ئومێد بەرۆشکی یۆ بۍ جە زینڎانیا بادینانی و جە ڕۊو ٢١/٨/ ٢٠٢٠ سەروو هەرمانە رۆنامەوانییەکاش گیریا بۍ، نامبریا کە وەڵتەر یۆبۍ جە زینڎانیا بادینانی و دماو ساڵێوە و شش مانگا جە زینڎانیکەردەیش جە ٢٢/٢/ ٢٠٢٢ ێنە ئازاڎ کریا.

یاگۍ ئاماژەیا گێرتەو ئومێد بەرۆشکی، دماو وتارەکێش ئاما ۋەروو دەم و دادگاو هەولێرینە، سەروو سزادایۆ شێروان شێروانی پۍ ماوەو چوار ساڵا تەری، کە چنەشەنە مەسرور بارزانیش  تاوانبارکەردەبۍ جە واوەی سزادایۆ شێروان شیروانی و ئەرەیاۋنابێش "تا کەی بە عەقڵیەتی عەسکەریۆ دەسەڵات سەروو زینڎانیارە جابەجێ کەری؟ قات و ڕیبات مەتاوۆ عەقڵیەتوو تۆی عەسکەری شارۊوە".

سەبارەڎ بە ڕووەدایەکا گێرتەی نایاساییەکەیش جە کەیسوو گیرییایا بادینانی و ئا ئەشکەنجە و ئێش و ستەمەی جە تەرەفوو دەسەڵاتوو پەدەکەیۆ ۋەران ۋەرش کریا، ئومێد بەرۆشکی رۆنامەنوویس و چالاک جە گرتە ڤیدیۆیێنە باسوو ڕوودایەکاش پۍ ئاژانسوو هەواڵوو فوراتی (ANF)ی کەردۍ.

ستەمێوە بۍ جە دەنگوو ئازاڎیی

سەبارەڎ گێرتەی چالاکا و رۆنامەنوویسا بادینانی، ئومێد بەرۆشکی واتش: "زینڎانی کەردەی گیریایا بادینانی تەنیا گێرتەی چن کەسێوە نەبۍ بەڵکم ستەمێوە بۍ جە دەنگوو ئازاڎیی گرڎوو خەڵکوو بادینانی، چونکی گیرییایا بادینانی تەنیا نوێنەرۍ ۋێشا نەبێنۍ بەڵکم ئا رۆنامەنوویس و چالاکۍ نوێنەرۍ دەنگوو ئۆپەزسێۆنی حەقەتینەو مەنتیقەو بادینانی بێنۍ، گێرتەیما ستەمێوە بۍ جە ۋەران ۋەروو تەماموو خەڵکوو بادینانینە ئەنجام دریا".

دەسەڵاتوو بادینانی هۊرئێستەیۆ خەلکیش پنە قبووڵ نەکریا

ئومێد بەرۆشکی ئاماژەش پانەی کەرد کە حکومەت و دەسەڵاتوو پەدەکەی بە گێرتەی چالاکا و رۆنامەنویسا، خاڵەی سیاوەش جە ڕوومەتوو ۋێش دان  و واتش،'' پارتوو دەسەڵاڎداری بادینانی کۊت چێروو فشارێوە و پنەش هەرس نەکریا کە ئانڎە چالاکۍ سیاسی و رۆنامەنوویسۍ بەیا سەروو جاڎەکا و داواو مافوو ۋێشا کەرا، پۊکەی بە بەهانۍ جیاوازۆ ئی چالاکە سیاسی و رۆنامەنووسێشا گێرتۍ، حکومەتوو پەدەکەی سەرهۊردای و هۊرئێستەیۆ خەڵکیش پنە هەرس نەکریا (قبووڵش نەکەرد)".

دەس کریا بە گێرتەی و تەرسنای چالاکا و رۆنامەنویسا بادینانی

بەرۊشکی واتش: "پەدەکە حیچ وەخت چەمەڕاو ئانەی نەبۍ کە چالاکۍ سیاسی و رۆنامەوانۍ مجیارە جاڎەکا و داواو مافوو ڕەواو ۋێشا کەرا، پەدەکە مەنتیقەو بادینانی بە موڵکوو ۋێش مزانۆ بەڵام جە ڕاسینە چێوۍ پاسە نیا، بادینان مولکوو خەلکوو بادینانیا نەک مولکوو پارت و بنەیانێوە، پۊکەی وەختۍ کە پەدەکە دیش کە ئیتر خەلکوو ئی هەرێمەیە هوشیار بیەنۆ و گەمە چەپەڵەکۍ ئاڎیشاش دیێنۍ و ئیتر ۋەران ۋەرشا هۊرئێستۍ فرە پنەشا قورس بۍ، پۊکەی دەس کریا بە گێرتەی و تەرسنای چالاکا و رۆنامەنویسا بادینانی".

سەروو ئازاڎیی ڕابەربڕیەی فرەو کەسا بڕفانیۍ و گیریۍ

حەرپاسە جە درێژەو قسەکاشەنە ئومێد بەرۆشکی واتش: "فرەو کەسا گیریۍ و فرەو کەسایچ بڕفانیۍ، دیار نیا کە پۍ کۊی بڕفانیۍ، جە ساڵەو ٢٠٢٠ ینە نزیکەو ٨٠ کەسا گیریۍ تەنیا ۋەروو مژآری سیاسی و ئازاڎیی ڕابەربڕیەی، ئینەیچ خاڵێوە سیاوەنە میا چەماو حکومەتوو هەرێموو کوردسانی و بەتایبەت دەسەڵاتوو پەدەکەیۆ جە بادینانەن".

دادگایی کەردەی ئێمە سیاسی بۍ

بەرۆشکی جە بەردەوامی قسەکاشەنە ماچۆ : " پرۆسەو گێرتەو گیریایا بادینانی بی بە مەڵامەتوو لەرنایۆ پێگەو دەسەڵاتی جە بادینانەنە ۋەروو ئانەی حیچ بنەمایۍ یاسایی نەبۍ پۍ کەیسوو گێرتەو گیریایا بادینانی پۊکەی چن ئەگەرێوە سیاسی جە پەشتەو ئی کەیسەیۆ بێنۍ چونکی کەیسەکە بەتەمامی سیاسی بۍ کە چن کەسێوە سیاسی دەسوەردایش کەردەبۍ چی کەیسەنە، من جە ١٩و ئابوو ساڵەو ٢٠٢٠ینە چنی مامۆسا بەدەل بەرواری گیریایمۍ، دماو ئانەی بڕۍ هامڕۍ تەرێما گیریۍ پێسە شێروان شێروانی، مەڵا شڤان سەعید، گوهدار زێباری، ئەیاس کەرەم، هاریوان عیسا و قەهرەمان شوکری و چنڎین برادەرۍ تەرۍ زینڎانی کریۍ، جە زینڎانەنە پۍ چنڎین ساڵا سزادریۍ. بڕۍ جە برادەرەکاما ٦ ساڵۍ و بڕێشا کەمتەر یا زیاتەر بۍ منیچ پۍ ٣ ساڵا و ٦ مانگا دادگایی کریانی. پێسە سیاسی ئێمە دادگایی کریایمۍ".

زینڎانیکریایا بادینانی مافشا نەبۍ پێسە زینڎانیا تەری

ئومێد بەرۆشکی باسوو ئاژەو زینڎانەکا و سزا نا ڕسمیەکا دەسەڵاتی کەرۊ و ماچۆ: "بڕۍ جە هامڕایاما سزاو ۋێشا تەمام کەرد و ئازوڎۍ کریۍ منیچ یۆ چانیشا بێنا کە ساڵەو ٢٠٢٣ئازاڎ کریانی، بەڵام داخەم مەشۆ بڕۍ جە هامڕاکاما کە جە وەختوو نزیکبیەیۆ دمایی ئاماو سزاکاشا جارێوەتەر ڕووبەڕوو سزای تەری بێنێوە کە سزای نا ڕسمیۍ بێنۍ، ۋەروو ئانەی مافشا نیا پێسە گرڎوو زینڎانییەکا تەری پۊکەی کە داواو بڕۍ چێوی کەرا توشوو سزادای باوە".

ئەنەیاوای دەسەڵاتی ئەنەیاوایۍ توندڕەوا

ئومێد ئاماژەش پانەی کەرد کە دەسەڵات بەگێرتەی و سزادای مەتاوۆ ئی خاکیە پارێزنۊ و ماچۆ: "گرنگا کە واچا دەسەڵات تا کەی گرڎ کەسێ کە داواو مافوو ۋێش کەرۆ گیریۆ و سزا دریۆ و دلۍ زینڎانینە مەنۊوە؟ ئی ئەنەیاوایە و دەسەڵاتی ئەنەیاوایۍ تنڕەوا، ئینەیچ نامۍ و ئشناسنامۍ هەرێموو کوردسانی جە بەینوو دەولەتا گلێرگەو میان دەوڵەتینە ناشرین کەرۆ، پێویسا ئی حکومەت و دەسەڵاتە چانەی بیاوۆنە کە ئی چالاکۍ و رۆنامەنویسۍ ۋۍ ورەشۍ نیەنۍ، کەسۍ خراپۍ نیەنۍ، بەلکم پۍ ئی گەلی و خاکیە رەنج مڎا و کۊشیانە."

دەسەڵاتێوە خراپەکارو و ستەمکارا

بەرۆشکی جە بەردەوامی قسەکاشەنە ئاماژە پانەی کەرۆ، کە دەسەڵاتوو پەدەکەی دەسەڵاتێوە ستەمکار و خراپا پۍ ئی گەلەیە و ماچۆ: "بەپەیلوواو من ئی دەسەڵاتە پۍ ئی خاکەیە و ئی گەلەیە خراپا، دەسەڵاتێوە خراپەکارا و ستەمکارا  و ستەمێوە گەورە جە خەڵکی کەرۆ،. خەلکوو بادینانی خەلکێوە نشتیمان پەروەرێنۍ و جە ویەردەنە زەحمەتی و ئێشی فرەشا کێشتەن پەی خاکوو کوردسانی، پۊکەی مشۊم دەسەڵات جە عەقلیەتوو ۋێشەنە فاڕیای وەش کەرۆ."

یاگۍ فەخریا پۍ من و گرڎوو دەنگە ئازاڎەکا بادینانی

ئومێد بەرۆشکی جە دمادمایی قسەکاشەنە سوپاسو گرڎوو پارێزنەرە ۋۍ بەخشەکا و چالاکا و رۆنامەوانەکا کەرۊ و ماچۆ: "دڵ وەشەنا کە ئی کەیسە بیەن بە کەیسێوە میان دەولەتی. پۍ نموونەی گروپوو پارێزنەرا ئی کەیسەیە جە ئامریکانە خەلاتکریۍ و خەڵاتی میان دەوڵەتیشا هۊرگێرت ئینەیچ یاگۍ فەخریا پۍ گرڎوو پارێزنەرە ۋۍ بەخشەکا، یاگۍ فەخریا پۍ من و گرڎوو دەنگە ئازاڎەکا بادینانی و کوردسانیچ کە بەرزۍ بیێوە. بەنامۍ ۋێمۆ سوپاسوو گرڎوو پارێزنەرە ۋێبەخشەکا کەروو کە پارێزنایشا جە ئێمە و گرڎوو برادەرەکاما کەردەن، وە سوپاسوو گرڎوو خەلکوو کوردسانی کەروو کە پەشتیوانیشا جە ئێمە کەرد، وە سوپاسوو دەزگاکا ئەرەیاۋنای کەروو کە دەورێوە فرە عالشا گێڵنا پۍ وەڵا کەردەیۆ کەیسوو چالاکا بادینانی و لاو گرڎ کەسیۆ ئی کەیسەشا ئشناسا، جە دمادمایینە سوپاسوو گرڎوو چالاکا و رۆنامەنویسا کەروو کە دەوری گرنگشا گێڵنا چا وەختەی کە ئێمە زینڎانەنە بێنمۍ ئاڎۍ جە بەروو زینڎانینە هەرمانە کەرێنۍ پۍ ئازاڎکەردەیما".