگەروو ئازاڎیی گلێرگەو کورڎسانی بێنۍ و بەشێوەشا جە چالاکە مەدەنییا وەشۍ بیێنۍ پلانسازیێوەشا پەی قۊناغوو ئایندەی متەرە و دماتەر بەشڎاریی وێشا جە " هەڵمەتەو ئازاڎی پەی ئۊجالان "ینە کریا.